უკრაინაში მებრძოლი საქართველოს მოქალაქე ერევანში დააკავეს. მას რუსეთში ექსტრადიცია ემუქრება
გიორგი კინოიანი ერევანში დააკავეს
უკრაინის ომის მონაწილე ქართველი მებრძოლი, გიორგი კინოიანი სომხეთში დააკავეს და მას რუსეთში ექსტრადიცია ემუქრება. ახლა ქართველი მებრძოლი 40-დღიანი საექსტრადიციო ვადით ჰყავთ დაპატიმრებული, რაც პროცედურულად გულისხმობს, რომ ამ დროში რუსეთმა მისი ექსტრადიციისთვის საჭირო მტკიცებულებები და დოკუმენტაცია უნდა წარადგინოს.
გიორგი კინოიანი რუსეთის წინააღმდეგ უკრაინაში ომის დაწყების პირველ ეტაპზე იმყოფებოდა. 2024 წლის 25 ოქტომბერს ის რუსეთის მიერ ოკუპირებული დონეცკის ოლქის ე.წ. სასამართლომ დაუსწრებლად გაასამართლა, დამნაშავედ ცნო და შვიდი წლით თავისუფლების აღკვეთა მიუსაჯა.
ქართველმა მესაზღვრეებმა მებრძოლი საზღვარზე ისე გაუშვეს, არ მიაწოდეს ინფორმაცია იმის შესახებ, რომ რუსეთის მიერ წითელი ცირკულარით იყო ძებნილი. ოჯახის თქმით, თუ მას საქმის კურსში ჩააყენებდნენ, კინოიანი საქართველოს არ დატოვებდა.
“დონეცკის ე.წ. სასამართლომ, ჩემ ძმას 2024 წლის ოქტომბერში დაუსწრებლად გამოუტანა განაჩენი და რუსეთმა წითელი ცირკულარით მოითხოვა ამ ძებნილების გადაცემა. არ ვიცი რა იქნება, სომეხი ადვოკატები იმედს არ გვაძლევენ, ამბობენ, რომ ექსტრადიციის საფრთხე ძალიან დიდია. საზღვრის კვეთის დროს მას არანაირი ინფორმაცია არ ჰქონდა, რომ დააკავებდნენ და რაიმე პრობლემები შეექმნებოდა, თორემ ლოგიკურია, რომ ამ გადაწყვეტილებას არ მიიღებდა.
სომხეთის საზღვარზე, მესაზღვრეებს ამოუგდო რომ რუსეთის მხრიდან წითელი ცირკულარით იძებნებოდა, ამის შესახებ არც გიორგის და არც მის ირგვლივ არავის არ ჰქონია. სომხეთში, საქართველოს საელჩოშიც ვიყავი, მაგრამ ამ ეტაპზე არანაირი გამოხმაურება არ გვაქვს. მითხრეს, რომ ინფორმაცია აქვთ, შესაბამისი სტრუქტურები მუშაობენ, თუმცა, ჩემთან ხაზზე არავინ გამოსულა, არც ოჯახის სხვა წევრებთან. დღეს ვაპირებ მივმართოთ იუსტიციის სამინისტროს, საგარეო საქმეთა სამინისტროს და ყველა იმ სტრუქტურას, რომელიც შესაძლოა, ჩვენ გამოგვადგეს”, — განაცხადა კინოიანის ძმამ “ტვ პირველთან” ინტერვიუში.
კინოიანის თანამებრძოლები ამბობენ, რომ მისი რუსეთში ექსტრადირება სარისკოა და დიდ საფრთხესთან არის დაკავშირებული.
“ოკუპირებული დონეცკის ოლქის ე.წ. სასამართლომ რამდენიმე ქართველს დაუსწრებლად მოგვისაჯა პატიმრობა და ჩვენზე გამოცხადდა ძებნა, სხვადასხვა ქვეყნებში. მას ემუქრება სერიოზული საფრთხე რუსეთში ექსტრადირებისა და ალბათ მოგეხსენებათ, რამდენად საშიში და სარისკოა და ასევე, რა შეიძლება მოხდეს მისი რუსეთში ექსტრადირების შემთხვევაში. ოჯახმა ყველაფერი გააკეთა, მიმართეს ყველას, ასევე იყვნენ მისულები სახალხო დამცველთან, მაგრამ ჯერჯერობით, არანაირი იმედი არ ჩანს, ერთადერთი საშუალება გვრჩება, რაც შეიძლება მეტ ადამიანს მივაწვდინოთ ხმა, ვუთხრათ მთავრობას, რადგან ასეთ შემთხვევაში, მათ აქვთ მთავარი ძალა.” — ამბობს დომენიკ მანგო.
რას ამბობს შსს
საქართველოს შინაგან საქმეთა სამინისტროში ამტკიცებენ, რომ გეგუთის გამშვებ პუნქტზე მესაზღვრეებს შეცდომა არ დაუშვიათ, რადგან რუსეთი გიორგი კინოიანს ინტერპოლის ცირკულარით არ ეძებდა და ძებნა გამოცხადებული იყო დესეთეს სისტემით, რასაც ქართველი მესაზღვრე ვერ დაინახავდა. შესაბამისად, იმის გამო, რომ საქართველო დსთ-ს წევრი ქვეყანა აღარ არის, მესაზღვრეებს ბაზაში არ უჩვენებდა, რომ საქართველოს მოქალაქეს რუსეთი ეძებდა.
რაც შეეხება საქართველოს ელჩს სომხეთში – გიორგი შარვაშიძემ “ტვ პირველების“ კითხვის მოსმენის შემდეგ, სატელეფონო კომუნიკაცია შეწყვიტა და აღარც შეტყობინებებს უპასუხა.
კომენტარი
პოლიტიკური პარტიების წარმომადგენლები ასევე იმ ფაქტებს იხსენებენ, როდესაც გაჟონა ინფორმაციამ ქართველი სამხედროების შესახებ და „ოცნების“ ხელისუფლების პირობებში ის რუსული სპეცსამსახურების ხელში აღმოჩნდა.
ალეკო ელისაშვილი ამბობს, რომ ქართული მხარის პირდაპირი მოვალეობა იყო, გაეფრთხილებინათ კინოიანი, რუსეთის მიერ ძებნილთა სიაში რომ იყო:
“ჩვენ უნამუსო ხელისუფლებას უნდა გაეფრთხილებინა, თუ ამ ადამიანს ეძებდნენ რუსული სპეცსამსახურები. წესით და კანონით, ის საქართველოში უნდა დააბრუნონ. თუ რუსეთს გადასცეს, ეს იქნება ძალიან მძიმე ფაქტი, დიდი შავი ლაქა ამ სულგაყიდულებისთვის, ჩვენი ხელისუფლებისთვის ვინაიდან, მათი ვალდებულება იყო, რომ გაეფრთხილებინათ. ვფიქრობ, რა გავაკეთო ამ ადამიანის დასახმარებლად, მეც მძიმე მდგომარეობაში ვარ, 6 – წლიანი პატიმრობა მაქვს მისჯილი, რუსების მიერ.”
ენმ-ის ლიდერი თინა ბოკუჩავა კი არ გამორიცხავს, რომ “ივანიშვილის გუნდმა საქართველოს მოქალაქე რუსეთს გადასცეს და მის დასახსნელად არაფერი გააკეთოს.“
“ივანიშვილის მოღალატე კრიმინალთა ბანდა არის პუტინის ღია მოკავშირე, ნაცვლად იმისა, რომ იცავდეს საქართველოს ეროვნულ ღირსებას, საქართველოს მოქალაქეებს, მათ შორის იმ ადამიანების, რომლებიც ჩვენი საერთო მტრის, პუტინის წინააღმდეგ იბრძვიან, რა თქმა უნდა, პირიქით, აქაც ირჩევს ოკუპანტის მხარეს, ინტერესს და ამიტომ, სულ არ არის გამორიცხული, რომ ამ მოღალატე კრიმინალთა ბანდამ საქართველოს მოქალაქე რუსეთს გადასცეს.” – ამბობს ბოკუჩავა.
