ბოლო ერთ წელში თბილისში უძრავი ქონება 14.3 პროცენტით გაძვირდა. ფასები უბნების მიხედვით
ფასები უბნების მიხედვით
საქართველოს სტატისტიკის ეროვნული სამსახურის ინფორმაციით, ბოლო ერთ წელში თბილისში უძრავი ქონება 14.3 პროცენტით გაძვირდა. გასული წლის ანალოგიურ პერიოდთან შედარებით, კერძო სახლების ფასები 18.0 პროცენტით, ბინების კი – 12.5 პროცენტით გაიზარდა.
დედაქალაქის ყველაზე ძვირადღირებულ საცხოვრებელ უბნებად კვლავ მთაწმინდა, ვაკე და საბურთალო რჩება, ყველაზე იაფად ბინების შეძენა გლდანში, ისანსა და სამგორშია შესაძლებელი.
რაც შეეხება კერძო სახლებს, ყველაზე ძვირად საცხოვრებელი ფართის შეძენა მთაწმინდაზე, დიდუბესა და ვაკეშია შესაძლებელი, ყველაზე იაფად – ნაძალადევში, სამგორსა და გლდანში.
● როგორ აისახა უკრაინის ომი საქართველოს უძრავი ქონების ბაზარზე
● „თუ საზღვარს ჩაკეტავენ, ერთადერთი გზა დარჩება – გზა ომში“ . რუსეთიდან გამოქცეულების ისტორიები
● “მალე საქართველოს მოსახლეობის 10 პროცენტი რუსი იქნება”. ვითარება ლარსზე – ხელისუფლების და ოპოზიციის რეაქცია
რუსეთ -უკრაინის ომმა საქართველოში მკვეთრად შეცვალა მდგომარეობა უძრავი ქონების ბაზარზე. ამერიკული გამოცემა CNBC წერს, რომ მაშინ, როცა ბევრი ეკონომიკა რუსეთის მიერ უკრაინაში შეჭრის გავლენით ზარალდება, რამდენიმე ქვეყანა რუსი მიგრანტების ნაკადით სარგებლობს და მათ შორისაა საქართველო.
გამოცემის ცნობით, სომხეთთან და თურქეთთან ერთად, საქართველო ერთ-ერთი ქვეყანაა, სადაც არეულობის ფონზე, მიგრანტებმა ეკონომიკური ბუმი გამოიწვიეს.
რუსეთის და ბელარუსის ათასობით მოქალაქის შემოსვლამ განსაკუთრებით ბინის ქირის ფასი გაზარდა – გასული წლის ამ პერიოდთან შედარებით ქირა 210 პროცენტითაა მომატებული. გაძვირებულია გასაყიდი ფასიც.
უკრაინაში ომის დაწყებიდან დღემდე საქართველოში 1 მილიონ 45 ათას 614 რუსეთის მოქალაქე შემოვიდა. მხოლოდ სექტემბერში, მას შემდეგ რაც პუტინმა მობილიზაცია გამოაცხადა, საქართველოში 222 ათას 274 რუსი შემოვიდა.
IDFI-ს მონაცემებით, უკრაინაში რუსეთის შეჭრის დღიდან 31 აგვისტომდე საქართველოს კომერციულ ბანკებში ახალი ანგარიშები გახსნა რუსეთის 45 349-მა მოქალაქემ. როგორც ორგანიზაციაში განმარტავენ, ამ რაოდენობით ანგარიშების გახსნა მიუთითებს, რომ ეს რუსეთის მოქალაქეთა მიგრაციაა და არა უბრალოდ ტურისტულად მოგზაურობა საქართველოში. მონაცემები არასამთავრობო ორგანიზაციამ ეროვნული ბანკისგან გამოითხოვა.
