ევროსასამართლომ ნიკა მელიას საქმეზე სარჩელი წარმოებაში მიიღო

“ერთიანი ნაციონალური მოძრაობის” თავმჯდომარის, ნიკა მელიას დაპატიმრების საქმეზე, ადამიანის უფლებათა ევროპულმა სასამართლომ სარჩელი წარმოებაში მიიღო.

სტრასბურგში სარჩელი პირველ მარტს დარეგისტრირდა, 21 აპრილს კი ევროსასამართლომ საქართველოს მთავრობას კითხვები გამოუგზავნა – სტრასბურგის სასამართლო ხელისუფლებას ეკითხება, რამდენად ლეგიტიმური საფუძველი ჰქონდა ნიკა მელიას დაპატიმრებას.

მელიას ადვოკატის, დიტო საძაგლიშვილის თქმით, ამ კონტექსტში სასამართლო ახსენებს ისეთ საქმეებს, როგორიცაა: “ტიმოშენკო უკრაინის წინააღმდეგ” და “ნავალნი რუსეთის წინააღმდეგ”.

“მნიშვნელოვანია, რომ ადამიანის უფლებათა ევროპულმა სასამართლომ ხელისუფლებას კითხვები დაუსვა მე-18 მუხლის შესაძლო დარღვევასთან დაკავშირებით. ეს მუხლი გულისხმობს მართლმსაჯულების გამოყენებას არალეგიტიმური მიზნებისთვის. როგორც წესი, პოლიტიკური პატიმრობის და დევნის საქმეებში სწორედ ამ მუხლის დარღვევის განხილვა დგას დღის წესრიგში”, – განაცხადა საძაგლიშვილმა”, – აღნიშნა საძაგლიშვილმა.

მელიას კიდევ ერთმა ადვოკატმა, გიორგი კონდახიშვილმა განაცხადა, რომ სასამართლო სავარაუდოდ დაადგენს, რომ ნიკა მელიას მიმართ მართლმსაჯულების გამოყენება პოლიტიკური მიზნებით იყო განპირობებული:

“ნიკა მელიას საქმეში ხელის გულზე დევს ის, რომ იგი არის უკანონო პოლიტიკური დევნის მსხვერპლი, ხელისუფლება ცდილობს სისხლისსამართლებრივი დევნის ინსტრუმენტად გამოყენებით მის პოლიტიკურ განეიტრალებას და ამიტომაც არის პარალელის გავლება ასეთ რეზონანსულ საქმეებთან.”

_____________________________

● ნიკა მელიამ საპატიმრო დატოვა – მას გირაო ევროკავშირმა გადაუხადა. პირველი კომენტარები
● გიორგი რურუა პრეზიდენტმა შეიწყალა. მან ციხე უკვე დატოვა
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა

_________________________________

ნიკა მელიას საქმე

ნიკა მელია რუსთავის ციხიდან 10 მაისს მას შემდეგ გათავისუფლდა, რაც ევროკავშირმა მას გირაოს თანხა, 40 000 ლარი გადაუხადა.

ევროკავშირის მიერ გირაოს გადახდის საკითხი დღის წესრიგში მას შემდეგ დადგა, რაც ევროპული საბჭოს პრეზიდენტის, შარლ მიშელის 19 აპრილის დოკუმენტს ხელისუფლებამ და ოპოზიციონერი პოლიტიკოსების ნაწილმა ხელი მოაწერა. 

ნიკა მელიამ 26 აპრილს მიმართვა გაავრცელა და მზადყოფნა გამოთქვა, დასთანხმდეს ევროკავშირის მიერ შემოთავაზებულ გირაოს იმ შემთხვევაში, თუ 2019 წლის 19-21 ივნისის მოვლენების ამნისტიის კანონის მიღება დღის წესრიგიდან მოიხსნება. 

პარლამენტში ამჯერად ორი ამნისტიის კანონპროექტია დაინიცირებული, რომელიც შარლ მიშელის შეთანხმების ნაწილია. კანონპროექტი უკვე დააინიცირა ცალკე ხელისუფლებამ და ცალკე ოპოზიციამ. 

ნიკა მელიას ბრალად ედება 2019 წლის 20 ივნისს, რუსი დეპუტატის, სერგეი გავრილვის საქართველოში ვიზიტის გამო პარლამენტის წინ გამართულ აქციაზე ჯგუფური ძალადობის ხელმძღვანელობა და მასში მონაწილეობა.

2019 წელს სასამართლომ მელია არ დააკავა. ის 30 ათასი ლარი გირაოს გადახდის შემდეგ გაათავისუფლეს და ხელზე ელექტრონული სამაჯური გაუკეთეს, რომლის ტარების ვალდებულება ჰქონდა, რათა სამართალდამცავებს სცოდნოდათ თუ სად გადაადგილდებოდა იგი.

2020 წლის ნოემბერში, აქციაზე, რომელზეც ოპოზიცია საპარლამენტო არჩევნების შედეგებს აპროტესტებდა, მელიამ დემონსტრაციულად, პროტესტის ნიშნად მოიხსნა სამაჯური და მას უსამართლობის სიმბოლო უწოდა.

საპასუხოდ ოპოზიციონერს გირაოს თანხა კიდევ 40 ათასი ლარით გაუზარდეს, რომლის გადახდაზეც მან უარი თქვა. სწორედ გირაოს გადაუხდელობა გახდა ოფიციალური მიზეზი, რის გამოც ნიკა მელიას დაკავების შესახებ სასამართლომ გადაწყვეტილება მიიღო. მანამდე პარლამენტმა მას დეპუტატის უფლებამოსილება შეუჩერა.

არასამთავრობო ორგანიზაციები, ასევე სახალხო დამცველი და საქართველოს საერთშორისო პარტნიორები მუდმივად მიუთითებდნენ საქმეში არსებულ სამართლებრივ პრობლემებზე და საქმეს პოლიტიკურად მოტივირებულად მიიჩნევდნენ.

ნიკა მელიას დაკავების შემდეგ, საქართველოში კიდევ უფრო გამწვავდა პოლიტიკური კრიზისი. პოლიტიკური ჩიხიდან გამოსავლის პოვნა ვერ შეძლეს ვერც ევროკავშირის მაღალჩინოსნებმა – საქართველოში ევროსაბჭოს პრეზიდენტი შარლ მიშელი იყო ჩამოსული, ასევე ბრიუსელში იყო მიწვეული ვითარების განსახილველად პრემიერი ღარიბაშვილი. ყველა შეხვედრა და რაუნდი უშედეგო აღმოჩნდა.

საქართველოში ჩამოვიდა მიშელის სპეციალური წარმომადგენელი კრისტიან დანიელსონიც, თუმცა მისი 5-დღიანი ვიზიტი ჩავარდა – ხელისუფლებამ და ოპოზიციამ შეთანხმებას ვერ მიაღწიეს.

დანიელსონი საქართველოში მეორეჯერაც ჩამოვიდა, თუმცა მოლაპარაკება ამჯერადაც უშედეგო აღმოჩნდა.

საბოლოოდ, ჩიხიდან გამოსავალი ისევ ევროპული საბჭოს პრეზიდენტმა, შარლ მიშელმა იპოვა – ამნისტია ან გირაო, რომელსაც ნიკა მელიას თავად ევროკავშირი გადაუხდიდა.

ასევე, დოკუმენტზე ხელმოწერიდან რამდენიმე დღეში, პრეზიდენტ სალომე ზურაბიშვილის შეწყალებით ციხე დატოვა “მთავარი არხის” მეწილემ, გიორგი რურუამ.