გიორგი რურუა სასამართლომ პატიმრობაში დატოვა, ოპოზიცია საკონსტიტუციო ცვლილების ჩაგდებით იმუქრება
“მთავარი არხის” ერთ-ერთი მეწილე, გიორგი რურუა სასამართლომ წინასწარ პატიმრობაში დატოვა. გიგი უგულავას და ირაკლი ოქრუაშვილის გათავისუფლებასთან ერთად, მისი გათავისუფლება 2020 წლის 8 მარტს, ხელისუფლებასა და ოპოზიციას შორის გაფორმებული შეთანხმების ნაწილია. ოპოზიცია ამბობს, რომ გიორგი რურუას გათავისუფლების გარეშე შეთანხმება შესრულებულად არ ჩაითვლება და საკონსტიტუციო ცვლილებებს მხარს არ დაუჭერს. ხელისუფლება კი აცხადებს, რომ სასამართლო საკუთარ გადაწყვეტილებებში დამოუკიდებელია და ხელისუფლებას მასზე ზემოქმედების ბერკეტი არ აქვს.
გიორგი რურუა, რომელიც გასული წლის ნოემბერში იარაღის უკანონო შეძენა-შენახვა-ტარების ბრალდებით დააკავეს, სასამართლომ ისევ წინასწარ პატიმრობაში დატოვა. მოსამართლე ვალერიან ბუგიაშვილმა განმარტა, რომ საქმეში არ არსებობს ახალი გარემოებები, რის საფუძველზეც გადაწყვეტილების შეცვლა შეიძლება. გარდა ამისა, არსებობს საფრთხე, რომ თავისუფლებაზე ყოფნის შემთხვევაში რურუა მოწმეებზე ზეგავლენას მოახდენს.
ოპოზიცია პოზიციას არ თმობს და საკონსტიტუციო ცვლილების ჩაგდებით იმუქრება
ოპოზიცია აცხადებს, რომ ხელისუფლებამ 8 მარტს მიღებული შეთანხმება ბოლომდე უნდა შეასრულოს და გაათავისუფლოს გიორგი რურუაც, წინააღმდეგ შემთხვევაში საკონსტიტუციო ცვლილებებზე მუშაობა არ დაიწყება.
“პრეზიდენტის მიერ გამოცხადებული გადაწყვეტილება, რომლითაც გიგი უგულავა და ირაკლი ოქრუაშვილი გათავისუფლდნენ, მნიშვნელოვანი ნაბიჯია 8 მარტის შეთანხმების შესრულებისკენ და საქართველოში პოლიტიკური სიტუაციის ნორმალიზაციისკენ. იმედს გამოვთქვამთ, რომ საპატიმროს მალე დატოვებს გიორგი რურუაც, ხოლო ამის შემდეგ საქართველოს პარლამენტი მიიღებს შეთანხმებულ საკონსტიტუციო ცვლილებებსა და ასევე გადაიდგმება ნაბიჯები საარჩევნო კანონმდებლობის საერთაშორისო რეკომენდაციების საფუძველზე გარდასაქმნელად,” – წერია ოპოზიციის ერთობლივ განცხადებაში.
ოპოზიცია აცხადებს, რომ სასამართლომ დღეს მორიგი პოლიტიკური გადაწყვეტილება მიიღო, როდესაც გიორგი რურუას აღკვეთის ღონისძიების ფორმა არ შეუცვალა.
“მნიშვნელოვანი ნაბიჯი გადაიდგა 8 მარტის შეთანხმების შესრულებისკენ, როდესაც მოხდა გიგი უგულავას და ირაკლი ოქრუაშვილის გათავისუფლება. ახლა ძალიან მნიშვნელოვანია, რომ მოხდეს გიორგი რურუას გათავისუფლება, რომ ჩავთვალოთ, რომ შეთანხმების ეს კომპონენტი არის შესრულებული და შევძლოთ, რომ ოპოზიციის თანამონაწილეობით გავიტანოთ საკონსტიტუციო ცვლილებები პარლამენტში,” – ამბობს “ნაციონალური მოძრაობის” პოლიტიკური საბჭოს წევრი თინა ბოკუჩავა.
“ეს არის ქვეყნისთვის უმნიშვნელოვანესი მომენტი, როდესაც ჩვენ უნდა შევიდეთ საარჩევნო რეფორმის და პოლიტიკური ნორმალიზების ეტაპზე. მიუხედავად იმისა, რომ სასამართლომ მიიღო მორიგი უსამართლო გადაწყვეტილება, დრო რჩება, შესაძლებლობა არსებობს და ნუ დავაზარალებთ ქვეყანას მაშინ, როდესაც ეს პროცესი დაწყებულია”, – აცხადებს ევროპული საქართველოს ერთ-ერთი ლიდერი, ელენე ხოშტარია.
ხელისუფლება პასუხისმგებლობას ოპოზიციას აკისრებს
მთავრობა საკონსტიტუციო ცვლილებების შესაძლო ჩავარდნის შემთხვევაში პასუხისმგებლობას ოპოზიციას აკისრებს.
პარლამენტის თავმჯდომარის მოადგილე, გიორგი კახიანი აცხადებს, რომ სასამართლო დამოუკიდებელია თავისი გადაწყვეტილების მიღებაში.
“რამდენადაც ცნობილია, ამ ეტაპზე სასამართლოს საბოლოო გადაწყვეტილება არ გამოუტანია და სასამართლომ უბრალოდ არ გაითვალისწინა აღკვეთის ღონისძიების შეცვლა. ძალიან მნიშვნელოვანია, რომ ნაციონალურმა მოძრაობამაც და ევროპულმა საქართველომაც ამ ცვლილებას მხარი დაუჭირონ, რადგან არდაჭერის შემთხვევაში ეს იქნება მათი მხრიდან შესაბამისი პასუხისმგებლობა და საუბარი იმაზე, რომ ვინაიდან სასამართლომ დღეს არ შეცვალა აღკვეთი ღონისძიება, შეიძლება გახდეს ესოდენ მნიშვნელოვან გადაწყვეტილებაზე უარის თქმის საფუძველი, ეს რა თქმა უნდა, არასწორია,” – ამბობს ის.
გიორგი რურუას გათავისუფლება 8 მარტის საარჩევნო შეთანხმების ნაწილია.
რას გულისხმობს 8 მარტის საარჩევნო შეთანხმება
2020 წლის 8 მარტს აშშ-ს საელჩოში ხელისუფლებას და ოპოზიციას შორის ხელი მოწერა მემორანდუმს, რომელიც საარჩევნო სისტემის შეცვლას, 2020 წლის საპარლამენტო არჩევნებზე მანდატების 120/30-ზე განაწილებას და პოლიტპატიმრების გათავისუფლებას გულისხმობს.
ქართული ოცნება პოლიტპატიმრების გათავისუფლების საკითხზე შეთანხმებას უარყოფდა და აცხადებდა, რომ ოპოზიცია ცრუობს და ასეთი შეთანხმება ვერ შედგებოდა იმ უბრალო მიზეზის გამო, რომ საქართველოში პოლიტპატიმრები არ არსებობენ.
დასავლელი პარტნიორების ზეწოლის და არაერთი კრიტიკული განცხადების შემდეგ, საქართველოს პრეზიდენტმა სალომე ზურაბიშვილმა, 15 მაისს გიგი უგულავა და ირაკლი ოქრუაშვილი შეიწყალა.
- საქართველოში პოლიტიკა ბრუნდება. ისტორიული საარჩევნო შეთანხმება შეიძლება ჩაიშალოს
- საქართველო ევროკავშირისგან 500 მლნ ევროს მიიღებს. დახმარება ვალდებულებების შესრულებაზე იქნება დამოკიდებული
- ივანიშვილის კავშირი რუსეთის მთავრობასთან, დასავლური ბიზნესის შევიწროება – რას წერენ სენატორები აშშ-ს სახელმწიფო მდივანს
პრეზიდენტის შეწყალების შემდეგ ქართულ ოცნებაში განაცხადეს, რომ მათთვის პრეზიდენტის გადაწყვეტილება მიუღებელი იყო და რომ შეწყალების აქტის თაობაზე მათ პრეზიდენტთან კომუნიკაცია არ ჰქონიათ.
აშშ-ის სენატის საგარეო ურთიერთობათა კომიტეტის თავმჯდომარემ, სენატორმა ჯიმ რიშმა და მისმა მოადგილემ, სენატორმა ჯინ შაჰინმა უგულავასა და ოქრუაშვილის შეწყალების შემდეგ განცხადება გაავრცელეს და მიუთითეს, რომ ახლა ელიან “გიორგი რურუას გათავისუფლებას, მედიის მფლობელის, რომელიც დეკემბერში საეჭვო ბრალდებებით დააკავეს”.
გიორგი რურუას საქმე
გიორგი რურუა ოპოზიციურად განწყობილი ტელევიზიის – ტელეკომპანია მთავარის ერთ-ერთი მეწილეა. ის ფინანსურად ეხმარებოდა მოძრაობას – სირცხვილია. გიორგი რურუა 2019 წლის 18 ნოემბერს, აქციის დარბევამდე რამდენიმე საათით ადრე ცეცხლსასროლი იარაღის უკანონო შეძენა-შენახვის ბრალდებით დააკავეს.
თავად გიორგი რურუა ბრალს არ აღიარებს და ამბობს, რომ მისი საქმე პოლიტიზებულია.
მოგვიანებით მის საქმეს კიდევ ერთი მუხლი – სასამართლო გადაწყვეტილების შეუსრულებლობა და მისი შესრულებისთვის ხელის შეშლა დაემატა, რადგან რურუამ სასამართლოს განჩინების მიხედვით, დნმ-ის და თითის ანაბეჭდების ნიმუშების აღებაზე უარი განაცხადა.
“საერთაშორისო გამჭვირვალობა – საქართველო”, რომელმაც გიორგი რურუას საქმის მასალები შეისწავლა, წერს, რომ რურუას არამართლზომიერად შეეზღუდა საქართველოს კონსტიტუციითა და საერთაშორისო აქტებით გარანტირებული უფლებები და თავისუფლებები.
“გიორგი რურუას პირადი ჩხრეკის ოქმის შედგენისა და ცეცხლსასროლი იარაღის დალუქვისას არსებითად არის დარღვეული სისხლის სამართლის საპროცესო კოდექსის მოთხოვნები. საქმის შესწავლის შედეგად ორგანიზაცია მივიდა დასკვნამდე, რომ საქმეში არსებული საპროცესო დარღვევები, სხვადასხვა ექსპერტიზის დასკვნასთან ერთად, ეჭვქვეშ აყენებს გიორგი რურუას ცეცხლსასროლ იარაღთან შემხებლობასა და მტკიცებულების ავთენტურობას. აღნიშნული ოქმი კი ბრალდების მხარის მთავარი მტკიცებულებაა. ორგანიზაცია მიიჩნევს, რომ პირადი ჩხრეკის ოქმი და ამოღებული ნივთიერი მტკიცებულებები დაუშვებლად უნდა იქნეს ცნობილი,” – წერია განცხადებაში.
“საერთაშორისო გამჭვირვალობა – საქართველო” მიიჩნევს, რომ მნიშვნელოვანი ხარვეზებით ჩატარდა გიორგი რურუას ავტომანქანის ჩხრეკაც. საქმეში არსებული არაერთი ფაქტი ცეცხლსასროლი იარაღის მაყუჩის წარმომავლობის საეჭვო გარემოებებზე მიუთითებს და გამოძიების სხვადასხვა ეტაპზე დაირღვა გიორგი რურუას დაცვის უფლებაც. ბრალდებულს დაკავებისას არ მიეცა ადვოკატსა და ოჯახის წევრებთან დაკავშირების ადეკვატური შესაძლებლობა, ხოლო გამოძიების დასკვნით ეტაპზე გამომძიებელმა ერთ-ერთი საგამოძიებო მოქმედება ადვოკატის სავალდებულო მონაწილეობის გარეშე ჩაატარა.
