საქართველოს შინაგან საქმეთა მინისტრის, ვახტანგ გომელაურის თქმით, შოვში, სტიქიის დღეს ვერტმფრენი დაახლოებით სამ საათში ჩავიდა, აქედან თითქმის ორი საათის ღრუბლებს უვლიდა, რათა ხეობაში შეფრენილიყო. მისივე განმარტებით, თუ სიცოცხლეს არ ემუქრება საფრთხე, ღამით ფრენის გარისკვა არაა მიზანშეწონილი.
გომელაური ასევე ამბობს, რომ ღამით ფერდობზე ჩარჩენილი ადამიანები უსაფრთხოდ იყვნენ და ვერტმფრენის გამოყენება “მიზანშეწონილი და დაშვებული” არ იყო, თორემ შეიძლება ჩამოვარდნილიყო.
“ვერტმფრენი ჩამოვიდა დაახლოებით სამ საათში, ვერტმფრენი არ არის არც ველოსიპედი და არც მანქანა, რომ დაჯდე უცბად და გავარდე, მას მომზადება ჭირდება. მეორე, ამინდი იყო ძალიან ცუდი, თითქმის ორი საათი ღრუბლებს უვლიდა, რომ შემოფრენილიყო ხეობაში, მაინც ჩამოვიდა ვერტმფრენი, იმუშავეს, შუაში კუნძულზე იყო 70 ადამიანი, გამოიყვანეს უსაფრთხო ადგილას.
მეორე მხარეს, ფერდობზე, იქ ჩვენი პოლიციელებიც იყვნენ, საკვებიც, უსაფრთხო ადგილი იყო, დაღამდა და იქიდან გამომდინარე, რომ საფრთხე იყო და აღარ გავრისკეთ, მეორე დღეს გამოვიყვანეთ ეს დარჩენილი ადამიანები.
რაც შეეხება, რატომ არ დაფრინავდნენ ღამე, ეს ასჯერ მაქვს ახსნილი, ვინც ერკვევა ავიაციაში ყველას კარგად ესმის, რომ გვაქვს ჩვენ ღამის ფრენის საშუალებები, შეძენილი გვაქვს, შეგვიძლია ვიფრინოთ, თუმცა არის ძალიან დიდი რისკი და თუ ადამიანის სიცოცხლეს არ ემუქრება იმ წამს რაღაცა, რომ გარისკოს პილოტებმაც, არ არის მიზანშეწონილი და არ არის დაშვებული”. – თქვა მან.
მინისტრის თქმით, საქართველოს უკვე შეძენილი აქვს სამი ვერტფმრენი და მისივე თქმით, პირველი ვერტმფრენი სავარაუდოდ, 2024 წლის მარტში შემოვა.
“ჩვენ გვყავს სულ 6 ვერტმფრენი. სამი ახალი ვერტმფრენი შეძენილია, საფრანგეთში შევიძინეთ, წესით მარტში უნდა ჩამოვიდეს პირველი ვერტმფრენი, წელს ვერ მოესწრება, სავარაუდოდ და იმ წელს დამთავრდება სამი ვერტმფრენის ჩამოყვანა. ვერტმფრენი მანქანა და ველოსიპედი ხომ არ არის, გახვიდე ბაზრობაზე და იყიდო. რიგებია და ამაზე ერთი წელი ვმუშაობდით თითქმის, თვეებია ვმუშაობთ, უკვე ნაყიდი გვაქვს ვერტმფრენები და მაგას სწავლება უნდა პილოტების, რომ გადაამზადო და ასე შემდეგ.” – აცხადებს გომელაური.
გომელაურის ინფორმაციით, ამ დროისთვის კიდევ 9 ადამიანს ეძებენ და ჩამოშლილი მიწის თითქმის 60% უკვე შემოწმებულია. ამასთან ერთად ის ამბობს, რომ მდინარის 50 კილომეტრს – ამბროლაურამდე ამუშავებენ და შემდეგ სავარაუდოდ, რიონს “დაბლა ჩაუყვებიან”.
3 აგვისტოს, კურორტ შოვში, მათ შორის სასტუმრო სანსეტ შოვთან მეწყერი ჩამოწვა. ადიდებულმა მდინარემ წაიღო სამანქანო ხიდი. მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი. სამაშველო ღონისძიებები ამ დრომდე გრძელდება. ოფიციალური ინფორმაციით, სტიქიას 24 ადამიანის სიცოცხლე ემსხვერპლა.
გარემოს ეროვნული სააგენტოს დასკვნის მიხედვით, ტრაგედიის მიზეზი გახდა რამდენიმე სტიქიური გეოლოგიური და ჰიდრომეტეოროლოგიური მოვლენების თანხვედრა, რამაც მდინარე ბუბუსწყლის ხეობაში ექსტრემალური ხასიათის ღვარცოფული ნაკადის ფორმირება გამოიწვია.
როგორც დასკვნაში წერია, მართალია, მეწყრული პროცესების ფორმირება მრავალი ფაქტორის თანხვედრამ გამოიწვია, თუმცა უშუალოდ ტრაგედიის დღეს მომხდარი სტიქია მყისიერად განვითარდა. დასკვნის თანახმად, არ დასტურდება გავრცელებული მოსაზრება, თითქოს სტიქიის განვითარებამდე ცოტა ხნით ადრე მდინარე ბუბას ხეობაში წყალი დაგუბდა.
ანგარიშში ნათქვამია, რომ მეწყრულ პროცესებს ხელი შეუწყო კლიმატურმა ცვლილებებმა – ბოლო პერიოდში მომატებულმა ჰაერის ტემპერატურამ გამოიწვია მყინვარების ინტენსიური დნობა და ჭარბი ატმოსფერული ნალექი.
გარემოს ეროვნული აცხადებს, რომ ამ ეტაპზე, საფრთხის შემცველი არ არის.
“აღსანიშნავია, რომ მდ. ბუბისწყლის კალაპოტში მიმდინარეობს სტიქიის თანმდევი პროცესები. მასშტაბური სტიქიების შემდეგ, ასეთი მოვლენები მოსალოდნელი ფაქტია. ამ ეტაპზე, აღნიშნული პროცესები საფრთხის შემცველი არ არის”, – აღნიშნავენ სააგენტოში.
