თანხმობის შემდეგ მიზნის შეცვლა ჩაითვლება თანხმობის გარეშე გაცემულ გრანტად - გრანტებში ცვლილებებს I მოსმენით მხარი დაუჭირეს
გრანტების შესახებ კანონი
იურიდიულ საკითხთა კომიტეტის სხდომაზე I მოსმენით მხარი დაუჭირეს “ქართული ოცნების” მიერ ინიცირებულ კანონპროექტს, რომლის მიხედვითაც, უცხოური გრანტის მიღებას მთავრობის ან მთავრობის მიერ განსაზღვრული უფლებამოსილი პირის თანხმობა დასჭირდება, ამასთან დაკავშირებით ცვლილებები გრანტების შესახებ კანონში შედის.
ოცნების დეპუტატმა არჩილ გორდულაძემ სხდომაზე თქვა, რომ თუკი გრანტის მიღებაზე მთავრობის თანხმობის გაცემის შემდეგ შეიცვლება გრანტის მიზანი ან თუკი მიმღები უმიზნოდ დახარჯავს აღნიშნულ თანხას, ამ შემთხვევაში თანხმობის გარეშე გაცემულ გრანტად ჩაითვლება და დადგება პასუხისმგებლობის საკითხი.
“თანხმობის გარეშე გრანტის გაცემად ასევე ჩაითვალოს უკვე თანხმობაგაცემულის მიზანი თუ შეიცვლება და მიზნის გარეშე თუ დახარჯავს თანხას მიმღები, ესეც თანხმობის გარეშე გაცემულ გრანტად ჩაითვალოს და შესაბამისად ამაზე კონტროლს განახორციელებს ანტიკორუფციული ბიურო და ამავდროულად ის პასუხისმგებლობები დადგეს, რაც არის გათვალისწინებული”. – თქვა გორდულაძემ.
გორდულაძემ ასევე ისაუბრა ახალ დამატებაზე, რომლის მიხედვითაც, მთავრობას ექნება წვდომა არა მარტო გრანტის ხელშეკრულებაზე, არამედ ნებისმიერ დოკუმენტზე, რომელიც საჭირო იქნება “ამ საკითხის” განხილვის ფარგლებში:
“მეორე პუნქტშიც გთავაზობთ, რომ დაკონკრეტდეს, რომ მთავრობას ექნება დამატებითი უფლებამოსილება, რომ არა მხოლოდ ხელშეკრულება და ხელშეკრულებაში გაწერილი საკითხები შეისწავლოს, არამედ შესაძლებელია, რომ ამ საკითხის განხილვის ფარგლებში სხვა დამატებითი დოკუმენტები, სხვა დამატებითი ინფორმაციის მოთხოვნაც იყოს რელევანტური – რათა თანხმობა იყოს გაწერილი. ამისათვის, გთავაზობთ, რომ კანონპროექტში ჩაეწეროს – გადაწყვეტილების მისაღებად გრანტის გამცემს მოსთხოვოს დამატებითი დოკუმენტაციის წარდგენა.”
კომიტეტზე ასევე განიხილეს ახალი დამატება, რომლის მიხედვითაც ანტიკორუფციულ ბიუროს შეეძლება ინდივიდის “მიღებული სახსრების” შემოწმება და თუკი ეს აღმოჩნდება გრანტი რომელიც კანონპროექტით არის შემოთავაზებული.
“შეიძლება რომ ადამიანებმა საერთოდ არ მიმართონ მთავრობას და გვერდი აუარონ საკანონმდებლო ჩარჩოს, ამიტომ უნდა იყოს ჩანაწერი, რომლის მიხედვითაც, თუ თავისი შინაარსით საქართველოში პირის მიერ მიღებული სახსრები არის გრანტი და რომელიც საჭიროებდა თანხმობას, ანტიკორუფციულმა ბიურომ გადაამოწმოს ეს სახსრები და თუკი ეს აღმოჩნდება გრანტი შემდეგ დაიწყოს ის პროცედურა, რომელიც კანონპროექტით არის შემოთავაზებული.” – თქვა გორდულაძემ.
“ქართული ოცნების” მთავრობის მიერ ინიცირებული კანონპროექტის მიხედვით, უცხოური გრანტის მიღებას მთავრობის ან მთავრობის მიერ განსაზღვრული უფლებამოსილი პირის თანხმობა დასჭირდება, ამასთან დაკავშირებით ცვლილებები გრანტების შესახებ კანონში შედის.
კანონპროექტის მიხედვით, მთავრობის მიერ გრანტის გაცემის თაობაზე თანხმობის გაცხადებისთვის 10-დღიანი ვადა განისაზღვრება. მთავრობის გადაწყვეტილების გასაჩივრება მის მოქმედებას არ გააჩერებს.
ამავე ცვლილებებით, აკრძალული გრანტის გაცემისა და მიღების მონიტორინგს ანტიკორუფციული ბიურო განახორციელებს. აკრძალული გრანტის მიღება გამოიწვევს გრანტის მიმღების დაჯარიმებას აღნიშნული გრანტის ორმაგი ოდენობით.
