გაეროში დევნილების შესახებ რეზოლუციას სომხეთი პირველად მიემხრო, ჩინეთმა კი თავი შეიკავა
გაეროში დევნილების შესახებ რეზოლუცია
4 ივნისს გაეროს გენერალურმა ასამბლეამ “აფხაზეთიდან, საქართველოდან და ცხინვალის/სამხრეთ ოსეთის რეგიონიდან, იძულებით გადაადგილებულ პირთა და ლტოლვილთა სტატუსის შესახებ” რეზოლუცია მიიღო და გაიმეორა, რომ ყველა იძულებით გადაადგილებულ პირს აფხაზეთისა და ცხინვალის რეგიონში დაბრუნების უფლება აქვს. რეზოლუციას სომხეთი პირველად მიემხრო, საქართველოს ახალმა სტრატეგიულმა პარტნიორმა ჩინეთმა კი თავი შეიკავა.
რეზოლუციას 103-მა ქვეყანამ დაუჭრა მხარი, მოწინააღმდეგე 9 იყო, ხოლო ხმის მიცემისგან თავი 52-მა ქვეყანამ შეიკავა. ამასთანავე, აღსანიშნავია, რომ ისტორიაში პირველად, ამ რეზოლუციას სომხეთმაც დაუჭირა მხარი.
რეზოლუციის მოწინააღმდეგე ქვეყნები არიან: რუსეთი, ბელარუსი, ბურუნდი, კუბა, მალი, ნიკარაგუა, ჩრდილოეთ კორეა, სირია და ზიმბაბვე. ამას გარდა, იმ ქვეყნებს შორის, რომლებმაც ხმის მიცემისგან თავი შეიკავეს, ირანი და ჩინეთიც არიან.
წინა წელს, ამავე შინაარსის რეზოლუციას 100 მხარდამჭერი ჰყავდა, ხოლო 2018-2022 წლებში მხარდამჭერთა რიცხვი 79-95 შორის მერყეობდა.
პარლამენტის თავმჯდომარე, შალვა პაპუაშვილი ამბობს, რომ გაეროს რეზოლუციაზე ჩინეთის თავშეკავება “მხარდაჭერის ტოლფასია”. ამის შესახებ მან ჟურნალისტებთან პარლამენტში განაცხადა.
“რამდენიმე ჩვენი მეგობარი და პარტნიორი ქვეყანა აფიქსირებს თავშეკავების პოზიციას ხოლმე და ესეც განპირობებულია იმით, რომ საერთაშორისო ორგანიზაციებში როგორც მათ, ისევე საქართველოს აქვს ხოლმე, ცალკეულ გადაწყვეტილებებთან ერთად, საკუთარი დღის წესრიგიდან გამომდინარე სპეციფიკური მიდგომები და გადაწყვეტილებები. ამ შემთხვევაში, თავის შეკავება მხარდაჭერის ტოლფასია.” – განაცხადა პაპუაშვილმა.
საქართველოს საგარეო საქმეთა მინისტრმა ილია დარჩიაშვილმა ტვიტერზე მადლობა გადაუხადა იმ ქვეყნებს, რომლებმაც საქართველოს ტერიტორიული მთლიანობის მხარდამჭერ რეზოლუციას დაუჭირეს მხარი.
“დიდი მადლობა საერთაშორისო საზოგადოებას საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის.” – წერს ილია დარჩიაშვილი X-ზე, თუმცა მინისტრის პოსტში არ არის ნახსენები ჩინეთი.
გაეროში სომხეთის წარმომადგენელმა მერ მარგარიანმა განმარტა სომხეთის ისტორიული პოზიცია. მისი თქმით, სომხეთი მხარს უჭერს კონფლიქტების მშვიდობიანად, საერთაშორისო წესებისა და კანონების ფარგლებში მოგვარებას და ეს ერევნის დიდი ხნის პოზიციაა.
მან ასევე დაადასტურა მხარდაჭერა ადამიანის ფუნდამენტური უფლებებისადმი, მათ შორის მათი, ვისაც კონფლიქტი შეეხო და იძულებით მოუწია საცხოვრებლის დატოვება.
მისი თქმით, სომხეთი ხაზს უსვამს საქართველოს ტერიტორიული მთლიანობის სრულ მხარდაჭერას იმ სულისკვეთებით, რაც ასახულია სტრატეგიული პარტნიორობის შეთანხმებით, რომელიც დამყარდა თბილისსა და ერევანს შორის 2024 წლის იანვარში.
“ამ კუთხით სომხეთი მხარს უჭერს სამხრეთ ოსეთსა და აფხაზეთში დევნილების დაბრუნებას საერთაშორისო ჰუმანიტარული კანონმდებლობის შესაბამისად.” – განაცხადა გაეროში სომხეთი წარმომადგენელმა.
