ევროკავშირის ელჩებმა ვიცეპრემიერ დავითაშვილს რუსეთთან ფრენებზე ოფიციალური დემარშით მიმართეს

ევროკავშირის ელჩების დემარში

ევროკავშირის ქვეყნების ელჩებმა ეკონომიკის მინისტრს და ამავე დროს ვიცეპრემიერ ლევან დავითაშვილს რუსეთთან ფრენებზე ოფიციალური დემარშით მიმართეს. როგორც შეხვედრის დასრულების შემდეგ ევროკავშირის ელჩმა პაველ ჰერჩინსკიმ ჟურნალისტებთან განმარტა, ამ საკითხთან დაკავშირებით მათ შეშფოთება გამოხატეს. 

ელჩის თქმით, ფრენებთან დაკავშირებით გადაწყვეტილება რუსეთმა მიიღო, თუმცა ეს მოითხოვდა თანხმობას საქართველოს ხელისუფლების მხრიდანაც. როგორც ჰერჩინსკი განმარტავს, ლევან დავითაშვილისგან მოისმინეს არგუმენტები, რომლებიც “აქამდეც მოსმენილი ჰქონდათ”.

“ეს გადაწყვეტილება ეწინააღმდეგება ევროკავშირის ქვეყნების გადაწყვეტილებას,  რომ არ განხორციელდეს ფრენები რუსეთში და თვითმფრინავებმა რუსეთიდან არ გადაიფრინონ ევროკავშირის წევრი ქვეყნების ტერიტორიაზე.

ჩვენ ასევე გამოვხატეთ ჩვენი შეშფოთება, რომ ეს გადაწყვეტილება არის ჩვენი გადაწყვეტილების წინააღმდეგ – მოვახდინოთ რუსეთის იზოლაცია და გავზარდოთ ზეწოლა რუსეთზე, რომ მან შეცვალოს მისი ქცევა.

მე გადავეცი გზავნილი, რომელიც არის შეთანხმებული ევროკავშირის 27 ქვეყანასთან, რომლითაც ჩვენ წუხილს გამოვთქვამთ საქართველოს ხელისუფლების გადაწყვეტილებასთან დაკავშირებით, რომ დათანხმდა აღედგინა ფრენები რუსეთთან.” – თქვა მან.

შეხვედრის დასრულების შემდეგ ლევან დავითაშვილმა თქვა, რომ ძირითადი თემა ფრენებს შეეხებოდა, თუმცა მათ “ზოგადად არსებული გეოპოლიტიკური ვითარება” განიხილეს.

“ვიმსჯელეთ იმაზე, რომ საქართველოს მდგომარეობა და სიტუაცია არ შეიძლება განხილული იყოს იმავე კონტექსტში, როგორც სხვა ქვეყნების მდგომარეობა. საქართველოს განსაკუთრებით რთული მდგომარეობა გააჩნია, აქვს პირდაპირი საზღვარი რუსეთის ფედერაციასთან და საქართველოს ტერიტორიების 20% არის ოკუპირებული. ასე, რომ საქართველოს კონტექსტი განსხვავდება ევროკავშირის წევრი ქვეყნების კონტექსტისგან და ამაზე ღია საუბარი იყო ევროკავშირის ქვეყნების ელჩებთან. ვფიქრობ, ბევრი ელჩისთვის ეს გასაგები და ლოგიკურია”,– ამბობს დავითაშვილი.

ამასთან, როგორც ის აცხადეს, მათ ისაუბრეს სანქციების აღსრულების საკითხზეც:

“დღეს ძირითადი საზღვარი გვაქვს ლარსით და აქ ხდება საბაჟო კონტროლი მკაცრად და ამას ყველა ხაზს უსვამს, რომ საქართველო არის სანდო და საიმედო პარტნიორი სანქციების აღსრულების ნაწილში, თუმცა სამი ახალი დაკავშირების პუნქტი გვიჩნდება – თბილისის, ქუთაისის და ბათუმის აეროპორტებში, აქ ჩვენი მხრიდან არსებობს მზა პოზიცია საბაჟო საბაჟო შესაძლებლობების ზრდის და ისევე, როგორც უმაღლეს დონეზე ხდება სანქციების აღსრულება ლარსის საბაჟო პუნქტზე, ასევე იქნება დამატებითი საბაჟო კონტროლი ამ აეროპორტებშიც. ესეც მნიშვნელოვანი ინფორმაცია, რომელიც ელჩებს გავუზიარეთ.

რა თქმა უნდა, შეიძლება გვქონდეს აზრთა სხვადასხვაობა გარკვეულ საკითხებზე, მაგრამ ხაზს ვუსვამ, რომ ჩვენი მდგომარეობა არ შეიძლება გაიგივებული იყოს ევროკავშირის წევრ ქვეყნებთან.”

აღსანიშნავია, რომ ევროკავშირის წევრმა ქვეყნებმა საქართველოს დემარში აქამდეც გამოუცხადეს – 27 თებერვალს ევროკავშირის 27-ვე წევრმა ქვეყანამ იუსტიციის მინისტრს, რატი ბრეგაძეს მიხეილ სააკაშვილის ჯანმრთელობის მდგომარეობასთან დაკავშირებით ოფიციალური დემარშით მიმართა.

გამოხმაურება

ელჩების დემარშს გამოეხმაურა პარლამენტის საგარეო ურთიერთობათა კომიტეტის თავმჯდომარე, ნიკოლოზ სამხარაძე. მისი თქმით, ევროკავშირის წევრი ქვეყნების ელჩების დემარში კარგი საშუალებაა, რომ საქართველოს მთავრობის წარმომადგენელთან რუსეთთან ფრენების აღდგენის საკითხი განიხილონ.

სამხარაძის განმარტებით, ლოგიკური იქნებოდა, ევროკავშირი რუსეთის გადაწყვეტილებებზე პასუხს რუსეთის ხელისუფლებისგან ითხოვდეს.

“ჩვენ ისედაც ვიცოდით ევროკავშირის ამ პოზიციის შესახებ და რაც შეეხება დღევანდელ დემარშს, ეს იქნება ძალიან კარგი შესაძლებლობა ჩვენი მთავრობის წარმომადგენლისთვის, რომ დაწვრილებით ავუხსნათ ევროკავშირის ელჩებს იმ პოლიტიკის შესახებ, რომელსაც საქართველო აქამდე ატარებდა და ასევე იმ გადაწყვეტილების ლოგიკის შესახებ, რომელიც რუსეთის ხელისუფლებამ მიიღო. ასევე, ცოტა უცნაურად შეიძლება ჟღერდეს, მაგრამ რუსეთის ხელისუფლების გადაწყვეტილებაზე საქართველოს ხელისუფლებისგან პასუხების მოთხოვნა შეიძლება რაღაც ლოგიკაში ჯდებოდეს, თუმცა ამ შემთხვევაში ევროკავშირი პასუხს ასევე რუსეთის ხელისუფლებისგან უნდა ითხოვდეს, თუ რატომ მიიღო მან ვიზების გაუქმების და ფრენების აკრძალვის გაუქმების გადაწყვეტილება ახლა”, – განაცხადა სამხარაძემ.

დემარშს პარლამენტის ვიცე-სპიკერი, გია ვოლსკიც ეხმაურება და ამბობს, რომ საქართველოს არც დიპლომატიური ურთიერთობა აქვს რუსეთთან და ქვეყნის დიდი ნაწილი ოკუპირებულია, “განსხვავებით ევროპული ქვეყნებისგან”, რომლებსაც დიპლომატიური ურთიერთობაც გააჩნიათ და “მასშტაბურ სავაჭრო ურთიერთობებსაც” ინარჩუნებენ

● “განხილულ უნდა იქნას სამთვიანი ვიზების დაწესება” – საქართველოს პრეზიდენტი უსაფრთხოების საბჭოს შეკრებას ითხოვს
● რუსული თვითმფრინავი თბილისის აეროპორტში დაეშვა. რა გამოხმაურება მოჰყვა ამ ფაქტს
● სენატორები შაჰინი და რიში: საქართველოს მთავრობის უკუსვლა გვაიძულებს ადმინისტრაციას ზომების მიღება ვთხოვოთ

10 მაისს რუსეთის პრეზიდენტმა ვლადიმერ პუტინმა ხელი მოაწერა საქართველოს მოქალაქეებისთვის სავიზო რეჟიმის გაუქმების შესახებ დოკუმენტს 2023 წლის 15 მაისიდან. მეორე განკარგულებით კი, პუტინმა გააუქმა რუსეთიდან საქართველოში საჰაერო მიმოსვლის აკრძალვა.

დოკუმენტის მიხედვით, გამონაკლისს წარმოადგენენ „მოქალაქეები, რომლებიც შედიან რუსეთის ფედერაციაში შრომითი საქმიანობის განსახორციელებლად ან 90 დღეზე მეტი ვადით, მათ შორის განათლების მიღების მიზნით“.

პუტინმა კიდევ ერთი განკარგულებით რუსეთის პრეზიდენტმა რუსული ავიაკომპანიებისთვის საქართველოში ფრენებზე აკრძალვა მოიხსნა.

დოკუმენტის თანახმად, რუსეთის ფედერაციის პრეზიდენტის 2019 წლის 21 ივნისის ბრძანება ძალადაკარგულად გამოცხადდა, რომელიც რუსულ ავიაკომპანიებს საქართველოსა და რუსეთს შორის ფრენას უკრძალავდა.

ამ დრომდე რუსეთთან სავიზო რეჟიმი ცალმხრივად იყო გაუქმებული. ე.წ. გავრილოვის ღამის შემდეგ კი რუსეთმა 2019 წლის ივლისიდან საქართველოსთან პირდაპირი ფრენებიც შეწყვიტა.