ფიზიკური დაპირისპირება პარლამენტში - ჟურნალისტებმა და ოპოზიციამ პლენარული სხდომა ჩაშალეს

პარლამენტის სხდომათა დარბაზში ფიზიკური დაპირისპირება მას შემდეგ დაიწყო, რაც მთავრობის გადადგომის მოთხოვნით შეკრებილი მედიამენეჯერების ნაწილი პარლამენტის შენობაში შევიდა.

მათი თქმით, ისინი მმართველი პარტიის წევრებისთვის რამდენიმე კითხვის დასმას აპირებდნენ.

ჟურნალისტებმა გუშინ ფართომასშტაბიან საპროტესტო აქციაზე მთავრობის გადადგომის მოთხოვნა წამოაყენეს და ხელისუფლებას დღეს 12 საათამდე დრო მისცეს.

საპარლამენტო დაცვის და მანდატურების წინააღმდეგობის მიუხედავად პროტესტის მონაწილე ჟურნალისტების ნაწილმა პარლამენტის შენობაში შესვლა მოახერხა. მათთვის საშვები ოპოზიციონერმა დეპუტატებმა დაუშვეს.

პარლამენტის ყოფილ თავმჯდომარეს, ირაკლი კობახიძეს, მანდატურის სამსახურთან ერთად, პირადი დაცვაც იცავს. მან აღნიშნა, რომ “ნაცებმა დაუყოვნებლივ უნდა დატოვონ პარლამენტი”.

პარლამენტის თავმჯდომარის სავარძელთან გადმოფენილია ევროკავშირის და საქართველოს დროშა. სავარძელი დაკავებული აქვთ ოპოზიციის ლიდერებს, მათ შორის ხატია დეკანოიძე, თინა ბოკუჩავა, ანა ნაცვლიშვილი,ხათუნა სამნიძე, ანა წითლიძე და თაკო ჩარკვიანი. ისინი ამბობენ, რომ პარლამენტის თავმჯდომარეს სხდომის დაწყების საშუალებას არ მისცემენ.

შენობის შესასვლელში დაპირისპირების დროს დაშავდა ვატო წერეთელი, ოპოზიციური არხის, “ტვ პირველის” დამფუძნებელი.

პარლამენტში დღეს რიგგარეშე სხდომა უნდა ჩატარებულიყო, თუმცა იგი ჩაიშალა.

პარლამენტის ფოიეში ჟურნალისტებსა და დაცვის თანამშრომლებს შორის ვითარება დაძაბულია.

_________________________________________________

● “ანტიეკლესიური ძალების მიერ დაგეგმილი შეთქმულება ვერ შედგა” – ღარიბაშვილი გადადგომას არ აპირებს
● “პრემიერი უნდა გადადგეს” – აქცია საქართველოს პარლამენტთან
● რატომ ვერ ჩატარდა ღირსების მარში – რა აჩვენა ამ დღემ?
● ნადირობა მედიაზე. პრაიდის საწინააღმდეგო აქციაზე ოცზე მეტი რეპორტიორი მძიმედ დაშავდა
● ჰომოფობების ცეკვა პარლამენტთან. ფოტორეპორტაჟი

____________________________________________________

ვითარება საქართველოში ტელეკომპანია „პირველის“ ოპერატორის, ლექსო ლაშქარავას გარდაცვალების შემდეგ გამწვავდა. ლაშქარავა, რომელიც 5 ივლისს ულტრა-მემარჯვენე ჰომოფობიურმა ჯგუფებმა სამსახურებრივი მოვალეობის შესრულების დროს სასტიკად სცემეს, 11 ივლისს გარდაიცვალა. ჟურნალისტები, ოპოზიცია, არასამთავრობო ორგანიზაციები და სამოქალაქო საზოგადოება მომხდარში ხელისუფლებას ადანაშაულებს, ვინაიდან ხელისუფლებამ ვერ მოახერხა 5 ივლისს მშვიდობიანი მომიტინგეების დაცვა მოძალადეებისგან.

5 ივლისს, თბილისში, Tbilisi Pride-ის კვირეულის ფარგლებში “ღირსების მარში” უნდა გამართულიყო. სწორედ ამ ღონისძიების ჩასაშლელად, საპატრიარქოს მოწოდების შემდეგ, გამოვიდნენ 5 ივლისს ჰომოფობიურად განწყობილი ჯგუფები.

დამკვირვებლების თქმით, მიუხედავად იმისა, რომ ქალაქში უკვე დილიდან დათარეშობდნენ რადიკალები, ხელისუფლებამ არასაკმარისი რაოდენობის სამართალდამცავი გამოიყვანა ქუჩაში, რათა მოქალაქეების უსაფრთხოება დაეცვა.

5 ივლისს მარში არ ჩატარდა, ლგბტქ თემის წარმომადგენლები ქუჩაში არ გამოსულან, თუმცა ჰომოფობები მაინც არ დაშლილან – მიზანმიმართულად დასდევდნენ ჟურნალისტებს და ფიზიკურად უსწორდებოდნენ. 5 და 6 ივლისს თბილისში 53 ჟურნალისტი დაშავდა.

ექსპერტების აზრით, ჰომოფობიური ჯგუფების ქმედებები ასევე წაახალისა 5 ივლისს დილით, პრემიერ ღარიბაშვილის მიერ გაკეთებულმა განცხადებამ. ღარიბაშვილმა ვითარების შესაძლო გართულებაზე პასუხისმგებლობა დააკისრა არა ძალადობრივი აქციის წევრებს, არამედ “ღირსების მარშის“” ორგანიზატორებს და მოუწოდა მათ, არ ჩაეტარებინათ მსვლელობა რუსთაველის გამზირზე. ღარიბაშვილმა განაცხადა, რომ დაგეგმილი “ღირსების მარში” მისთვის “მიზანშეუწონელი” და საფრთხის შემცველი იყო. ასევე მან თქვა, რომ ღირსების მარშის მიღმა ოპოზიცია დგას.  

“ღირსების მარში” გაუქმდა, თუმცა, რუსთაველის გამზირზე ძალადობა კიდევ რამდენიმე საათს გაგრძელდა.