გლობალური ომის პარტია, ვენეციის კომისიის დასკვნა, განათლების სისტემა და ტრადიციები. ირაკლი კობახიძის ინტერვიუ
ირაკლი კობახიძის ინტერვიუ
საქართველოს პრემიერმინისტრმა ირაკლი კობახიძემ “პირველ არხს” ვრცელი ინტერვიუ მისცა, სადაც განაცხადა, რომ უსუსური იყო სახე, რომელიც აჩვენა ვენეციის კომისიამ “გამჭვირვალობის კანონთან” დაკავშირებით. კობახიძემ ისაუბრა “გლობალურ ომის პარტიაზეც” და აღნიშნა, რომ ხელისუფლებას ინფორმაცია აქვს გლობალურ ომის პარტიაზე და მათ ამის გასაჯაროების უნდა ეშინოდეთ. მან ასევე ისაუბრა განათლების სისტემაზე და ფაქტობრივად მისი პროფესურა დაადანაშაულა წინა ხელისუფლების მხარდაჭერაში – ირაკლი კობახიძე ამომრჩეველს განათლების სისტემის ფუნდამენტურ რეფორმებს ჰპირდება.
რა თქვა საქართველოს პრემიერმინისტრმა:
“საჭიროა ახალი განათლების სისტემა – ამასაც გამჭვირვალობის მსგავსი რეაქცია მოჰყვება”
“საბოლოო ჯამში ერთ-ერთი სისტემა რაც მოირგეს საკუთარ თავზე წინა ხელისუფლების წარმომადგენლებმა (ესეც გარე დავალება იყო), იყო განათლების სისტემა – ანგრევდნენ სახელმძღვანელოებს, ეროვნულ სასწავლო გეგმას, საშინელი პოლიტიკა ჰქონდათ პედაგოგების კუთხით და ა.შ. – ანუ, ხელოვნურად ანგრევდნენ ამ სისტემას და საბოლოო ჯამში, რაღაც მყარი სისტემა ჩამოაყალიბეს, რომლის მარტივად გადალაგებაც არ იყო შესაძლებელი.
კიდევ უფრო მძიმე პრობლემები შექმნეს უმაღლესი განათლების სისტემებში. რომ ავიღოთ თსუ, სადაც მეც ვასწავლი, საერთო სურათი გვაქვს უმძიმესი.
ერთ-ერთი ფაქტორი არის ის, რომ პროფესორების დიდი ნაწილი არის მთლიანად პოლიტიკური ნიშნით შერჩეული – ეს ნიშნავს იმას, რომ მათ აქვთ პოლიტიკური მიკერძოება [გასაგებია, ვის მხარეს] და არ აქვთ საკმარისი კვალიფიკაცია – შეიძლება, პოლიტიკური მიკერძოება ნებისმიერ პროფესორს ჰქონდეს, მაგრამ როცა არც კვალიფიკაცია გაქვს და თან პოლიტიკურად მიკერძოებული ხარ, აქ ჩანს სინამდვილეში როგორ ფორმირდებოდა პროფესურა თსუ-ში.
ეს ეხება ძალიან დიდ ნაწილს პროფესურის, შესაბამისად, არის ჩაკეტილი წრე, სისტემა არის მთლიანად მოშლილი. ამის გამო არც სახელმძღვანელოები ვითარდება, არც მეცნიერება, ეს ყველაფერი საჭიროებს თვისობრივ გარდაქმნას.
კიდევ ერთხელ გავიმეორებ, ფსევდოლიბერალიზმის მთავარი ხაზი რა არის? “არ აძლევ სათანადო ცოდნას, ართმევ ღირებულებებს” ჩვენ გვჭირდება სისტემა, სადაც აძლევ სათანადო ცოდნას და ასევე, ათვიცნობიერებ ღირებულებებში სტუდენტს და ახალგაზრდას – ეს არის მთავარი ამოცანა.
არ ვიცი მასშტაბი რა იქნება, მაგრამ მსგავსი იქნება წინააღმდეგობა ამ საკითხთან, რაც ვიხილეთ გამჭვირვალობასთან დაკავშირებით – რატომ? იმიტომ, რომ ამაზე დგას ის იდეოლოგია, რასაც ჰქვია ფსევდოლიბერალიზმი ჩვენს ქვეყანაში.”
“უსუსური იყო სახე, რომელიც აჩვენა ვენეციის კომისიამ“
“უბრალოდ უხერხულობას ვგრძნობდი, როგორც იურისტი, როდესაც ამ დოკუმენტს ვკითხულობდი, იმდენად უსუსური იყო ის სახე, რომელიც აჩვენა ვენეციის კომისიამ ამ დოკუმენტით.
არაფერი აქვთ სათქმელი და უბრალოდ არის სავსე აბსურდული ჩანაწერებით და მათ შორის ტყუილებით. უამრავი სიცრუე გხვდებათ თქვენ ვენეციის კომისიის დოკუმენტში და ამ სიცრუესთან ერთად არის სრულიად აბსურდული სამართლებრივი მსჯელობა ყოველგვარი არგუმენტაციის გარეშე, მაგრამ საზოგადოება უყურებს საბოლოო ჯამში არა იმას, თუ რა თქვა ვენეციის კომისიამ, არამედ უყურებს იმას, თუ სად არის სიმართლე და ეს არის ერთ-ერთი სერიოზული მიღწევა, რაც ჩვენ გვაქვს ამ 2-3 წლის განმავლობაში.
ამიტომ ვამბობთ ხოლმე მათ შორის ხშირად, რომ დღეს ჩვენი ქვეყანა არის სუვერენული, როგორც არასდროს. ამაში მათ შორის იგულისხმება ის, რომ საზოგადოება უფრო მეტად აფასებს ჩვენი ქვეყნის დამოუკიდებლობას. ანუ დამოუკიდებლობის ფასი უფრო მეტად აქვს გააზრებული ქართულ საზოგადოებას დღეს, ვიდრე ჰქონდა თუნდაც 3-4 წლის წინ.“
“მნიშვნელოვანია აშშ-ს და EU-ს დეოლიგარქიზაცია გლობალური ომის პარტიის გავლენისგან“
“ვინც იდგა სხვა ინტერესების უკან, იგივე ძალა, გლობალური ომის პარტია [დგას მეორე ფრონტის ინტერესების უკანაც], რასაც ჩვენ შეგნებულად არ ვაკონკრეტებთ, მაგრამ ვგულისხმობთ ძალიან კონკრეტულ სუბიექტებს…
ვერ ვაკონკრეტებთ, მაგრამ კიდევ ერთხელ, რაც შეგვიძლია გავიმეოროთ, არის ის, რომ ამ ძალებს აქვთ საკვანძო გავლენა როგორც ევროკავშირზე, ისე ამერიკის შეერთებულ შტატებზეც, რაც არის ძალიან სამწუხარო მოვლენა. პირდაპირ შეიძლება ითქვას ერთი რამ – ამერიკასაც და ევროკავშირსაც სჭირდებათ დეოლიგარქიზაცია, ეს შეიძლება, ძალიან ცალსახად ითქვას. არის სამწუხარო პროცესები და იმედი გვაქვს, რომ ეს პროცესები სამომავლოდ სასიკეთოდ შეიცვლება…
არა, პარტნიორებს ჩვენ არ ვეძახით გლობალური ომის პარტიას, თუმცა, ვაცხადებთ, რომ ამ პოლიტიკურ სივრცეზე გლობალური ომის პარტიას აქვს სერიოზული გავლენა…
პრინციპული გავლენა აქვს, თუმცა, ჩვენ შეგვიძლია, დავიტოვოთ იმედი, რომ სამომავლოდ ვითარება შეიცვლება.
ჩვენ ცალსახად, რა თქმა უნდა, ვერავითარ შემთხვევაში ვერ ვუწოდებთ ჩვენს პარტნიორებს, ევროკავშირს, ამერიკის შეერთებულ შტატებს გლობალური ომის პარტიას, თუმცა, მნიშვნელოვანია, როგორც ევროკავშირის, ისე ამერიკის დეოლიგარქიზაცია, ამ გავლენისგან გათავისუფლება, წინააღმდეგ შემთხვევაში ჩვენ ხომ თვისებრივად განსხვავებული პოზიცია გვექნებოდა, ჩვენ გვაქვს ძალიან მკაფიოდ გამოხატული პოზიცია, ჩვენ გვინდა ევროკავშირში ინტეგრაცია, ჩვენ გვინდა უფრო მჭიდრო თანამშრომლობა ამერიკის შეერთებულ შტატებთან, თუმცა, იქითა მხრიდან ვხედავთ სამწუხაროდ საპირისპირო პროცესებს სწორედ იმ გავლენების გამო, რომელიც არსებობს როგორც ერთ, ისე მეორე სუბიექტზე.”
“ინფორმაცია ჩვენ გვაქვს გლობალურ ომის პარტიაზე, ამის გასაჯაროების უნდა ეშინოდეთ”
“ჩვენ ინფორმაცია ბუნებაში ვერ იარსებებს, იმიტომ, რომ ჩვენ ვმოქმედებთ აბსოლუტურად სუფთად ეროვნული ინტერესების დასაცავად და ერთადერთი, რაც გვამოძრავებს, ეს არის ჩვენი ქვეყნის ეროვნული ინტერესები. ეს ერთი.
და მეორე, რაც შეეხება ინფორმაციას გარკვეულ პროცესებთან დაკავშირებით, როდის, როგორ იყო ჩართული გლობალური ომის პარტია საქართველოში მძიმე პროცესების განვითარებაში, ამაზე ნამდვილად გვაქვს ინფორმაცია და ამ ინფორმაციის გასაჯაროების ნამდვილად უნდა ეშინოდეს გლობალურ ომის პარტიას – რა ხდებოდა სხვადასხვა პერიოდში ჩვენს ქვეყანაში, მათ შორის თუნდაც 14-წლიანი ინტერვალით, ამიტომ ვერავის ვერ დააშანტაჟებენ, იმიტომ, რომ ვერავითარი ინფორმაცია ვერ იარსებებს, ერთადერთი, რაზეც შეიძლება არსებობდეს ინფორმაციას, ეს არის ჩვენი გუნდის მიერ ჩვენი ქვეყნის ეროვნული ინტერესების დაცვა.”
“ორი ძალაა პოლიტიკაში, ჩვენ და კოლექტიური ნაცმოძრაობა“
“სინამდვილეში ჩვენ გვაქვს ორი ძალა ქართულ პოლიტიკაში. ერთი, ეს არის მმართველი გუნდი, ქართული ოცნება, მეორე არის ეს კოლექტიური პოლიტიკური ძალა, რასაც ჩვენ ვუწოდებთ კოლექტიურ ნაციონალურ მოძრაობას.
მათ კოლექტიურობას განაპირობებს ერთადერთი ფაქტორი – ეს არის ის, რომ ისინი მთლიანად არიან ერთი ხელიდან მართული. ეს არის მთავარი განმაპირობებელი.
რა თქმა უნდა, იქ არის შიდა ინტერესები, ამბიციები, სუბიექტური მომენტები, მაგრამ მთავარი არის ის, რომ საბოლოო ჯამში ისინი ყველა არიან ერთი ხელიდან მართულები. აქ იმაზე არ არის საუბარი ჩვენ რა და როგორ გვირჩევნია, მთავარია, ხალხს გავაგებინოთ, სად არის სიმართლე და ამის ჩვენება ჩვენთვის პრინციპულად მნიშვნელოვანია.
იმის ჩვენება, რომ ისინი სინამდვილეში არიან ერთი პოლიტიკური ძალა, ეს ჩვენთვის პრინციპულად მნიშვნელოვანია, იმიტომ, რომ ხალხი თუ გაიგებს სიმართლეს, უფრო მეტად იქნება დაცული. თუ არ ეცოდინება ბოლომდე სიმართლე, მაშინ იქნება შედარებით დაუცველი.”
“შეუძლებელია, ტრადიციების პატივისცემა და ფსევდოლიბერალიზმი დააბალანსო”
“ჩვენ გვჭირდება კლასიკური, ტრადიციული ღირებულებები ამ ქვეყანაში, ჩვენ გვჭირდება იმის გააზრება, რომ უნდა იყოს ბოლომდე დაცული ჩვენი ქვეყნის ეროვნული იდენტობა, მათ შორის, უნდა იყოს დაცული, რა თქმა უნდა, მართლმადიდებელი ეკლესია, ქრისტიანული ღირებულებები ჩვენს ქვეყანაში, თუ ჩვენთან ქრისტიანული კულტურა მოიშალა, საქართველოს ევროპულობიდან საერთოდ არაფერი დარჩება, ამიტომ, ამაზე მაქსიმალური ზრუნვა გვმართებს…
შეუძლებელია, ტრადიციების პატივისცემა და ფსევდოლიბერალიზმი ერთმანეთთან დააბალანსო.”
