ენოტები მიკო და სისინა. სცენები თბილისის ზოოპარკიდან. ვიდეო

ენოტი თბილისის ზოოპარკში

მიკო ზოოპარკში ბევრი წლის წინ, ერთი თვის ასაკში მოხვდა. ტყეში იპოვეს და შეიფარეს.
მიკო და სისინა ზოოპარკში დამეგობრდნენ.

როგორ ცხოვრობს თბილისის ზოოპარკი: ყველა ვიდეო

მათი საყვარელი საქმიანობა მზეზე ნებივრობაა. ბადეს ჩამოეკიდებიან, ცხვირს და თათებს გაყოფენ და მზეს ეფიცხებიან.

ენოტები სოციალური და ფიზიკურად აქტიური ცხოველები არიან. მიკოც ასეთია. განსაკუთრებით უყვარს მომვლელებთან ურთიერთობა და ხეებზე ძრომიალი.

ამ ვიდეოში ნახავთ როგორი “წარმატებით” დაძვრება ბუთქუნა მიკო ხის ტოტებზე.

ენოტებს ერთი თავისებურება აქვთ. ჭამამდე საგულდაგულოდ რეცხავენ საკვებს. რაციონი კი საკმაოდ მდიდარი აქვთ. ჭამენ  ხილს, სიმინდს, მწერებს, მღრღნელებს, ბუნებაში ყოფნისას ხანდახან საქათმეებსაც სტუმრობენ. ენოტი მტაცებელი ცხოველია, გავრცელებულია ჩრდილოეთ ამერიკაში.  მისი სხეულის სიგრძეა დაახლოებით 75 სმ,  მისი კი ბეწვი ხშირია და ძვირფას ბეწვეულად ითვლება.

თბილისის ზოოპარკს არსებობის თითქმის ასწლიანი ისტორია აქვს.  ის 1927 წლის 10 თებერვალს, კავკასიის ცხოველთა საკლიმატიზაციო საზოგადოების ბაზაზე დაარსდა. საზოგადოება XX საუკუნის დასაწყისიდან ინახავდა ველურ ცხოველებს, თუმცა ზოოპარკის სტატუსი არ ჰქონდა.

თავდაპირველად ზოოპარკი მდინარე ვერეს ხეობაში, 70 ჰექტარზე იყო გაშენებული. წლების განმავლობაში დედაქალაქის განვითარებამ, მოგვიანებით კი 2015 წლის 13 ივნისის წყალდიდობამ, ძველი ზოოპარკის ტერიტორია მნიშვნელოვნად შეამცირა. დღესდღეობით მას 5 ჰექტარი უკავია. ზოოპარკს 1500-მდე  ბინადარი ჰყავს.  ყველა ცხოველს საკუთარი ისტორია აქვს.

ბლოგების ამ სერიით თბილისის ზოოპარკის ბინადრებს გაგაცნობთ. მოგიყვებით როგორია მათი ერთი, რუტინული დღე, როგორ ურთიერთობენ სხვა ცხოველებთან და ადამიანებთან, როგორი იცვლება მათი ქცევები ამინდის და სეზონების მიხედვით. აქ ბევრ საინტერესო ამბავს გაიგებთ.