"საფრანგეთის პრეზიდენტმა მიხედოს უკრაინას" - როგორ ეხმაურებიან მაკრონის განცხადებას არჩევნებზე საქართველოსა და დასავლეთში
ემანუელ მაკრონის განცხადება
6 იანვარს საფრანგეთის პრეზიდენტმა ემანუელ მაკრონმა საფრანგეთის ელჩების ყოველწლიურ შეხვედრაზე, საქართველოსა და სხვა პოსტსაბჭოთა ქვეყნების მიმართ რუსეთის აგრესიულ პოლიტიკაზე ისაუბრა და მაგალითად ოქტომბრის საპარლამენტო არჩევნების დესტაბილიზაცია დაასახელა.
“ბოლო წლების განმავლობაში რუსეთმა გაზარდა აგრესია და შეცვალა ამ აგრესიის ხასიათი ევროპელებისა და მსოფლიოს სხვა ნაწილების მიმართ, ჩვენ ამას ვხედავთ სომხეთში, სადაც რუსეთმა უეცრად შეცვალა თავისი მოკავშირეობა და აზერბაიჯანის მოკავშირე გახდა მხოლოდ იმიტომ, რომ სომხები მათ წინააღმდეგობას უწევდნენ, საქართველოში საარჩევნო პროცესების დესტაბილიზაციითა და ბიულეტენების ყუთებში ჩაყრით.“ – განაცხადა მაკრონმა.
მაკრონის განცხადებას გამოეხმაურა საფრანგეთის ელჩი საქართველოში და რესპუბლიკელი კონგრესმენი ჯო უილსონი, ასევე “ქართული ოცნების” პრემიერი ირაკლი კობახიძე და პარლამენტის თავმჯდომარე შალვა პაპუაშვილი.
კობახიძემ მოუწოდა მაკრონს “მიხედოს” უკრაინას, ხოლო პაპუაშვილის თქმით, ფრანგების 61% უჭერს მხარს ემანუელ მაკრონის გადადგომას.
გამოხმაურება
საქართველოში საფრანგეთის ელჩის, შერაზ გასრის თქმით, ემანუელ მაკრონი ხაზს უსვამს, რომ საქართველოში ახალი არჩევნები შეიძლება პოლიტიკური კრიზისიდან გამოსავალი იყოს. ამის შესახებ გასრი X-ზე წერს.
“ემანუელ მაკრონი დემოკრატიისა და თავისუფლებისთვის მებრძოლების მხარდაჭერას ჩვენი საგარეო პოლიტიკის პრიორიტეტად ასახელებს. ის საქართველოში დემონსტრანტებისა და სალომე ზურაბიშვილის გამბედაობას აფასებს და ხაზს უსვამს, რომ ახალი არჩევნები შეიძლება პოლიტიკური კრიზისიდან გამოსავალი იყოს.” – წერს გასრი.
რესპუბლიკელი კონგრესმენი ჯო უიოლსონი ასევე ეხმაურება საფრანგეთის პრეზიდენტ ემანუელ მაკრონს და ამბობს, რომ იგი მხარს უჭერს საქართველოში სამართლიან არჩევნებს.
მისივე თქმით, მადლობელია, რადგან მაკრონმა საქართველოში თავისუფალი და სამართლიანი არჩევნების შესახებ ქართველი ხალხისა და სალომე ზურაბიშვილის მოწოდებას მხარი დაუჭირა
“მადლობელი ვარ, რომ ემანუელ მაკრონმა მხარი დაუჭირა საქართველოში თავისუფალი და სამართლიანი არჩევნებისკენ ქართველი ხალხისა და სალომე ზურაბიშვილის მოწოდებას. მოუთმენლად ველი მის მუშაობას დონალდ ტრამპთან, რათა ეს რეალობად იქცეს!” – თქვა უილსონმა.
“ქართული ოცნების” პრემიერის, ირაკლი კობახიძის განცხადებით, [მაკრონს] ურჩევნია, მიხედოს უკრაინას, “რომელიც გაწირეს” განადგურებისთვის:
“თუ სადმე ერევა რუსეთი, როდესაც მეზობელ ქვეყნებზეა საუბარი, ის ერევა უკრაინაში და ყველას ურჩევნია, მიხედოს უკრაინას, რომელიც გაწირეს განადგურებისთვის.
საფრანგეთის პრეზიდენტმა მიხედოს უკრაინას, რომელიც გაწირეს განადგურებისთვის. მე ვსაუბრობ იმაზე, რაც არის რეალური პრობლემა. ტყუილებზე ვერ გავაკეთებ კომენტარს. კომენტარს ვაკეთებ იმ პრობლემაზე, რომელიც დგას ყველას წინაშე – ეს არის განადგურებული უკრაინა.”
საქართველოს პარლამენტის თავმჯდომარე შალვა პაპუაშვილი X-ზე საფრანგეთის ელჩის, შერაზ გასრის განცხადებას აზიარებს და წერს, რომ საფრანგეთში პოლიტიკური კრიზისიდან გამოსავალი შესაძლოა ახალი არჩევნები იყოს.
“საფრანგეთის საშინაო პოლიტიკაში ჩარევას არ ვაპირებ, მაგრამ იმის გათვალისწინებით, რომ ფრანგების 61% მხარს უჭერს პრეზიდენტ მაკრონის გადადგომას და 50%-ს სურს ეროვნული ასამბლეის დაშლა, ახალი არჩევნები შეიძლება პოლიტიკური კრიზისიდან კარგი გამოსავალი იყოს.” – ნათქვამია პაპუაშვილის პოსტში.
20 დეკემბერს ეუთო/ოდირმა საქართველოს 26 ოქტომბრის საპარლამენტო არჩევნებზე საბოლოო დასკვნა გამოაქვეყნა, რომელშიც ვკითხულობთ, რომ არჩევნები შემაშფოთებელ ფონზე მიმდინარეობდა.
● დასკვნაში საუბარია ხმის ფარულობის დარღვევისა და ამომრჩეველზე ზეწოლაზე. მათივე ცნობით, არჩევნები OSCE/ODIHR-ის მიერ გაცემული რეკომენდაციებით და სტანდარტებით არ ჩატარებულა.
● ანგარიშში ხაზგასმულია, რომ ბოლო პერიოდში მიღებულმა საკანონმდებლო ცვლილებებმა ნეგატიური გავლენა მოახდინა ძირითად თავისუფლებებსა და სამოქალაქო საზოგადოებაზე, შეამცირა საარჩევნო პროცესში ჩართული ინსტიტუტების დამოუკიდებლობა და გაზარდა ამომრჩეველზე ზეწოლა.
● მათი განმარტებით, ეს საკითხები, არჩევნების დღეს დაფიქსირებულ დარღვევებთან ერთად, გავლენას ახდენდა ამომრჩეველთა ნაწილზე, რომელთაც შეეშინდათ, რომ ხმის მიცემისას რეპრესიების მსხვერპლი გახდებოდნენ.
● ODIHR-მა ასევე აღნიშნა, რომ არჩევნების შემდეგ საჩივრები არასაკმარისად განიხილებოდა, რაც სამართლებრივი საშუალებების შეზღუდვას იწვევს, და ისიც, რომ საპროტესტო აქციების ძალადობრივი დაშლა და მასობრივი დაკავებები სერიოზულ შეშფოთებას იწვევს მშვიდობიანი შეკრების თავისუფლების საერთაშორისო ვალდებულებების დაცვის თვალსაზრისით.
● ეუთო ხაზს უსვამს, რომ საქართველოს ხელისუფლებისთვის აუცილებელია ამ პრობლემების გადაჭრა დემოკრატიული პრინციპების დასაცავად.
