HRW: დემონსტრანტების წინააღმდეგ პოლიციის ქმედებას სადამსჯელო ხასიათი ჰქონდა
HRW-ის ანგარიში
საერთაშორისო უფლებადამცველი ორგანიზაცია, Human Rights Watch საქართველოში მიმდინარე პროცესებთან დაკავშირებით ანგარიშს აქვეყნებს და აღნიშნავს, რომ აქციის მონაწილეებს სასტიკი მეთოდებით აკავებდნენ, სცემდნენ, აწამებდნენ და დაუნდობლად ეპყრობოდნენ პოლიციის ავტომობილებსა და განყოფილებებში.
Human Rights Watch-ის განცხადებით, ევროკავშირის წევრმა ქვეყნებმა უნდა გამოიყენონ ევროკავშირის ადამიანის უფლებათა გლობალური სანქციების რეჟიმი იმ ოფიციალური პირებისთვის, რომლებიც პასუხისმგებელნი არიან საქართველოში მომიტინგეების ცემასა და ძალადობაზე.
ორგანიზაცია პოლიციის მხრიდან დაზარალებულებზე დაყრდნობით წერს, რომ აქციაზე დაკავებულებმა მიიღეს ტვინის შერყევა, ცხვირის, სახის ძვლების და კიდურების მოტეხილობა და სხვა ტრავმები. ამასთან, პოლიციელები აღჭურვილი იყვნენ დამცავი საშუალებებით, შავი ნიღბებით და არ ჰქონდათ არანაირი ამოსაცნობი ნიშანი.
ანგარიშის მიხედვით, ოცნებამ ასობით მომიტინგეს ბრალი პოლიციისადმი დაუმორჩილებლობაში დასდო, ხოლო რაც შეეხება სასამართლო პროცესებს, დაკავებულების საქმეების განხილვა ზედაპირული იყო.
რა წერია ანგარიშში. მოკლედ
● საქართველოს ხელისუფლების ძალადობის დონე მშვიდობიანი მომიტინგეების მიმართ შოკისმომგვრელია და საქართველოს შიდა კანონებსა და საერთაშორისო ნორმებს არღვევს;
● პოლიციამ და უსაფრთხოების სხვა ძალებმა გამოიყენეს სასტიკი ძალადობა საქართველოს დედაქალაქ თბილისში ძირითადად მშვიდობიანი მომიტინგეების წინააღმდეგ;
● პოლიცია ასევე აწამებდა მათ და სხვა არასათანადო მოპყრობას ახორციელებდა პოლიციის ფურგონებში და პოლიციის განყოფილებებში;
● პოლიციის მხრიდან მომიტინგეების მიმართ არასათანადო მოპყრობის მასშტაბები და საქართველოს ხელისუფლების მიერ მათ გამო პასუხისმგებლობის არ დაკისრება იმაზე მეტყველებს, რომ ისინი ძალადობის უფლებას აძლევდნენ, ან პატიობდნენ მას;
● ევროკავშირის წევრმა ქვეყნებმა უნდა გამოიყენონ ევროკავშირის ადამიანის უფლებათა გლობალური სანქციების რეჟიმი იმ ოფიციალური პირების წინააღმდეგ, რომლებიც პასუხისმგებლები არიან საქართველოში მომიტინგეების ცემისა და ძალადობის უფლების მინიჭებასა და განხორციელებაზე.
“ხელისუფლებამ დაუყოვნებლივ უნდა შეწყვიტოს ძალადობა, პატივი სცეს მშვიდობიანი შეკრებისა და გამოხატვის უფლებებს და დროულად და ეფექტურად გამოიძიოს ცემის, წამების და სხვა არასათანადო მოპყრობის ყველა ბრალდება”, – ვკითხუხლობთ Human Rights Watch-ის ანგარიშში.
შინაგან საქმეთა სამინისტროს ინფორმაციით, 28 ნოემბრიდან (აქციების დაწყებიდან) 5 დეკემბრის ჩათვლის პერიოდში:
დაკავებულია აქციის 325 მონაწილე; 18 ადამიანს ედავებიან სისხლის სამართლის დანაშაულის ჩადენას; დაშავებულია – 150 პოლიციელი.
დაკავებულთა უმეტესობა ნაცემია. საიას ინფორმაციით, ნაცემია 319 დემონსტრანტი, მათ შორის, ბევრს სამედიცინო დახმარება და ქირურგიული ჩარევაც კი დასჭირდა, ერთი ადამიანს კი გადაუდებელი რეანიმაციული ღონისძიებები. დემონსტრანტებზე ძალადობის გამო ამ დროისთვის არც ერთ სამართალდამცველზე საქმე აღძრული არ არის.
მთავარი დაზიანებები ადამიანებს მიყენებული აქვთ არა წყლის ჭავლით და სხვა სპეცტექნიკით, არამედ სპეცრაზმელების მიერ არიან ნაცემები. უმეტესობას თავის ტვინის შერყევა აქვს. უმეტესად აღინიშნება სახის ძვლების, ცხვირის, თვალ-ბუდის მოტეხილობები და მრავლობითი დაჟეჟილობები. სამართალდამცავთა მხრიდან ძალადობის შესახებ ჰყვებიან თავად დაკავებულები და ის ადვოკატებიც, რომლებიც უსასყიდლოდ ეხმარებიან დაკავებულებს.
პროტესტის დაწყებიდან პირველი ორი დღის განმავლობაში სამართალდამცავები სასტიკად უსწორდებოდნენ ჟურნალისტებს, რომლებიც აქციას აშუქებდნენ. აქციების დაწყების დღიდან ნაცემი და დაშავებულია 70-ზე მეტი ჟურნალისტი. მათ ნაწილ დასჭირდა სერიოზული სამედიცინო ჩარევა. დაზარალებული ჟურნალისტების მონაყოლიდან და ასევე ადგილზე გადაღებული ვიდეოკადრებიდან ირკვევა, რომ სამართალდამცავები მათზე მიზანმიმართულად ნადირობდნენ.
