"ჰიბრიდული ომის ელემენტი" - პოლიტოლოგი სომხეთში სამხედრო გადატრიალების მცდელობის შესახებ
გაბრიელიანოვი სომხეთში სამხედრო გადატრიალების მცდელობის შესახებ
„რუსეთს აღარ აქვს რესურსები სომხეთთან ჰიბრიდულ ომში და ხელახლა იყენებს იმ აგენტებს, რომლებიც უკვე გამოიყენა“, – ამბობს პოლიტოლოგი რუბენ მეჰრაბიანი რუსი ჟურნალისტისა და გამომცემლის, სომხეთში პერსონა ნონ გრატად გამოცხადებული არამ გაბრიელიანოვის Facebook-ის პოსტზე კომენტირებისას.
გაბრიელიანოვმა დაწერა, რომ 2020 წლის ყარაბაღის ომში სომხეთის დამარცხების შემდეგ, იმ დროს პირადად შეხვდა გენერალური შტაბის უფროსს ონიკ გასპარიანს. საუბარში მან სამხედრო მაღალჩინოსანს უთხრა, „მოსკოვიდან სერიოზული ხალხი გთავაზობთ ჯარის ქუჩაში გაყვანას და ძალაუფლების დროებითი მთავრობისთვის გადაცემას“. გაბრიელიანოვის თქმით, სომხეთის გენერალური შტაბის უფროსმა მას უპასუხა, რომ „პირდაპირი ბრძანების“ შემთხვევაში, ის ჯარს გაიყვანს.
პოლიტოლოგ რუბენ მეჰრაბიანის თქმით, ომის დასრულებიდან თითქმის სამი წლის შემდეგ, სომხეთში პერსონა ნონ გრატად აღიარებული რუსი ჟურნალისტის განცხადება ადასტურებს, რომ „მოსკოვი დღემდე ცდილობს დაამხოს სომხეთის დღევანდელ ხელისუფლება.“
არამ გაბრიელიანოვის სკანდალური პოსტი
სომხური წარმოშობის რუსი მედიამაგნატი, News Media ჰოლდინგის დამფუძნებელი არამ გაბრიელიანოვი ფეისბუქის საკუთარ გვერდზე წერს, რომ ონიკ გასპარიანს ესაუბრა. ეს ზუსტად ის დროა, როცა გასპარიანი გენშტაბის უფროსი იყო.
„ონიკს ვუთხარი, რომ მოსკოვიდან სერიოზული ხალხი გვთავაზობს ჯარის ქუჩაში გაყვანას და ძალაუფლების დროებითი მთავრობისთვის გადაცემას. და მე ამ ყველაფერს გავუწევ საინფორმაციო მხარდაჭერას. ონიკმა მიპასუხა – პირდაპირ მოსკოვმა გასცეს ბრძანება და ჯარს გავიყვანო. მე მას ვუთხარი – პირდაპირ ბრძანებას არავინ გასცემს და მაშინ ამით გაიყაროს ჩვენი გზები, აბა თქვენ იცით-მეთი“, – წერს არამ გაბრიელანოვი.
პოსტის ბოლოს პროპაგანდისტი ასკვნის, რომ გასპარიანის სიმხდალემ შესაძლებელი გახადა “სომხეთის დახრჩობა ფაშინიანისა და მისი საზიზღარი კლანის” გასახარებლად.
კომენტარი
პოლიტოლოგი რუბენ მეჰრაბიანი მიიჩნევს, რომ გაბრიელიანოვის განცხადებებს დიდი სიფრთხილით და სერიოზულობით უნდა მოვეკიდოთ მისი „პიროვნული თვისებებიდან გამომდინარე“.
„შესაძლოა ეს მართალია, შეიძლება არა. განმარტებები თავად ონიკ გასპარიანმა უნდა გააკეთოს. მეორე მხრივ, ეჭვი არ მეპარება, რომ დიახ, მოსკოვის მიზანი იყო 2018 წელს სომხეთში ხელისუფლების შეცვლა – განურჩევლად მეთოდების და საშუალებებისა, ახლა კი ამ გზით ცდილობენ დაარტყან დღევანდელ ხელისუფლებას. ეს არის მორიგი პროვოკაცია მიმართული სომხეთის რესპუბლიკის წინააღმდეგ“, – განუცხადა მან JAMnews-ს.
მეჰრაბიანის თქმით, მოსკოვი ყველაფერს გააკეთებს „ატმოსფეროს გასაფუჭებლად“, რადგან რუსეთი შეშფოთებულია და ნერვიულობს სომხეთის პოზიციით. კერძოდ, ის ფაქტი, რომ ქვეყანამ:
- მოიწვია ევროპელი დამკვირვებლები აზერბაიჯანთან საზღვრის მონიტორინგისთვის;
- აწარმოებს მოლაპარაკებებს ბაქოსთან აშშ-ში;
- მონაწილეობს სამმხრივ ფორმატებში რუსების გარეშე;
- აკეთებს კრიტიკულ განცხადებებს რუსული სამხედრო ბლოკის, კოლექტიური უსაფრთხოების ორგანიზაციის წინააღმდეგ და დე ფაქტო ყინავს მასში მონაწილეობას;
- განიხილავს რომის სტატუტის რატიფიცირების საკითხს.
პოლიტოლოგის თქმით, მსგავსი განცხადებების მიზანია სომხეთში რუსული „პათეტიკური ყოფნის“ რაც შეიძლება დიდხანს შენარჩუნება და გაფართოება.
„და ეს განხორციელდება მხოლოდ სომხური სახელმწიფოებრიობის დაშლის გზით. სწორედ ამისკენ არის მიმართული ჰიბრიდული ომი, რომელსაც რუსეთი მრავალი წელია აწარმოებს სომხეთის წინააღმდეგ. და ასე იქნება მანამ, სანამ რუსეთი არ დათმობს თავის იმპერიულ მიზნებს“, – ხაზგასმით აღნიშნა მან.
რეგიონში რუსეთის როლის კომენტირებისას მან გაიხსენა, რომ სომხეთის პარლამენტში შეიქმნა კომისია, რომელიც შეისწავლის ყარაბაღის მეორე ომის გარემოებებს. კომისიამ ჩვენების მისაცემად მოიწვია მაღალი რანგის სამხედრო ოფიცრები, მათ შორის ონიკ გასპარიანი. სომხეთის პრემიერ მინისტრმა ნიკოლ ფაშინიანმა ასევე ჩვენება მისცა პირდაპირ ეთერში:
„ეს ყველაფერი ძალიან შემაშფოთებელია რუსეთისთვის, რადგან, ეჭვი არ მეპარება, რომ აქ გამოვლინდება რუსეთის მნიშვნელოვანი როლი 44-დღიანი ომის გაჩაღებასა და შემდგომ მსვლელობაში. და ეს არის ერთ-ერთი მიზეზი იმისა, რის გამოც მოსკოვი მსგავსი განცხადებებით ცდილობს სომხეთის გახლეჩას“.
