ფრანგული იარაღის სომხეთშისაქართველოს ტერიტორიის გავლით ტრანსპორტირებას აზერბაიჯანის ექსპერტთა საზოგადოებაში არაერთგვაროვანი რეაქცია მოჰყვა.
„ეს შეიძლება მივიჩნიოთ ერთგვარ „რევერანსად“ ევროპისთვის, ევროკავშირში საქართველოსთვის კანდიდატის სტატუსის მისაღებად და შეიძლება აიხსნას რეგიონში ბოლოდროინდელი მოვლენებით“, – ამბობენ აზერბაიჯანელი ანალიტიკოსები საქართველოს გადაწყვეტილებაზე.
„ჩვენ კატეგორიულად ვგმობთ საფრანგეთის მიერ სომხეთში „ბასტიონის“ შეტევითი ჯავშანტექნიკის გაგზავნას“, – ნათქვამია აზერბაიჯანის საგარეო საქმეთა სამინისტროს განცხადებაში.
აზერბაიჯანელმა პოლიტოლოგებმა თავიანთი მოსაზრებები გამოთქვეს აზერბაიჯანის საჯარო პორტალზე “Взгляд на Восток”
“საქართველო აზერბაიჯანის წინააღმდეგ ბალანსის თამაშში შევიდა”
“გავრცელდა ვიზუალური მტკიცებულებები იარაღის ტრანსპორტირების შესახებ, რომელიც საფრანგეთმა მიჰყიდა სომხეთს საქართველოს ფოთის პორტის გავლით”, – წერენ აზერბაიჯანელი ექსპერტები.
მათივე თქმით, ყურადღებას იქცევს ის ფაქტი, რომ „საქართველომ, რომელიც ადრე არ იძლეოდა ასეთი ტრანსპორტირების უფლებას”, შეიცვალა პოლიტიკა და ეს შეიძლება მივიჩნიოთ ევროპისთვის მიცემულ “რევერანსად”, რათა მათ საქართველოსთვის მიეცათ კანდიდატის სტატუსი. ასევე, ეს შეიძლება აიხსნას რეგიონში ბოლოდროინდელი მოვლენებით.
„საქართველო მთავარი დამარცხებულია ზანგეზურის დერეფნის თემიდან, რომლის განხილვაც ღიაა აზერბაიჯანის მხრიდანდა გარკვეულწილად, საქართველოს თამაშგარე მდგომარეობაში ტოვებს. მოლაპარაკებები ამ დერეფანზე და „3+3“ ფორმატზე საქართველოს გარეშე, თბილისს აიძულებს მანევრირებას. ჯერჯერობით, როგორც ჩანს, საქართველო ბალანსის თამაშში შევიდა აზერბაიჯანთან, რომელიც ზრდის მის რეგიონულ აქტივობას“, – ვკითხულობთ პორტალზე.
“რატომ ხუჭავს რუსეთი თვალს?”
„ბევრ ჩვენგანს ახლა ორი კითხვა აწუხებს.
ჯერ ერთი, რა გზა გაიარა ფრანგულმა იარაღმა ფოთამდე? აქ სამი ვარიანტია – რუმინეთის და ბულგარეთის პორტები, ან სტამბოლის სრუტეები. სტამბოლის გავლით ტრანსპორტირების ალბათობა ნულის ტოლია, რადგან… ნაკლებად სავარაუდოა, რომ თურქეთს სურს თავისი გეოპოლიტიკური მტრის აქტიურობა სამხრეთ კავკასიაში და თავად საფრანგეთიც არ გარისკავს ბოსფორის გავლით სამხედრო ტვირთების გადაზიდვას. ამიტომ რუმინეთის პორტ “კონსტანტას” გავლით ტრანსპორტირების დიდი ალბათობაა.
მეორე კითხვა: რატომ ხუჭავს რუსეთი თვალს შავი ზღვის გავლით იარაღის მიწოდებაზე სომხეთისთვის, რომელიც მისი “მოკავშირეა” კოლექტიური უსაფრთხოების ორგანიზაციაში? განსაკუთრებით იმ დროს, როდესაც ამ ქვეყნის ხელმძღვანელობამ რუსეთთან სამხედრო ალიანსის ალტერნატივის ძებნის შესახებ განაცხადა. გვეჩვენება, რომ აქ მხოლოდ ერთი ლოგიკური პასუხი შეიძლება იყოს: რუსეთი დარწმუნებულია, რომ საბოლოოდ საფრანგეთის მიერ სომხეთში გაგზავნილი იარაღი მის ხელში აღმოჩნდება.
ჩვენს რეგიონში პროცესები საოცარი სისწრაფით ვითარდება. სასარგებლო იქნება ამ აქტივობის შემცირება. საშიშია გახდე თამაშის ნაწილი, რომელიც ჩვენი კონტროლის მიღმაა. საქართველოს საკითხში კი ოფიციალური ბაქო უფრო თავშეკავებულად უნდა მოიქცეს, ვინაიდან საქართველო სამხრეთ კავკასიაში ყველაზე სტრატეგიული პოზიციის მქონე ქვეყანაა“, – შეაჯამეს თავიანთი ანალიზი აზერბაიჯანელმა ექსპერტებმა.
აზერბაიჯანის საგარეო საქმეთა სამინისტროს კომენტარი
საგარეო საქმეთა სამინისტროს პრესმდივანმა აიხან ჰაჯიზადემ ჟურნალისტების შეკითხვას საფრანგეთის მიერ სომხეთისთვის სამხედრო ტექნიკის მიწოდების შესახებ უპასუხა: ”ჩვენ მკაცრად ვგმობთ საფრანგეთის მიერ სომხეთში “ბასტიონის” ჯავშანტექნიკის გაგზავნას.”
აზერბაიჯანის საგარეო საქმეთა სამინისტროს ოფიციალური წარმომადგენლის თქმით, სამხედრო ტექნიკის გადაცემა „ემსახურება სომხეთის სამხედრო პოტენციალისა და დესტრუქციული მოქმედებების გაძლიერებას, რომელსაც თითქმის 30 წლის განმავლობაში ოკუპირებული აქვს აზერბაიჯანის რესპუბლიკის ტერიტორიების ნაწილი და არ იშლის აგრესიულ პოლიტიკას და რიტორიკას“.
„საფრანგეთის ეს ნაბიჯები, რომელიც თავს საერთაშორისო სამართლის ხელშემწყობად და რეგიონში მშვიდობისა და სტაბილურობის მხარდამჭერად სახავს, სერიოზულად აყენებს კითხვის ნიშნის ქვეშ მცდელობებს რეგიონში ურთიერთობის ნორმალიზებისთვის, სუვერენიტეტისა და ტერიტორიული პატივისცემის საფუძველზე და ემსახურება სიტუაციის გამწვავებას.
აზერბაიჯანის წინააღმდეგ საფრანგეთის ცილისწამების და რეგიონში დესტრუქციული ქმედებების ფონზე, ეს ნაბიჯები, რომლებიც სომხეთის მილიტარიზაციის პოლიტიკას ემსახურება, მიუთითებს იმაზე, რომ საფრანგეთი რეგიონში არასწორი ინტერესებით ხელმძღვანელობს.
სომხეთმა და საფრანგეთმა უნდა დაასრულონ მილიტარიზაციის პოლიტიკა რეგიონში, ამ ქვეყნებმა საბოლოოდ უნდა გაიგონ, რომ მშვიდობას და თანამშრომლობას რეგიონში ალტერნატივა არ აქვს.
ჩვენ მოვუწოდებთ საერთაშორისო საზოგადოებას, თავი შეიკავოს აგრესიული პოლიტიკით ცნობილი სომხეთის შეიარაღებისგან, შეწყვიტოს და დაგმოს ასეთი არალეგიტიმური ქმედებები, რომლებიც აფერხებენ მშვიდობისა და კეთილდღეობის დამყარებას რეგიონში.“ – განაცხადა ჰაჯიზადემ.
