„გირჩის“ პოლიტიკური შტაბების მიერ კარანტინის წესის დარღვევას შსს იძიებს

საქართველოს შინაგან საქმეთა სამინისტრომ თბილისში მდებარე კვების ობიექტებში იზოლაციის და კარანტინის წესის დარღვევის ორ ფაქტზე გამოძიება დაიწყო. სამინისტროს ცნობით, თბილისის პოლიციის დეპარტამენტში შპს “ათონელის” და ბარ “FELLERS”-ში იზოლაციის ან კარანტინის წესის დარღვევის ფაქტებზე სისხლის სამართლის საქმე აღიძრა და საგამოძიებო ღონისძიებები დაიწყო.

15 ოქტომბრიდან თბილისში, ბათუმსა და იმერეთის რეგიონში რესტორნები, ბარები და კაფეები 07:00 საათიდან 22:00 საათამდე ფუნქციონირებენ.

შსს-ს ცნობით, „აღნიშნული კვების ობიექტები საქართველოს კანონმდებლობით დადგენილი წესების დარღვევით, 22:00 საათის შემდეგ განაგრძობდნენ ეკონომიკურ საქმიანობას. ობიექტების წამომადგენლების განცხადებით, ორივე ბარი ერთ-ერთი პოლიტიკური პარტიის შტაბი იყო, რისი დამადასტურებელი დოკუმენტაციაც ობიექტების მესაკუთრეებს საგამოძიებო უწყებისთვის არ წარუდგენიათ“.

გამოვლენილი დანაშაული ფიზიკური პირის შემთხვევაში – სამ წლამდე ვადით თავისუფლების აღკვეთას ითვალისწინებს, ხოლო იურიდიული პირი ისჯება ჯარიმით, საქმიანობის უფლების ჩამორთმევით ან ლიკვიდაციითა და ჯარიმით.

პოლიტიკური პარტია „გირჩის“ განცხადებით, დაწესებულებებში პარტიის პოლიტიკური შტაბები მდებარეობდა, რომელთა მოქმედება კანონით დაშვებულია.

„გვეუბნებიან რომ შტაბში შეკრების უფლება გვაქვს, ლაპარაკის უფლება გვაქვს, ალკოჰოლის მიღების უფლება გვაქვს, მაგრამ არ გვაქვს ალკოჰოლის გაყიდვის უფლება. ანუ, საკუთარი ბოცებით რატომ არ დაგაქვთ შტაბში სასმელიო“, – წერს თავის ფეისბუკ გვერდზე „გირჩის“ ლიდერი ზურაბ გირჩი ჯაფარიძე.

„მე რომ ვიპოვო მულტიმილიონერი დამფინანსებელი, რომელიც გირჩს ჩაურიცხავს ბევრ ფულს, მერე ამ ფულით ვიყიდო ასობით ლიტრი არაყი, დავარიგო შტაბებში, მხარდამჭერებთან ერთად დავლიო და თან ვილაპარაკოთ – მაგაზე პრობლემა არ არის. ათი საათის მერე ალკოჰოლში ფულს რა პონტში იხდითო – ამას გვედავებიან. არჩევნებამდე 12 დღით ადრე, ამაზე რატომ უნდა ვკარგავდეთ მთელი გირჩი დროს?“, – წერს ჯაფარიძე.

საქართველოს პრემიერ-მინისტრმა გიორგი გახარიამ 19 ოქტომბერს განაცხადა, რომ დაჯარიმდება ყველა კომპანია, რომელიც არ ემორჩილება კორონავირუსის გავრცელების საწინააღმდეგო რეგულაციებს და საბაბად პოლიტიკურ მიზეზს იყენებს.

“რამოდენიმე კომპანიამ მუშაობის გაგრძელება სცადა, რაღაც შეფერილობებით, თითქოს პოლიტიკურ პროცესებში მონაწილეობდნენ.  პირადად გპირდებით, ყველა მათგანი იქნება დაჯარიმებული, თუ ეს შემთხვევები გაგრძელდება. მეორე შემთხვევაში ყველას წინააღმდეგ დაიწყება სისხლის სამართლის საქმის გამოძიება”, – განაცხადა გახარიამ.