ევროკომისია განმარტავს, რას ეხება საქართველოსთვის გაგზავნილი წერილი სანქციებთან დაკავშირებით
ევროკომისიის განმარტება
ევროკომისიის პრესსპიკერი, ანიტა ჰიპერი განმარტავს, რას ეხება საქართველოსთვის გაგზავნილი წერილი სანქციებთან დაკავშირებით, რომელიც საქართველოს ხელისუფლებამ ევროკავშირის სპეციალური წარმომადგენლის, დევიდ ო’სალივანისგან წერილი მიიღო. პრესსპიკერის თქმით, წერილი სანქციების შესრულებას ეხება და მსგავსი წერილი ყველა ქვეყანამ მიიღო. წერილის შესახებ კითხვა ჰიპერს ტელეკომპანია “ფორმულას” ჟურნალისტმა დაუსვა.
“ქართული ოცნების” საგარეო საქმეთა მინისტრმა, მაკა ბოჭორიშვილმა დღეს განაცხადა, რომ მიიღო მადლობის წერილი ევროკავშირის მხრიდან, თუ რამდენად კარგად ასრულებს საქართველო თანამშრომლობით აღებულ ვალდებულებებს და რამდენად კეთილსინდისიერად ახორციელებს ყველა საქმიანობას, რომ საქართველო არ იყოს გამოყენებული სანქციების გვერდის ასავლელად.
“ნამდვილად ვადასტურებთ, რომ საქართველოს მთავრობას წერილი გავუგზავნეთ. ეს ეხება საქართველოს მიერ აღებულ ვალდებულებას, არ დაეშვა ევროკავშირის სანქციებისთვის გვერდის ავლა. ამ საკითხზე ყველა ქვეყანასთან გვქონდა კომუნიკაცია, რაც ჩვენი უფრო ფართო, გლობალური ჩართულობის ნაწილია.
საქართველოს ხელისუფლებისგან პასუხს კვლავ ველით და მათ დამატებითი ქმედებებისკენ მოვუწოდებთ, რათა დავრწმუნდეთ რომ რუსეთი არ ცდილობს, გვერდი აუაროს სანქციებს, რომლებიც ეფექტურად მუშაობს და რუსეთი სასოწარკვეთილად ცდილობს მათ გვერდი აუაროს”. – განაცხადა ანიტა ჰიპერმა.
ამასთან, ბრიტანული კვლევითი ანალიტიკური ორგანიზაცია The Foreign Policy Centre აქვეყნებს სტატიას იმის შესახებ, თუ როგორ უვლის გვერდს რუსეთი დასავლეთის მიერ დაწესებულ სანქციებს და აცხადებს, რომ საქართველო ამ ყველაფრის ცენტრშია.
სტატიის თანახმად, სანქციებმა, რომლებიც დასავლეთმა რუსეთს უკრაინაში შეჭრის შემდეგ დაუწესა და რომელსაც კრემლის ომის ბიუჯეტი უნდა შეემცირებინა, პირიქით, “სანქციების ბუშტი” წარმოქმნა – შუამავლების, ოფშორული იურისდიქციებისა და პოლიტიკურად ხელშემწყობი პირების ადაპტრებული ეკოსისტემა, რომელიც დაწესებულ შეზღუდვებს მოგებად გარდაქმნის.
“ამ სისტემის ცენტრი საქართველოზე დგას, რომელიც პასიური გვერდის ავლის ადგილიდან სტრატეგიულ ხელშემწყობად და რუსეთის სანქციებისგან თავის არიდების ქსელის მთავარ კვანძად იქცა გეოგრაფიის, ფინანსური ინფრასტრუქტურისა და პოლიტიკური მოქნილობის გამოყენებით.” – აცხადებს The Foreign Policy Centre.
“ქართული ოცნების” პარლამენტის თავმჯდომარე შალვა პაპუაშვილი The Foreign Policy Centre-ის მოკვლევის შესახებ ამბობს, რომ “მათ შეუძლიათ, დაუკავშირდნენ ბატონ ო’სალივანს (სანქციების კურატორი ევროკავშირში-რედ.)“
