ჰელსინკის კომისია: გვაშფოთებს ოცნების გადაწყვეტილება, ანაკლიის პორტი ჩინეთს გადასცეს
ჰელსინკის კომისიის განცხადება ანაკლიაზე
აშშ-ს ჰელსინკის კომისია განცხადებას ავრცელებს, რომელშიც შეშფოთებას გამოხატავს “ქართული ოცნების” გადაწყვეტილებაზე, ანაკლიის ღრმაწყლოვანი პორტი ჩინეთის მიერ მხარდაჭერილ კომპანიას გადასცეს.
განცხადებაში ნათქვამია, რომ ამ გარიგებაში ჩართული დეველოპერები, მათ შორის China Communications Construction Company, ცნობილია იმით, რომ ინფრასტრუქტურულ პროექტებს მასპინძელი ქვეყნების ექსპლუატაციისა და დესტაბილიზაციისთვის იყენებს.
ჰელსინკის კომისიის განცხადება
“ჩვენ შეწუხებული ვართ ქართული ოცნების გადაწყვეტილების გამო, რომლის მიხედვითაც, ანაკლიის ღრმაწყლოვან პორტზე კონტროლი CCP-ის მიერ მხარდაჭერილ, აშშ-ს სანქცირებულ კონგლომერატს უნდა გადაეცეს. ამ გარიგებაში ჩართულ დეველოპერებს, მათ შორის China Communications Construction Company, აქვთ ინფრასტრუქტურის განვითარების პროექტების გამოყენების ისტორია.
რუსეთი რეგიონს ნაკლებად უსაფრთხოს ხდის და ზღუდავს თავისუფალ ვაჭრობას ამ შეთანხმებით, “ქართული ოცნება” კიდევ უფრო მეტ საფრთხეს უქმნის თავისი ქვეყნის დემოკრატიულ ტრაექტორიასა და უნარს, რომ განსაზღვროს საკუთარი ეკონომიკური მომავალი.
კრიტიკულ ინფრასტრუქტურულ პროექტებში ინვესტიციები უნდა ხმარდებოდეს საქართველოს ეკონომიკური უსაფრთხოების გაძლიერებასა და არა ქვეყანაზე ზედმეტ საგარეო გავლენას. თუ ანაკლიის პორტი ჩინეთის კონტროლის ქვეშ აღმოჩნდება, საქართველო სტრატეგიულ აქტივს დაუთმობს მთავრობას, რომელიც არ იზიარებს მის დემოკრატიულ ღირებულებებსა ან მიზანს, შეუერთდეს ტრანსატლანტიკურ უსაფრთხოების არქიტექტურას. ეს საფრთხეს უქმნის საქართველოს გრძელვადიან უსაფრთხოებას”, – წერია განცხადებაში.
2020 წლის დასაწყისში საქართველოს მთავრობამ განაცხადა, რომ ის „ანაკლიის განვითარების კონსორციუმთან“ წყვეტდა ღრმაწყლოვანი პორტის მშენებლობის საინვესტიციო ხელშეკრულებას. მიზეზად დასახელდა ის, რომ კონსორციუმმა ვერ შეასრულა ხელშეკრულებით გათვალისწინებული ვალდებულებები. თუმცა, კონსორციუმის ხელმძღვანელობა აცხადებდა, რომ სტრატეგიული პორტის მშენებლობა მიზანმიმართულად ჩაიშალა გეოპოლიტიკური მიზეზებით.
სწორედ ხელშეკრულების ჩაშლის შემდეგ, „ანაკლიის განვითარების კონსორციუმმა“ საქართველოს მთავრობის წინააღმდეგ საარბიტრაჟო სასამართლოს მიმართა.
2024 წლის 29 მაისს საქართველოს მთავრობამ გამოაცხადა, რომ ანაკლიის პორტის 49 პროცენტიან წილს ჩინურ-სინგაპურული კონსორციუმი ჩაიბარებს. კონსორციუმში, რომელთანაც საქართველოს მთავრობა ანაკლიის პორტზე კონტრაქტს უახლოეს მომავალში ოფიციალურად გააფორმებს, შედიან „ჩინეთის კომუნიკაციების მშენებლობის კომპანია“ (China Communications Construction Company Limited – CCCC); „ჩინეთის პორტების ინვესტიციები“ (China Harbour Investment CHI). კონსორციუმს, თავის მხრივ, ორი მნიშვნელოვანი კონტრაქტორი ჰყავს: „ჩინეთის გზებისა და ხიდების კორპორაცია“ (China Road and Bridge Corporation – CRBC) და „ცინდაოს საერთაშორისო პორტი“ (Qingdao Port International – QPI).
ყველა ზემოჩამოთვლილი კომპანია სახელმწიფო კომპანიაა.