პრემიერმინისტრმა ირაკლი ღარიბაშვილმა პარლამენტში წლიური ანგარიშის წარდგენისას განაცხადა, რომ შიდა მტრების დესტრუქციული ქმედებები საფრთხეა ქვეყნისთვის. მან ასევე ისაუბრა NATO-ში ქვეყნის გაწევრიანების პერსპექტივაზე და აღნიშნა, რომ ხელისუფლებამ ზედმეტი მოლოდინები არ უნდა გააჩინოს.
კიდევ რა თქვა ირაკლი ღარიბაშვილმა
● აფხაზეთის რკინიგზის აღდგენა მხოლოდ ქვეყნის გამთლიანების შემთხვევაშია შესაძლებელი. ბოლო დღეებში საზოგადოების შეცდომაში შეყვანის მორიგი მცდელობები იყო.
● კითხვები დაისვა NATO-ს სამიტთან დაკავშირებით. საქართველო იქნება წარმოდგენილი საგარეო საქმეთა მინისტრის სახით. ვნახოთ… ჩვენი ამოცანა არის, რომ ის პროგრესი, რომელიც მიღწეული გვაქვს, იყოს სათანადოდ აღიარებული, შეფასებული, დაფასებულიც. ამ სიტუაციაში სიმართლე უნდა ვუთხრათ ჩვენს საზოგადოებას, ჩვენს თავს, რომ ზედმეტი მოლოდინები არ უნდა გავაჩინოთ, ისევე, როგორც მათ გააჩინეს – გახსოვთ, MAP-ის თაობაზე მთელი კამპანია აწარმოეს, რომ MAP-ს რომ მივიღებთ, გავხდებით სამოთხე და მივიღეთ უბედურება. ვერც MAP-ი ვერ მიიღეს და ვერც ქვეყანა ვერ დაიცვეს მათი უგუნური პოლიტიკის გამო. ვერ აირიდეს თავიდან ეს დიდი პროვოკაცია.
● ჩემთვის მიუღებელია ბაღებსა და სკოლებში პროპაგანდა. ბაღებში და სკოლებში მიმდინარეობს [LGBT] პროპაგანდა. არ შეიძლება, ეს არის მიუღებელი. ამორალური იყო ეს კამპანია, რომელიც აწარმოა მაკდონალდსმა და თქვა, რომ ეს გლობალური კამპანიის ნაწილი იყო. რა მნიშნელობა აქვს ვერ გავიგე?! ჩვენს ქვეყანაში ეს უნდა იყოს ტაბუდადებული. ამაზე შეიძლება გაიხსნას დებატები პარლამენტში, მათ შორის შეიძლება საკანონმდებლო დონეზე მოწესრიგდეს აღნიშნული საკითხი.
● მე აქვე მინდა შეგახსენოთ, ვინაიდან თქვენ ახსენეთ ბატონი ივანიშვილი მე შეგახსენებთ მის ქველმოქმედებას. ბატონმა ივანიშვილმა სამი მილიარდი დახარჯა საკუთარი ჯიბიდან, თავის ქვეყანას მოახმარა და განსაკუთრებით აჭარაში ასეულობით მილიონი დოლარი აქვს დახარჯული, მთელი არეალი გარდაქმნა, მოგეხსენებათ შეკვეთილის არეალი და არა მხოლოდ.
● აქეთ ვეხმარებით ევროპელებს, რომ სანქცირებული პროდუქციის გადაზიდვა არ მოხდეს. ჩვენ კოლეგებს, პარტნიორებს, გავუზიარეთ ინფორმაცია, რომ 1 300-მდე შემთხვევა გვაქვს იდენტიფიცირებული ფინანსთა სამინისტროს. ჩვენ ვაცნობეთ ევროპელ კოლეგებს, ევროპულ სახელმწიფოებს, რომ სწორედ მათი ქვეყნებიდან მოდიოდნენ, მოემართებოდა, მოდიოდა ეს სანქცირებული პროდუქცია.
● ბოლო პერიოდში რაც ჩაიდინეთ [გულისხმობს “ნაციონალურ მოძრაობას” – JAMnews], გესმით, რამხელა ზიანი მიაყენეთ ჩვენს ქვეყანას? თქვენი ბელადის კამპანიაზე, რომ კვდება, მოწამლეთ, ვაწამეთ. ამაზე სად ხართ, რატომ აღარ ამბობთ არაფერს? გადარჩა სააკაშვილი თუ აღდგა?
● წარსულს ჩავაბარეთ პატიმრების წამება, დამცირება, გაუპატიურება, მკვლელობები. დღეს ერთ-ერთი სანიმუშო, სამაგალითო გახდა პენიტენციური დაწესებულება, შეიძლება ითქვას, მთელი ევროპის მასშტაბით. ყველა არის განცვიფრებული, გაოცებული ჩვენი ამ სისტემაში მიღწეული შედეგებით.
● სტატუსი არის სიმბოლური მნიშვნელობის, მაგრამ მნიშვნელოვანი შემდეგი ეტაპი. კარგად მოგეხსენებათ, რომ ჩვენმა გუნდმა ყველაფრისთვის მაქსიმუმი გააკეთა. შეხვედრების დროს, მე ჩვენს ევროპელ კოლეგებსა და მეგობრებს ვარწმუნებ, რომ თუ ისინი საქართველოს კანდიდატის სტატუსს არ მიანიჭებენ, ეს ევროკავშირის მხრიდან დაშვებული მორიგი სტრატეგიული შეცდომა იქნება. უბრალოდ, ამას ჩვენი ქვეყანა, ხალხი და ხელისუფლება არ იმსახურებს […] მინდა გითხრათ, რომ ჩვენს მიერ მიწოდებულ არგუმენტებს ჩვენი კოლეგების აბსოლუტური უმრავლესობა იზიარებს. ერთ-ერთი მთავარი არგუმენტი, რაც მე მათ ვუთხარი, არის შემდეგი: თუ როგორ გაიგებს ამ გზავნილს ზოგადად თუნდაც რუსეთის ფედერაცია, ასევე, სხვა ქვეყნები, რომლებიც დაინტერესებული არიან ევროკავშირში ინტეგრაციით, თუნდაც რეგიონში. მე ვფიქრობ, ეს არგუმენტი გაზიარებული და მოწონებული იქნება და წლის ბოლოს შესაბამის გადაწყვეტილებას მიიღებენ.
● ერთ-ერთი მთავარი რეკომენდაცია, რომელიც არ შესრულდა ისევ და ისევ ამ უპასუხისმგებლო ოპოზიციის დესტრუქციული საბოტაჟის, ბოიკოტის გამო, არის პოლარიზაციის შემცირება. დასრულება, ალბათ, შეუძლებელია, მოგეხსენებათ, პოლარიზაცია ყველა ქვეყანაში არსებობს, მაგრამ შემცირებისთვის ერთ-ერთი მთავარი წინგადადგმული ნაბიჯი იქნებოდა სტატუსის მინიჭება. მე მათ ვუთხარი და ღიად ვამბობ, თუ რეალურად ისინი არიან დაინტერესებულნი და მჯერა, რომ არიან, რათა შემცირდეს პოლარიზაცია ქვეყანაში. ქვეყანამ, ხალხმა და ჩვენმა მთავრობამ უნდა მიიღოს სტატუსი. ეს არის აუცილებელი.
