"დავბრმავდით და დავყრუვდით? რას ელოდებით?" - ევროპარლამენტში დებატებზე "ოცნების“ დასანქცირება მოითხოვეს
ევროპარლამენტში “ოცნების“ დასანქცირება მოითხოვეს
ევროპარლამენტში დებატებზე საქართველოში მიმდინარე საპროტესტო აქციების შესახებ მოსმენა გაიმართა, სადაც ევროპარლამენტარებმა მოითხოვეს მკაცრი ზომების გატარება “ქართული ოცნების“ წარმომადგენლების მიმართ.
განსხვავებული პოზიცია ჰქონდათ ევროსკეპტიკოს და პრორუს დეპუტატებს “ქართული ოცნების“ თანამოაზრე ჯგუფებიდან. მარინ ლე პენის პარტიის წევრმა, ტიერი მარიანმა განაცხადა, რომ საქართველოსა და რუმინეთში “ვხედავთ” ევროკავშირის მხრიდან ხალხის არჩევანის უარყოფას, ხოლო იტალიელმა პრორუსმა დეპუტატმა, დანილო დელა ვალემ მოუწოდა ევროპარლამენტს, რომ აღიარონ ის, რომ ქართველები ხმას იმის მიხედვით არ აძლევენ, რა სურთ კალასსა და ფონ დერ ლაიენს.
პლენარულ სესიაზე მოუსმინეს ევროკომისარს ხმელთაშუა ზღვის რეგიონის საკითხებში, დუბრავკა შუიცას. მან ისაუბრა პროტესტზე, რომელიც მოჰყვა ირაკლი კობახიძის განცხადებას იმის შესახებ, რომ 2028 წლამდე გაწევრიანების მოლაპარაკებების გახსნას არ ესწრაფვის. მისი თქმით, ეს ნაბიჯი აშკარა ცვლილებაა საქართველოს წინა მთავრობების პოლიტიკისა და მოსახლეობის დიდი უმრავლესობის მისწრაფებებისგან. ასევე, პირველად ვხედავთ ქვეყანას, რომელიც კანდიდატის სტატუსის მინიჭებიდან მყისიერად და შესამჩნევად შორდება ევროპულ გზას. საქართველოში ვითარება სულ უფრო უარესდება.
ევროპარლამენტარების კომენტარები
რაინიე ვან ლანშოტი, ნიდერლანდელი ევროპარლამენტარი: “ქართული ოცნება“ რუსულ კოშმარად გადაიქცა – ამ კოშმარის ლიდერებმა ხალხის ხმა მოიპარეს არჩევნებით, რომელიც არც თავისუფალი და არც სამართლიანი ყოფილა და ევროკავშირისკენ გზის გადაკეტვით ხალხს იმედი მოპარეს. ისინი არალეგიტიმურები და არაკონსტიტუციურები არიან, მაგრამ ნიღბები ჩამოხსნილია და მათ ნამდვილი სახე აჩვენეს. სახე, რომელიც ქართველმა ხალხმა კარგად იცის, რუსული ჩაგვრის სახე.
მოსახლეობის 7% ყოველდღიურად საპროტესტო აქციებზე გამოდის. გასულ ხუთშაბათს ამ აქციების მონაწილეებთან ერთად გავიარე და ისინი ახალ არჩევნებს ითხოვენ. ერთი წლის წინ საქართველომ ევროკავშირის კანდიდატის სტატუსი მოიპოვა არა მისი ხელისუფლების, არამედ ხალხის გამო და ეს ხალხი დღეს ჩვენგან მოქმედებას ელის, მაშ როგორ დავეხმაროთ მათ?! სანქციები დავუწესოთ „ქართული ოცნების“ ლიდერებს, მათ მხოლოდ საკუთარი სიმდიდრე აინტერესებთ, დავაფინანსოთ დამოუკიდებელი მედია და დემოკრატიის სხვა დამცველები, მხარი დავუჭიროთ სალომე ზურაბიშვილს, საქართველოს ერთადერთ ლეგიტიმურ პრეზიდენტს, რომელიც 29 დეკემბრის შემდეგაც ლეგიტიმური იქნება. როგორც ერთმა დემონსტრანტმა მითხრა, საქართველოს ნამდვილი ოცნება ევროპულია.“
რასა იუკნევიჩიენე, ლიეტუველი ევროპარლამენტარი: “საქართველოს პრეზიდენტი, სალომე ზურაბიშვილი – ევროპული საქართველოს ლიდერი ახლა სტრასბურგში მოემგზავრება, რათა ევროკავშირის დემოკრატიის გულში მოგვმართოს. არის რაიმე იმედი? ამ კითხვას ლიეტუვაში საქართველოს შესახებ ყველაზე ხშირად სვამენ. დიახ, იმედი არსებობს. წინა კვირას, როდესაც თბილისში ვიყავი უამრავი ადამიანი ვნახე ევროკავშირის დროშებით. არა მარტო თბილისში, არამედ მთელი საქართველოს მასშტაბით, მათ შორის პატარა სოფლებში. 500-მდე დაკავებული, ასობით ნაცემი, მათ შორის ჟურნალისტები, მაგრამ დემონსტრაციებზე სულ უფრო მეტი ადამიანი მიდის.
საქართველო ნათელი მაგალითი ხდება იმისა, თუ როგორ შეუძლია რუსეთის გავლენას დემოკრატიული სისტემა ავტორიტარულ რეჟიმად ომის გარეშე გარდაქმნას. მაგრამ, საქართველო კანდიდატი ქვეყანაა და ევროკავშირის ინსტიტუტები განზე ვერ გადგებიან. ჩემი ჯგუფის პოზიცია ნათელია, რომ საპარლამენტო არჩევნები მოიპარეს და საქართველოს დასახმარებლად ახალი არჩევნების გარდა სხვა გზას ვერ ვხედავთ. ზურაბიშვილი ხალხის მიერ არჩეული ერთადერთი ლეგიტიმური პრეზიდენტია.
მოვუწოდებთ წევრ სახელმწიფოებს, დააწესონ სანქციები იმ პირების მიმართ, ვინც პასუხისმგებელნი არიან არჩევნების გაყალბებასა და მშვიდობიანი დემონსტრანტების წინააღმდეგ ძალადობაზე. მოვუწოდებთ სახელმწიფოების მეთაურებსა და მინისტრებს თბილისში ევროპული ქართული მისიით სასწრაფოდ ჩავიდნენ. მოვუწოდებ ევროკავშირს არ დაუშვას პუტინისა და მისი მარიონეტების მიერ ევროპის კონტინენტზე თავისუფლებისა და დემოკრატიის წინააღმდეგ ბრძოლაში გამარჯვება.”
მალგორჟატა გოშევსკა, პოლონელი ევროპარლამენტარი: “კვირების განმავლობაში ათასობით ქართველი ქუჩებში გადის და ქართული ოცნების პოლიტიკის წინააღმდეგ იბრძვის. იბრძვის პრორუსული პარტიის წინააღმდეგ, რომელსაც ქვეყანა რუსეთისკენ დამალვის გარეშე მიჰყავს. დაპატიმრებები, ძალადობა ევროკავშირთან ურთიერთობის გაყინვა არის ხელისუფლების პასუხი ქართული საზოგადოების მიმართ. საპროტესტო აქციების სლოგანია – გაიღვიძე საქართველო. იმავეს ვიტყოდი – გაიღვიძე ევროპა და დავდგეთ ერთად მომიტინგეების გვერდით.
ქალბატონო კალას, რას ნიშნავს, “ბევრი რამ შეიძლება მოხდეს 29 დეკემბრამდე?'” რას ელოდებით? სისხლის ღვრას, პრეზიდენტ ზურაბიშვილის დაპატიმრებას, რაც მათ პრეზიდენტ სააკაშვილს გაუკეთეს? თქვენ თქვით, რომ იმ ადამიანების სია, რომლებსაც სანქციები უნდა დაუწესდეთ, უკვე მზადაა, მაშინ გააკეთეთ ეს. უნდა ვიმოქმედოთ დალოდების გარეშე, ქართველები თავიანთი მომავლისთვის იბრძვიან და დავეხმაროთ მათ.
დუბრავკა სუიცა, ევროკომისიის ვიცეპრეზიდენტი, ხორვატია: “უკვე 3 კვირაა, საქართველოს მოქალაქეები აპროტესტებენ ქვეყნის ევროპულ მისწრაფებებს. ეს მოჰყვა ქართული ოცნების გადაწყვეტილებას, რომლის მიხედვითაც 2028 წლის ბოლომდე ევროკავშირთან მოლაპარაკებებს არ გახსნიან.
ეს არის ნაბიჯი, რომელიც ქართველი ხალხის ნებას ეწინააღმდეგება. სიტუაცია საქართველოში უარესდება, ბოლო 5 კვირის განმავლობაში რამდენიმე ათეული ადამიანი იქნა დაკავებული და 300-მა განიცადა ძალადობა. პოლიციამ დააკავა 400-ზე მეტი პირი და მათ ადმინისტრაციული წესით ედავებიან, თუმცა არავინაა დაკავებული მოძალადე ჯგუფებიდან და არც ის სამართალდამცავები, რომლებმაც ძალადობა გამოიყენეს.
ეს არ არის იზოლირებული შემთხვევები, არამედ ზოგადად აჩვენებს საქართველოს დემოკრატიულ უკუსვლას. 26 ოქტომბერს გამართული არჩევნები სერიოზული დარღვევებით წარიმართა. ასევე მანამდე მიიღეს ე.წ. გამჭვირვალობის კანონი, რომელიც ეწინააღმდეგება ევროკავშირის ნორმებსა და ფასეულობებს. ევროკავშირი იღებს ზომებს, მათ შორის, პოლიტიკური კონტაქტების შემცირება საქართველოს მთავრობასთან, ასვე ფინანსური დახმარების შეჩერება მთავრობისთვის. საქართველოს გაწევრიანების პროცესი არის შეჩერებული, სანამ საქართველოს მთავრობა არ შეცვლის თავის კურსს.
მე მოვუწოდებ ევროკავშირს, რომ იმოქმედოს მკაცრად და ის ადამიანები, ვინც პასუხისმგებელნი არიან ძალადობაზე, უნდა აგონ პასუხი, უნდა გათავისუფლდნენ დაკავებული დემონსტრანტები და აღდგეს გაწევრიანების პროცესი. ჩვენ შევთანხმდით, რომ შევაჩეროთ უვიზო რეჟიმი დიპლომატიური პასპორტების მფლობელებისთვის და ჩვენ ასევე მოვუწოდებთ, რომ დასანქცირდნენ ის ადამიანები საქართველოში, რომლებიც ჩართული არიან ადამიანის უფლებების დარღვევაში. ევროკავშირი დგას ქართველი ხალხის გვერდით მათ შორის, იმით, რომ საქართველოს მთავრობისთვის განკუთვნილი დაფინანსება, გადამისამართდება სამოქალაქო საზოგადოებაზე.”
ნატალი ლუაზო, ფრანგი ევროპარლამენტარი: “ძვირფასო კოლეგებო, დავყრუვდით და არ გვესმის, რას ამბობენ დემონსტრანტები საქართველოში უკვე ამდენი დღეა? მე გეტყვით, მე მათ შევხვდი – არჩევნები მოიპარეს, როგორც მათი მომავალი და თავისუფლება – მათი ოცნებაც მოიპარეს.
ქართული ოცნება მუდმივად იმეორებს, რომ საქართველო ევროპაა და არა რუსეთი. თუმცა ჩვენ ვხედავთ რეპრესიებს მშვიდობიანი დემონსტრანტების წინააღმდეგ, ჟურნალისტების ცემასა და ოპოზიციონერების დაპატიმრებას.
ჩვენ ვხედავთ, რომ ქვეყნის თავზე ღრუბლები იკვრება და ნუთუ არ შეგვიძლია, რომ დავეხმაროთ მათ და ხელი შევუშალოთ ოცნებას. ქალბატონი ზურაბიშვილი, რომელიც პრეზიდენტმა მეცოლამ სტრასბურგში დაპატიჟა, იბრძვის თავისი ქვეყნის დემოკრატიული მომავლისთვის. საქართველოს ადგილი ევროპული დემოკრატიების ოჯახშია და სალომე ზურაბიშვილი პლენარულ სხდომაზეც ამაზე ისაუბრებს. ჩვენ უნდა დავამტკიცოთ, რომ მათ ტყუილად არ აქვთ ჩვენი იმედი.”
