მოსაზრება: ვენსის რეგიონში ვიზიტი და მისი საქართველოში არსტუმრობა, ირიბი ინდიკატორია, რომ სანქციების საკითხი კიდევ ერთხელ დაბრუნდება
გიორგი შაიშმელაშვილის მოსაზრება
უსაფრთხოების ექსპერტი გიორგი შაიშმელაშვილი აცხადებს, რომ “ქართული ოცნების“ ხელისუფლების არაღიარება მუშაობს და მუშაობს ისეთ ტრანზაქციულ სამყაროში, სადაც პარტნიორებს არჩევენ არა ადამიანის უფლებების მდგომარეობის სტანდარტის მიხედვით, არამედ გეოპოლიტიკური მდგენელის გამოყენებით.
მისი თქმით, დასავლეთისთვის, მათ შორის ტრამპის ადმინისტრაციისთვის “ქართული ოცნების“ მთავრობა არის “სპოილერი“, რომელიც მათ მოწინააღმდეგეთა ბლოკშია. შაიშმელაშვილი აღნიშნავს, იმ ფონზე, როცა არსებული საერთაშორისო წესრიგი იშლება და იცვლება, თუ საქართველოში სწრაფი ცვლილებები არ მოხდა, როგორც დამოუკიდებელი სახელმწიფოს გადარჩენა გაგვიჭირდება.
ამერიკის შეერთებული შტატების ვიცეპრეზიდენტი ჯეი დი ვენსი თებერვალში სომხეთსა და აზერბაიჯანს ეწვევა, თუმცა არ ჩამოვა საქართველოში. ვენსის ვიზიტის მიზანია პროექტის “ტრამპის მარშრუტი საერთაშორისო მშვიდობისა და კეთილდღეობისკენ” (TRIPP) გაძლიერება.
გიორგი შაიშმელაშვილი: ““ჰელსინკის კომისიაში საქართველოს საკითხზე რიგით მეორე მოსმენაა. პირველის აქცენტი საქართველოს საგარეო პოზიციონირება იყო. საუბარი იყო ჩინეთთან, ირანთან, რუსეთთან ჩვენს კავშირებზე – ამ ბოროტების ღერძზე, რომელიც აშშ-ს სტრატეგიულ მოწინააღმდეგეთა რიცხვში შედის. როგორც ჩანს, ჰელსინკის კომისიის შემდეგი სხდომა ადამიანის უფლებების გაუარესებულ მდგომარეობაზე და დემოკრატიის სტანდარტებზე იქნება.
ერთი წელი გავიდა გასული წლის 20 იანვრიდან, როცა ივანიშვილის პარტია გვპირდებოდა, რომ პრეზიდენტ ტრამპის ადმინისტრაციასთან ურთიერთობებს გადააწყობდნენ და დაალაგებდნენ. ამ ერთი წლის განმავლობაში აშშ-თან ურთიერთობები არა თუ არ ნორმალიზდა, პრეზიდენტ ტრამპის ადმინისტრაციის გადაწყვეტილებით შექმნილ “მშვიდობის საბჭოში“ ადამიანის უფლებების დამრღვევი და ავტორიტარიზმისკენ მიდრეკილი ბევრი მთავრობა და სახელმწიფო მოხვდა და ამ წრეშიც კი ვერ მოხდა “ქართული ოცნება“.
ეს ერთადერთ რამეს ნიშნავს – უნდა გვესმოდეს, რომ “ქართული ოცნების“ ხელისუფლების არაღიარება მუშაობს და მუშაობს ისეთ ტრანზაქციონალისტურ სამყაროში, როგორშიც ჩვენ დღეს ვცხოვრობთ – მუშაობს იმ სამყაროში, სადაც პარტნიორებს არჩევენ არა ადამიანის უფლებების მდგომარეობის სტანდარტის მიხედვით, არამედ გეოპოლიტიკური მდგენელის გამოყენებით.
მეტიც ის დასავლეთისთვის, მათ შორის ტრამპის ადმინისტრაციისთვის არის სპოილერი. მიაჩნიათ, რომ არის მათ მოწინააღმდეგეთა ბლოკში. ამ თვალსაზრისით მართლა ტრაგიკული მომენტი გვიდგას, რომ ყველანაირი რუკიდან გავქრეთ.
ჩვენ გვიყურებენ როგორც რუსეთის ფედერაციის გაგრძელებას – პროქსი ძალას. არ გვეძახიან ისეთ ფორმატებშიც კი, სადაც ათასი ჯურის ავტორიტარია მიწვეული
იმ ფონზე, როცა არსებული წესრიგი იშლება და იცვლება, თუ არ მოხდა სწრაფი ცვლილებები, ძალიან გაგვიჭირდება, რომ როგორც დამოუკიდებელი სახელმწიფო გადავრჩეთ.
აქამდე თავს იმით იმშვიდებდნენ, რომ აშშ-ს ადმინისტრაციას ჩვენი რეგიონის მიმართ ინტერესი არ ჰქონდა და მისი პრიორიტეტი ლათინურ ამერიკაში და აზია-წყნარ ოკეანეთში იყო. თუ გავითვალისწინებთ, აზერბაიჯანისა და სომხეთის მიმართულებით ტრამპის მშვიდობის ინიციატივას – ”ტრამპის კორიდორს”, აშშ-ს ვიცე პრეზიდენტის რეგიონში დაგეგმილი ვიზიტს და მის არსტუმრობას საქართველოში, ეს ირიბი ინდიკატორია იმისი, რომ საქართველოსთან დაკავშირებით სანქციების საკითხი დღის წესრიგში დიდი ალბათობით კიდევ ერთხელ დაბრუნდება. რაც შეეხება “მეგობარი აქტს“, მას კონგრესში სხვა ტიპის წინააღმდეგობები აქვს და შესაბამისად, არ ვიცით, ამ წინააღმდეგობის დაძლევა რამდენად სწრაფად მოხდება.“
