Fox News: ქართველი დემონსტრანტები პროტესტს აგრძელებენ და ირანს ყურადღებით აკვირდებიან

Fox News საქართველოზე

ამერიკული გამოცემა Fox News საქართველოში მიმდინარე საპროტესტო აქციებზე სტატიას აქვეყნებს სათაურით: “ქართველი დემონსტრანტები პროტესტს აგრძელებენ და ირანს ყურადღებით აკვირდებიან“.

გამოცემა წერს, რომ ჩვეულებრივი ქართველები, რომლებიც ცივ ამინდებსა და ხელისუფლების მხრიდან ძალადობის ბრალდებებს კვლავაც უძლებენ, ირანში დემოკრატიისთვის მებრძოლებს აკვირდებიან და საკუთარ ბრძოლას ხედავენ, როგორც კორუმპირებული და არაპოპულარული რეჟიმის წინააღმდეგ მიმდინარე პროცესს.

Fox News-ის შეფასებით, საქართველოში საპროტესტო გამოსვლები 2024 წლიდან სხვადასხვა ინტენსივობით ყოველდღიურად გრძელდება. სტატიაში აღნიშნულია, რომ აქციების დაწყებას წინ უძღოდა სადაო არჩევნები და შემდეგ პრემიერ-მინისტრ ირაკლი კობახიძის გადაწყვეტილება, დროებით შეეჩერებინა საქართველოს ევროკავშირში გაწევრიანების პროცესი – ნაბიჯი, რომელმაც საზოგადოების ფართო ნაწილის უკმაყოფილება გამოიწვია.

მოსაზრება: მსოფლიოში დიქტატორულ რეჟიმებთან დაკავშირებით ვითარება მკვეთრად შეცვლილია და ეს უნდა ახსოვდეს ივანიშვილის რეჟიმს

სანდრო ბარამიძე: საზოგადოებაში არსებობს ფართო კონსენსუსი იმის თაობაზე, რომ ივანიშვილის რეჟიმი ყოველგვარ სამართლებრივ ჩარჩოს გასცდა

გამოცემა ყურადღებას ამახვილებს იმ კონტექსტზეც, რომელშიც პროტესტი ვითარდება. Fox News წერს, რომ 2024 წლიდან ირანსა და საქართველოს ხელისუფლებებს შორის ურთიერთობები შესამჩნევად დაახლოვდა, რაც დამატებით კითხვებს აჩენს ქვეყნის საგარეო კურსის შესახებ.

სტატიაში ხაზგასმულია, რომ “ქართული ოცნების“ ხელისუფლებას ირანში მიმდინარე პროდემოკრატიული გამოსვლების მიმართ საჯაროდ მხარდაჭერა არ გამოუხატავს და არც უსაფრთხოების ძალების მიერ მოქალაქეების წინააღმდეგ ჩადენილი ადამიანის უფლებების დარღვევები დაუგმია.

Fox News-ის შეფასებით, სწორედ ეს გარემოებები ქმნის ფონს, რომელშიც ქართველი დემონსტრანტები ირანში მიმდინარე პროცესებს არა როგორც შორეულ მოვლენას, არამედ როგორც საკუთარი პოლიტიკური ბრძოლის პარალელს აკვირდებიან: ბრძოლას ხელისუფლების წინააღმდეგ, რომელსაც საზოგადოების ნაწილი ავტორიტარული ტენდენციების მატარებლად აღიქვამს.