საქართველოს პარლამენტის თავმჯდომარის, შალვა პაპუაშვილის თქმით, თუ საქართველო ევროკავშირის კანდიდატის სტატუსს მიიღებს, მმართველი პარტია არჩევნებზე გაძლიერებული პოზიციით გავა. ამის შესახებ მან “იმედის კვირაში” ისაუბრა.
საქართველოს, უკრაინისა და მოლდოვის ევროკავშირის წევრობის კანდიდატის სტატუსის მინიჭების საკითხზე ევროკომისიამ დასკვნა 2022 წლის 17 ივნისს მოამზადა. შედეგად, უკრაინამ და მოლდოვამ მიიღეს ევროკავშირის კანდიდატობის სტატუსი და დაეკისრათ გარკვეული ვალდებულებების შესრულება, ხოლო საქართველოს ჯერ 12 პუნქტიანი გეგმის და პირობების შესრულება დაევალა, შემდეგ კი კანდიდატობის სტატუსის მიღების შანსი ექნება.
“რა თქმა უნდა, ოპოზიცია აცნობიერებს, რომ კანდიდატის სტატუსის მონიჭების შემთხვევაში ერთი, რომ აბსოლუტურად დისკრედიტირება მოხდება მათი, როგორც ანტიევროპული ძალის და მეორე – რა თქმა უნდა, ეს გააძლიერებს ხელისუფლებას.
დეკემბერში თუ იქნება პოზიტიური გადაწყვეტილება, გვექნება უკვე განაცხადიც გაკეთებული და მონიჭებული კანდიდატის სტატუსიც. ასე რომ ყველა გეგმას, რომელიც 2020 წელს ქართულმა ოცნებამ დაისახა, შევასრულებთ და, რა თქმა უნდა, ეს გააძლიერებს საქართველოს ხელისუფლებას და 2024 წლის არჩევნებისთვის სწორედ ამ გაძლიერებული პოზიციით, ევროპული კავშირის წევრობის კანდიდატის სტატუსით გავალთ არჩევნებზე.” – განაცხადა პაპუაშვილმა.
Reuters-ი ევროკავშირის ოფიციალურ პირებზე დაყრდნობით წერს, რომ ჯერ გადაწყვეტილი არ არის, მიიღებს თუ არა საქართველო კანდიდატის სტატუსს. როგორც სააგენტო წერს, ევროკომისიის ანგარიშში, რომელიც 8 ნოემბერს გამოქვეყნდება, ევროკავშირში გაწევრიანებისთვის უკრაინის პროგრესის შეფასებაც იქნება წარმოდგენილი.
ევროკომისიის ყოველწლიური ანგარიშით შეფასდება ევროკავშირში გაწევრიანების მსურველი ქვეყნების პროგრესი, თუ რამდენად მიუახლოვდნენ ბლოკში გაწევრიანებისთვის საჭირო ეკონომიკურ, სამართლებრივ თუ სხვა კრიტერიუმებს.
გამოცემის მიხედვით, შეფასების გამოქვეყნების შემდეგ ევროკავშირის ლიდერები 14-15 დეკემბერს სამიტზე შეიკრიბებიან, სადაც მოსალოდნელი იქნება გადაწყვეტილების მიღება – დაიწყება თუ არა ევროკავშირში უკრაინის გაწევრიანების შესახებ ფორმალური მოლაპარაკებები.
აქამდე, “რადიო თავისუფლების” ევროპის ბიუროს რედაქტორმა, რიკარდ იოზვიაკმა აღნიშნა, რომ ევროკომისიის ანგარიშის გამოქვეყნებას ბრიუსელში 8 ნოემბერს განიხილავენ.
“საქართველოსთან მიმართებაში, ყველა ამბობს, რომ გადაწყვეტილების მიღება ძალიან რთულია. მოლდოვასთან და უკრაინასთან მიმართებით ყველაფერი გარკვეულია. თითქმის ყველა ქვეყანა ამბობს, რომ წევრობაზე მოლაპარაკებები უნდა დაიწყონ. საქართველოზე ამბობენ, რომ ჯერ გაურკვეველია, ვნახოთ რა მოხდება”. – აღნიშნა იოზვიაკმა.
სიტუაცია უცვლელია და შესასრულებლად დარჩენილია ორი პრიორიტეტი – დეპოლარიზაცია და დეოლიგარქიზაცია, ამის შესახებ ევროინტეგრაციის პროგრამის მენეჯერმა, ფონდ „ღია საზოგადოება საქართველოს“ წარმომადგენელმა ვანო ჩხიკვაძემ 15 სექტემბერს ისაუბრა.
დოკუმენტის თანახმად:
სრულად შესრულდა – ადამიანის უფლებათა ევროპული სასამართლოს (ECHR) გადაწყვეტილებების პროაქტიული გათვალისწინება.
მეტწილად შესრულდა – დამოუკიდებელი სახალხო დამცველის არჩევა, გენდერული თანასწორობისა და ქალთა მიმართ ძალადობის პუნქტები
ნაწილობრივ შესრულდა – სამოქალაქო საზოგადოების ჩართულობა, მოწყვლადი ჯგუფები, საარჩევნო რეფორმა, დამოუკიდებელი სასამართლო, ანტიკორუფციული ზომები, ორგანიზებული დანაშაულის წინააღმდეგ ბრძოლა, მედია
შესასრულებელია – დეოლიგარქიზაცია და დეპოლარიზაცია
ვანო ჩხიკვაძის თქმით, ამ პროცესში საბოლოო გადაწყვეტილება ეკუთვნის ევროკავშირს, რაც ნიშნავს იმას, რომ ევროკომისიის და ევროკავშირის რეკომენდაციები ბევრად უფრო მნიშვნელოვანია, ვიდრე სხვა ნებისმიერი შეფასება. ჩხიკვაძის განმარტებით, ამ პროცესში არასამთავრობო ორგანიზაციებთან ხელისუფლებას არ უთანამშრომლია.
მანამდე, 14 სექტემბერს ევროკავშირის კომისარმა სამეზობლო პოლიტიკისა და გაფართოების საკითხებში, ოლივერ ვარჰეიმ განმარტა, რომ საქართველოს მთავრობას ევროპული საბჭოს მიერ მიცემული 12 პუნქტიდან მხოლოდ 3 აქვს შესრულებული და ხაზი გაუსვა, რომ ახლა ყოველი წუთი მნიშვნელოვანია, რადგან ოქტომბერში ანგარიში მზად იქნება.
“ქართული ოცნების”თავმჯდომარე, ირაკლი კობახიძე ამტკიცებდა, რომ შეფასება 12-დან მხოლოდ 3 შესრულებული რეკომენდაციის შესახებ მანიპულაციაა. კობახიძის თქმით, თუ “მანიპულაციურ განმარტებას” გავყვებით, გამოდის, რომ უკრაინამ 7-დან მხოლოდ 2 პუნქტი შეასრულა და “საერთოდ გულგრილობა გამოუვლენია”.
