გიორგი გაბუნიას ლიკვიდაციის განზრახვა დესტაბილიზაციის რუსულ გეგმად უნდა შეფასდეს - არასამთავრობო სექტორი

17 არასამთავრობო ორგანიზაცია მიიჩნევს, რომ “მთავარი არხის” ჟურნალისტის, გიორგი გაბუნიას  შესაძლო ლიკვიდაციის განზრახვა საქართველოს სუვერენიტეტში ჩარევად და დესტაბილიზაციის რუსულ გეგმად უნდა შეფასდეს.  არასამთავრობო ორგანიზაციები მთავრობას მოუწოდებენ, რომ გამჭვირვალედ წარმართოს გამოძიება და საზოგადოებას სრული ინფორმაცია მიაწოდოს დაგეგმილი დანაშაულის შესახებ.

ტელეკომპანია “მთავარი არხის” დირექტორის, ნიკა გვარამიას განცხადებით, გიორგი გაბუნიას მკვლელობა სავარაუდოდ, ჩეჩნეთის რესპუბლიკის პრეზიდენტმა, რამზან კადიროვმა დაუკვეთა. კადიროვი გიორგი გაბუნიას საჯაროდ დაემუქრა მას შემდეგ, რაც ჟურნალისტმა თითქმის ერთი წლის წინ, საავტორო გადაცემის პირდაპირ ეთერში რუსეთის პრეზიდენტის მიმართ არაეთიკური გამონათქვამები გამოიყენა. საქართველოს უსაფრთხოების სამსახურმა უკვე დააკავა პირი, რომლის წინააღმდეგაც დაწყებულია გამოძიება შეკვეთით განზრახ მკვლელობის მომზადების ფაქტზე. თუმცა, უწყება ამ ეტაპზე გაბუნიას ლიკვიდაციასთან კავშირზე პირდაპირ არ საუბრობს და არც მედიაში გავრცელებულ ინფორმაციას უარყოფს.

• გინება პუტინის მისამართით რუსთავი 2-ის ეთერში. პოლიტიკოსების და ექსპერტების კომენტარები
• შეიყვარო კადიროვი“ – ჩეჩნეთის ლიდერს რუს ბლოგერებთან ერთად „იუმორისტულ“ ვიდეოებში იღებენ

განცხადებაში აღნიშნულია, რომ რუსეთის ხელისუფლების წარმომადგენლების მხრიდან საქართველოს მოქალაქის წინააღმდეგ შემუშავებულ შესაძლო ლიკვიდაციის გეგმას კიდევ უფრო ამწვავებს ის გარემოება, რომ დაკვეთილი მკვლელობის სამიზნე ჟურნალისტია და ეს ქმედება მისი გამოხატვის თავისუფლების წინააღმდეგ არის მიმართული.

“აღმაშფოთებელია რუსეთის ხელისუფლების წარმომადგენლების გააქტიურება იმ პირების მიმართ, ვინც პუტინს მწვავედ აკრიტიკებს. საკითხს ის ფაქტი კიდევ უფრო ამძაფრებს, რომ რუსეთის ხელისუფლების მხრიდან შესაძლო ფიზიკური ლიკვიდაციის სამიზნე ჟურნალისტია და ეს ქმედება მისი გამოხატვის თავისუფლების წინააღმდეგ არის მიმართული. ეს ყოველივე ასევე მიზნად ისახავს საქართველოში იმ მედიის წარმომადგენელთა თუ აქტივისტთა დაშინებას, რომლებიც საზოგადოებას რუსეთის ოკუპაციის სიმძიმეს და საქართველოს მიმართ რუსეთის მთავრობის დამპყრობლურ პოლიტიკას მუდმივად ახსენებენ.

ამ ვერშემდგარი აქტის მიზანი, ასევე, სავარაუდოდ, ქვეყანაში საზოგადოებრივი მღელვარების გამოწვევაც იყო, რაც პანდემიის ფონზე და ისედაც დაძაბულ წინასაარჩევნო გარემოში სიტუაციის უკიდურესი ესკალაციის მიზეზი შეიძლება გამხდარიყო. საქართველოს ტერიტორიაზე სხვა ქვეყნის წარმომადგენლების მხრიდან მსგავსი ოპერაციის დაგეგმვა და ჩატარება ჩვენი ქვეყნის სუვერენიტეტში ჩარევადაც უნდა ჩაითვალოს”, – წერია განცხადებაში.

განცხადებაში ასევე აღნიშნულია, რომ რუსეთის მხრიდან საქართველოს საზღვრების მიტაცების და ქვეყნის მოქალაქეების გატაცების პარალელურად, ასევე, იმის ფონზე, რომ საქართველოში ანტიდასავლური პროპაგანდა ძლიერდება, ზემოთ აღნიშნული ქვეყნის უსაფრთხოების წინააღმდეგ და შესაძლო დესტაბილიზაციისკენ მიმართულ ქმედებად შეიძლება იქნას განხილული.

არასამთავრობო ორგანიზაციები მოუწოდებენ საქართველოს მთავრობას, რომ გამჭვირვალედ წარმართოს გამოძიება, უზრუნველყოს მასში მეგობარი ქვეყნების ექსპერტების ჩართულობა და სრული ინფორმაცია მიაწოდოს საზოგადოებას დაგეგმილი დანაშაულის შესახებ. 

არასამთავრობოები თხოვნით მიმართავენ მეგობარ ქვეყნებს, რომ ყურადღებით მიადევნონ თვალი საქართველოს ტერიტორიაზე რუსეთის ახალი ფორმით გააქტიურებას.

განცხადებას ხელს აწერენ:  “საერთაშორისო გამჭვირვალობა-საქართველო”, “ღია საზოგადოების ფონდი”, “მედიის განვითარების ფონდი”, “საქართველოს რეფორმების ასოციაცია”, “საქართველოს ატლანტიკური საბჭო”, “საქართველოს სტრატეგიისა და საერთაშორისო ურთიერთობების კვლევის ფონდი”, “საზოგადოება და ბანკები”, “ლიბერალური აკადემია თბილისი”, “ეკონომიკური პოლიტიკის კვლევის ცენტრი”, “საქართველოს ფერმერთა ასოციაცია”, “სამართლიანი არჩევნებისა და დემოკრატიის საერთაშორისო საზოგადოება”, “ინფორმაციის თავისუფლების და განვითარების ინსტიტუტი”, “საქართველოს გაეროს ასოციაცია”, “საფარი”, “საქართველოს დემოკრატიული ინიციატივა”, “მწვანე ალტერნატივა” და ცენტრი “ემპათია.”