ევროპის ადამიანის უფლებათა სასამართლომ აზერბაიჯანი შვიდ საქმეზე, საერთო ჯამში, 56 300 ევროთი დააჯარიმა. ეს ერთ თვეზე უფრო ნაკლებ დროში მოხდა მას შემდეგ, რაც ევროპის ადამიანის უფლებათა სასამართლომ ქვეყანას, დაახლოებით, 300 ათასი ევროს ოდენობის ჯარიმა დააკისრა.
2021 წლის 11 მარტს, ევროპის ადამიანის უფლებათა სასამართლომ აზერბაიჯანიდან შესულ შვიდ სარჩელზე გამოაქვეყნა გადაწყვეტილება.
ვუგარ ალიევი აზერბაიჯანის წინააღმდეგ
პოლიტიკურმა აქტივისტმა ვუგარ ალიევმა აზერბაიჯანის ხელისუფლება უკანონო ბრალდებებსა და დაკავებაში დაადანაშაულა. ადგილობრივმა სასამართლომ ალიევი დამნაშავედ ცნო იარაღის უკანონო შენახვაში და თავისუფლების აღკვეთა შეუფარდა.
ამ საქმის განხილვის დროს, აზერბაიჯანის ხელისუფლებამ მოსარჩელეს 6 ათასი ევროს ჯარიმის გადახდა შესთავაზა. მხარეები ამ პირობებზე შეთანხმდნენ.
ხელისუფლება მოსარჩელეებს ფულს სთავაზობს
კიდევ სამი მოსარჩელე დათანხმდა აზერბაიჯანის ხელისუფლების მიერ მათთვის ჯარიმის გადახდის შეთავაზებას, წერს ევროპის ადამიანის უფლებათა სასამართლო.
საბზალიევი 10 თვით დააპატიმრეს საიდ ნურსის სწავლების ქადაგების გამო. მან რელიგიური თავისუფლების დარღვევა გაასაჩივრა. ამ სარჩელის გამო, მას 4500 ევროს ოდენობის ჯარიმას გადაუხდიან.
ნატიკ მირზოევი სასჯელაღსრულების დაწესებულებაში უხარისხო სამედიცინო დახმარების გამო ჩიოდა. ხელისუფლებამ მირზოევს 1500-ევროიანი კომპენსაცია შესთავაზა, რასაც მოსარჩელე დათანხმდა.
დურნისა აჰმედოვა, რომელიც აზერბაიჯანში ხულიგნობის ბრალდებით გაასამართლეს, მორალური ზიანის სანაცვლოდ კომპენსაციის სახით 3000 ევროს მიიღებს.
ათ მოსარჩელეს 3750 ევრო
საქმეზე რზამოვი და კიდევ 9 ადამიანი აზერბაიჯანის წინააღმდეგ, ასევე დააფიქსირეს მეგობრული ურთიერთგაგება მოპასუხესა და მოსარჩელეს შორის. აზერბაიჯანის ხელისუფლება თითოეულ მათგანს 3750 ევროს (ჯარიმის საერთო მოცულობა ამ საქმეზე – 37500 ევრო) გადაუხდის მორალური ზიანის გამო.
ისინი ყველანი ასევე თურქი მქადაგებლის, საიდ ნურსის სწავლების მიმდევრები არიან და რელიგიური შეკრების დროს დააპატიმრეს. მოსარჩელეებმა ხელისუფლება არასათანადო მოპყრობაში, რელიგიური აღმსარებლობის უფლებისა და ხელშეუხებლობის დარღვევაში დაადანაშაულეს.
ერთი საქმე შეჩერდა
აზერბაიჯანის წინააღმდეგ იმანზადე მამედოვას საქმის წარმოება მოსარჩელის გარდაცვალების გამო შეწყდა.
ქალი „იეღოვას მოწმე“ იყო და ხელისუფლება რელიგიური თავისუფლების დარღვევასა და, ასევე, საკუთრების უფლებაში ჩარევაში დაადანაშაულა.
3800 ევრო საკუთრების უფლების დარღვევისთვის
ევროპის ადამიანის უფლებათა სასამართლოში საქმის, აკმამედ მამედოვი აზერბაიჯანის წინააღმდეგ, განხილვისას, ქვეყნის ხელისუფლებამ მოსარჩელეს 3800 ევროს ოდენობის კომპენსაციის გადახდა შესთავაზა მიყენებული მორალური ზიანისთვის.
მამედოვი ხელისუფლებას საკუთრების უფლების დარღვევაში ადანაშაულებდა.
