“გვახსოვს 20 ივნისი” - საპროტესტო აქცია რუსთაველზე. ფოტორეპორტაჟი
თბილისში, პარლამენტის წინ, იმ ადგილზე, სადაც ერთი წლის წინ, ზუსტად ამავე დღეს – 2019 წლის 20 ივნისს, საქართველოს პარლამენტში რუსი მართლმადიდებელ-კომუნისტი დეპუტატის, სერგეი გავრილოვის ყოფნის გამო დაწყებული მიტინგი ხელისუფლებამ ძალის გამოყენებით დაშალა – მოძრაობა „სირცხვილიას“ ორგანიზებით საპროტესტო აქცია გაიმართა.
2019 წლის 20 ივნისს ხელისუფლებამ აქცია სპეცრაზმის მეშვეობით – წყლის ჭავლის და რეზინის ტყვიების გამოყენებით დაშალა.
200-ზე მეტი ადამიანი დაშავდა. მათგან ორმა – 18 წლის მაკო გომურმა და 26 წლის გიორგი სულაშვილმა თვალი დაკარგეს – მათ რეზინის ტყვიები თვალში მოხვდათ.
ერთი წლის შემდეგ მოქალაქეები რუსთაველზე კვლავ ოკუპაციის და გავრილოვის ღამის გასაპროტესტებლად შეიკრიბნენ.
- 20 ივნისი. გზამკვლევი მათთვის, ვისაც დეტალები კარგად არ ახსოვს
- ვინ არის მართლმადიდებელი კომუნისტი, რომელმაც თბილისში პროტესტი გამოიწვია
- საპროტესტო აქციის დაშლა თბილისში. რა იქნება შემდეგ? ექსპერტების შეფასებები
როგორც აქციის ორგანიზატორები აღნიშნავენ, აქციის დარბევიდან 1 წლისთავზე ისევ არ არის გამოძიებული ძალის გადამეტების არცერთი ფაქტი და არცერთი სამართალდამცველი არ დასჯილა.
გიორგი გახარია, რომელიც აქციის დარბევის დროს შინაგან საქმეთა მინისტრი იყო, ახლა პრემიერ-მინისტრია.
დაშავებულთა უმრავლესობას დაზარალებულის სტატუსი არ მინიჭებია.
მმართველი პარტიის თავმჯდომარის, ბიძინა ივანიშვილის მიერ დადებული პირობა, რომ 2020 წლის საპარლამენტო არჩევნები პროპორციული წესით ჩატარდებოდა, ამ დრომდე არ სრულდება.
კორონავირუსის პანდემიის გამო, აქციის ორგანიზატორებმა სპეციალური ზომები მიიღეს.
სოციალური დისტანციის დაცვის მიზნით, აქციის მონაწილეთა დასადგომი ადგილები სტიკერებითაა მონიშნული. სტიკერებზე ვლადიმერ პუტინის სახეა გამოსახული.
იყო დახლები, სადაც სადეზინფექციო ხსნარით შეიძლებოდა ხელების დამუშავება.
ყველას პირბადე ეკეთა.
აქციაზე სიტყვით 20-მდე ადამიანი გამოვიდა.
გამომსვლელთა შორის იყო მაკო გომურიც.
“ერთი წლის წინაც ასე ვიდექი, იგივე ტანსაცმელი მეცვა და როგორც ახლა ვქმნი რაიმე საფრთხეს თქვენთვის, სამართალდამცავებისთვის ან პარლამენტის შენობისთვის, მაშინაც ზუსტად ასეთ საფრთხეს წარმოვადგენდი.
მაგრამ ეს არ აღმოჩნდა საკმარისი ერთ-ერთი სამართალდამცველისთვის და მესროლა. მესროლა და გაჩნდა შეკითხვა – რატომ? ეს ის შეკითხვაა, რაზეც ერთი წლის მანძილზე პასუხი ვერ მივიღე.
რეალობა ხომ მარტივია – უნდა მივიღო საკუთარი წილი სამართალი, თუმცა, სხვა რეალობაც გვაქვს, რომელიც არის ჩემ წინ პარლამენტის შენობაში, სადაც იმის თქმასაც კი ბედავენ, რომ აღარ ახსოვთ, რა მოხდა 20 ივნისს და ჩვენი თვალები არის მეორეხარისხოვანი, პირველხარისხოვანი იყო ის, რომ მათ “შტურმი აარიდეს” პარლამენტში,” – თქვა მან.
აქციის მონაწილეთა შორის იყო ყოფილი პრეზიდენტი, გიორგი მარგველაშვილიც.
“ხელისუფლება, რომელიც პატრიოტული ლოზუნგებით გამოსულ მოქალაქეებს ტყვიას ესვრის, არ არის დემოკრატი; ხელისუფლება, რომელიც მერე პატრიოტული ლოზუნგებით გამოსულ მოქალაქეებს წყლის ჭავლით არბევს, არ არის დემოკრატიული; ხელისუფლება, რომელიც პოლიტპატიმრებს დაუშვებს თავის ქვეყანაში, არის ავტორიტარი; ხელისუფლება, რომელი საკუთარ ერს და საერთაშორისო პარტნიორებს მისცემს დაპირებას და მოიტყუება, არის საერთაშორისო თაღლითი. ასეთი ხელისუფლება არ ეკადრება ჩვენს ერს და ჩვენს საზოგადოებას”, – თქვა ექსპრეზიდენტმა აქციაზე სიტყვით გამოსვლისას.
რუსთაველის გამზირზე გავრილოვის ღამის წლისთავისადმი მიძღვნილი აქცია საქართველოს ჰიმნით დასრულდა.
20 ივნისის მოვლენებზე საუბრისას პრემიერ-მინისტრმა გიორგი გახარიამ განაცხადა, რომ ზუსტად არ ახსოვს, აქციის დაშლასთან დაკავშირებით საგამოძიებო უწყებაში რამდენჯერ იყო დაბარებული და რამდენი სამართალდამცავი ცნეს ბრალდებულად, რადგან 8 თვეზე მეტია შს მინისტრი აღარ არის და მეხსიერებიდან “რაღაცები წაეშალა”.
