ტექნიკური და საექსპერტო დახმარებისთვის, ასევე ცოდნის გაზიარებისთვის ოცნების მთავრობის თანხმობა იქნება საჭირო
გრანტების შესახებ კანონი
“ქართულ ოცნებას” 15 აპრილს მიღებულ ე.წ. გრანტების კანონში, რომლის მიხედვითაც, მთავრობის ნებართვის გარეშე გრანტის გაცემა აიკრძალა, ცვლილებები შეაქვს: ამიერიდან ტექნიკური, საექსპერტო დახმარების თუ ცოდნის გაზიარებისთვის, ივანიშვილის ხელისუფლების თანხმობა იქნება საჭირო.
”პრაქტიკაში გამოიკვეთა დამატებითი საკითხები, რაც დაზუსტებას საჭიროებს… კანონში დამატებით ზუსტდება გრანტის შესახებ ჩანაწერი. ცვლილებით, მათ შორის, ტექნიკური თუ საექსპერტო დახმარება, ცოდნის გაზიარება და სხვა მსგავსი კონტრიბუცია ასევე იქნება მიჩნეული გრანტად“, – განაცხადა “ქართული ოცნების” პარლამენტის წევრმა, თორნიკე ჭეიშვილმა.
მისივე თქმით კანონში გაიწერება, რომ ნებისმიერი საერთაშორისო ორგანიზაციის მიერ გაცემული ფინანსური სახსრები შეიძლება მთავრობამ გრანტად მიიჩნიოს.
“ასევე, გრანტის ფარგლებში გაცემული სახსრების გამოყენების სფეროებთან მიმართებითაც არის ტექნიკური დაზუსტებები, როგორიც უკავშირდება ჰუმანიტარულ სფეროს, თავდაცვისა და უსაფრთხოების სფეროს, ასევე, ზუსტდება გრანტების გამცემი სუბიექტებს ნუსხა. აქაც მკაფიოდ მიეთითება, რომ ნებისმიერი საერთაშორისო ორგანიზაციის მიერ გაცემული ფინანსური სახსრები შეიძლება იქნეს მიჩნეული გრანტად”, – თქვა ჭეიშვილმა.
ჭეიშვილმა ასევე განმარტა, რომ არსებობს რამდენიმე პროგრამა, რომელიც “თავისი არსით, ნაკლები რისკის შემცველია სახელმწიფო სუვერენიტეტისთვის”, შესაბამისად, შესაძლოა მათ განხორციელებაზე ივანიშვილის თანხმობა საჭირო არ გახდეს.
“იდენტიფიცირებულია იქნა რამდენიმე პროგრამა, რომლებიც, თავისი არსით, ნაკლები რისკის შემცველია სახელმწიფო სუვერენიტეტისთვის და ამდენად, ისინი შეიძლება არ დაექვემდებარონ თანხმობის გაცემის სამართლებრივ რეჟიმს.” – თქვა მან.
2024 წლის აპრილში, საქართველოს პარლამენტმა უმოკლეს დროში მიიღო კანონი, რომლის მიხედვითაც საქართველოში ვერანაირი უცხოური გრანტი ვერ გაიცემა მთავრობის თანხმობის გარეშე. ანუ, თუ რომელიმე ფონდს ან ორგანიზაციას – მაგალითად, ევროკავშირს ან გაეროს – სურს დაეხმაროს ქართულ არასამთავრობო ორგანიზაციას, ამისთვის ჯერ ირაკლი კობახიძის მთავრობისგან ოფიციალური ნებართვა უნდა აიღოს.
ცვლილებები პირდაპირ აზიანებს ორგანიზაციებს, რომლებიც მუშაობენ ადამიანის უფლებებზე, კორუფციასთან ბრძოლაზე, სერვისების მიწოდებაზე და მმართველობის ანგარიშვალდებულებაზე. ამ ორგანიზაციებისთვის საქმიანობის გაგრძელება პრაქტიკულად შეუძლებელი ხდება.
გრანტების შესახებ ცვლილებები მხოლოდ ერთ ცალკე აღებულ ინიციატივად ვერ განიხილება — ეს წარმოადგენს კოორდინირებული ტენდენციას, რომელიც უკვე გამოიხატა “ქართული ოცნების” მიერ 2024 წელს მიღებულ „უცხოური გავლენის“ და სხვა რეპრესიულ კანონებში, მიიჩნევენ ექსპერტები.
უფრო დეტალურად, რა წერია კანონში, წაიკითხეთ აქ.
