ელიან თუ არა საკუთარი ქვეყნიდან გამოქცეულ რუსეთის მოქალაქეებს საქართველოში?
რუსების მიგრაცია საქართველოში
საქართველოს ხელისუფლება აცხადებს, რომ საზოგადოების ნაწილის შეშფოთება რუსეთ-უკრაინის ომის მიზეზით საქართველოში რუსეთის მოქალაქეების შესაძლო მასობრივი მიგრაციის გამო “ეთნიკური ნიშნით” დისკრიმინაციაა და ამ კამპანიას ოპოზიცია მართავს. ხელისუფლება მოქალაქეებს “დიაკმრიმინაციისთვის” სასჯელით ემუქრება. იმავდროულად, კერძო ბიზნესი რუსეთის მოქალაქეებს შეზღუდვებს უკვე თავად უწესებს.
საქართველოში რუსეთის მოქალაქეების ჩამოსვლის საინააღმდეგო კამპანიას “ნაციონალური მოძრაობა” ხელმძღთვანელობს, რომელსაც ქვეყბის ომი ჩათრევა სურს, – ამის შესახებ “ქართული ოცნების თავმჯდომარე ირაკლი კობახიძემ განაცხადა.
მან საქართველოში მყოფი რუსეთის მოქალაქეების “დისკრიმინაციის” შემთხვევებზე რეაგირება სამართალდამცავებს დაავალა და “ეთნიკური შუღლის” გაღვივების წინააღმდეგ კანონის გამკაცრება დააანონსა.
“საქართველო არის ერთადერთი ქვეყანა, სადაც წამოწყებულია მასშტაბური კამპანია რუსი ეროვნების მოქალაქეების ეთნიკური ნიშნით დისკრიმინაციის შესახებ. ეთნიკური ნიშნით ადამიანების დისკრიმინაცია არის გაუგონარი მოვლენა ცივილიზებული სამყაროსთვის” – განაცხადა ირაკლი კობახიძემ .
მისი თქმით, საქართველოში მოქმედებს “ომის პარტია”, რომლის ერთადერთი მიზანია,საქართველო ჩართოს სამხედრო კონფლიქტში. და ამ პარტიის უკან ოპოზიციური “ერთიანი ნაციონალური მოძრაობა” დგას.
“ომის პარტიის განზრახვის მორიგი გამოვლინებაა ახალი კამპანია, რომელიც მათ საქართველოში მყოფი რუსი ეროვნების მოქალაქეების წინააღმდეგ წამოიწყეს”, – თქვა კობახიძემ.
“ამჟამად, უკვე ფიქსირდება შემთხვევები, როდესაც კერძო კომპანიები რუსი ეროვნების მოქალაქეებს მომსახურებაზე უარს ეუბნებიან, ან მომსახურების მისაღებად დისკრიმინაციულ დათქმებს უწესებენ. არის სერიოზული საფრთხე იმისა, რომ ამგვარმა მიდგომამ უფრო ფართო ტენდენციაც შეიძინოს და რუსი ეროვნების მოქალაქეების ფიზიკურ შეურაცხყოფაშიც გადაიზარდოს. მოვუწოდებთ სამართალდამცავ ორგანოებს, მიიღონ ყველა ზომა ყოველგვარი ფიზიკური დაპირისპირებისა და ეთნიკური შუღლის გაღვივების მცდელობის პრევენციისა და აღკვეთისათვის. ამგვარი ქმედების ყველა ჩამდენი კანონის მთელი სიმკაცრით უნდა დაისაჯოს”, – განაცხაა “ქართული ოცნების” თავმჯრომარემ.
მისი თქმით, საქართველოს პარლამენტმა უკვე დაიწყო მუშაობა კანონპროექტის გამკაცრებაზე, რომელიც ეთნიკური ნიშნით დისკრიმინაციისა და ეთნიკური შუღლის გაღვივების წინააღმდეგ იქნება მიმართული.
რამდენიმე დღის წინ საქართველოს პრემიერმინისტრმა ირაკლი ღარიბაშვილმა განაცხადა, რომ საქართველო რუსეთის წინააღმდეგ სანქციებს არ შეუერთდება, რადგან “სანქციები არაეფექტურია”.
საქართველოს ხელისუფლებამ ასევე ნება არ დართო უკრაინაში წამსვლელ მოხალისე მებრძ`ლებს თბილისის აეროპორტიდან გაფრენილიყვნენ, ვინდაიდან, ირაკლი კობახიძის თქმით, ეს “კონფლიქტში პირდაპირ ჩართვას” ნიშნავს.
“შემოვუშვათ თუ არ შემოვუშვათ?”
საქართველოს ხელისუფლება აღაშფოთა იმ აჟიოტაჟმა საქართველოში რუსეთის მოქალაქეების სავარაუდო მასობრივი ჩამოსვლის გამო, რომელიც ორი დღეა არ ცხრება ქართულ სოციალურ ქსელებში და საინფორმაციო გამოშვებებში.
მას შემდეგ, რაც უკრაინაში შეჭრის გამო რუსეთის წინააღმდეგ დასავლური სანქციები ამუშავდა, ხოლო რუსეთის ხელისუფლებამ მედიის დახურვა, სოცქსელების შეზღუდვა და რეპრესიული კანონების გამკაცრება დაიწყო, რუსეთის ბევრმა მოქალაქემ ქვეყნიდან გაქცევის გზების ძიება დაიწყო.
ერთ-ერთი ყველაზე ხელსაყრელი მიმართულება მათთვის საქართველოა – უვიზო რეჟიმისა და ქვეყანაში ყოფნის ლიბერალური წესების გამო.
უცხოელს, მათ შორის რუსეთის მოქალაქეს, ქვეყანაში უვიზოდ შემოსვლა და ერთი წლით დარჩენა შეუძლიათ, ყოველგვარი ბინადრობის ნებართვის ან რაიმე სახის რეგისტრაციის გარეშე.
სწორედ ამის გამო ბოლო დღეებში რუსულენოვან ჯგუფებში სოციალურ ქსელებში გააქტიურდნენ რუსეთის მოქალაქეები, რომლებიც საქართველოში საცხოვრებლად გადმოსვლას გეგმავენ.
ბევრი მათგანი კითხულობს ინფორმაციას იმის შესახებ, რამდენად ადვილია საქართველში სამსახურის შოვნა, ან ბავშვის სკოლაში მოწყობა.
გაზრდილი ინტერესი რუსეთის და ბელარუსის მოქალაქეთა მხრიდან საქართველოში უძრავი ქონების მიმართ საქართველოს უძრავი ქონების ასოციაციამაც დაადასტურა.
რუსეთის მოქალაქეთა ამგვარმა აქტიურობამ ქართულ სოციალურ ქსელებში დიდი ვნებათაღელვა გამოიწვია. გაისმის მოწოდებები, რომ სახელმწიფომ რუსეთის მოქალაქეები აღარ შემოუშვას, ხოლო უძრავი ქონების გამქირავებლებმა მათ უარი უთხრან ბინების გიქირავებაზე.
ამ საკითხმა მწვავე პოლემიკა გამოიწვია სოცქსელების ქართველ მომხმარებელთა შორის.
საქართველოში რუსეთის მოქალაქეთა არშემოშვების მთავარი არგუმენტი ისაა, რომ რუსეთის მოქალაქეების მომრავლება საქართველოში საშუალებას მისცემს პუტინის რეჟიმს “რუსეთის მოქალაქეთა დაცვის” საბაბით აგრესია განახოორცელოს.
“რუსებს მოჰყვება რუსული ტანკები. მე ასე ვიცი უახლესი ისტორიიდან”, – წერს ერთ-ერთი მომხმარეველი.
“ყველაზე მეტად ახლა ვისაც უჭირს ფსიქოლოგიურად, ვინც ყველამ მოიძულა და ვისაც სჭირდება ჩვენი ნამდვილი კავკასიური სითბო და სტუმართმოყვარეობა, ბატონი ვლადიმერ პუტინია, ჩამოვიყვანოთ, დავასვენოთ აბასთუმანში ან გონიოში სადმე, მოვეფეროთ, დავუყვავოთ და რომ ჩაივლის ყველაფერი გავუშვათ ისევ სახლში. რა გჭირთ ნუთუ სტუმარ-მასპინძელი არ წაგიკითხავთ?!”– სარკაზმით წერს მეორე.
“არ შემოყაროთ აქ უკეთესი ცხოვრების მაძიებელი რუსი იმპერიალისტები, რომლებიც იმიტომ კი არ წამოვლენ ქვეყნიდან, რომ იდევნებიან, არამედ იმიტომ რომ ნაიკი და ადიდასები უნდათ და მალდივებზე ფრენა! შემოიღეთ სავიზო რეჟიმი, სასწრაფოდ!”
“კოლექტიური დანაშაული არ არსებობს”
თუმცა, ისმის საწინააღმდეგო მოსაზრებებიც.
“ბევრგან შემხვდა რაღაც ამდაგვარი – რომ გარბიან ეს ვითომ ნორმალური რუსები მოსკოვებიდან, დაეგდონ ადგილზე და მოერიონ პუტინსო. ამისთანებს მინდა ვუთხრა: ეგ იგივეა, ჰიტლერელებისგან თავის დროზე გაქცეული გერმანელი ინტელექტუალები ამუნათო. ბიძინასგან გაქცეულ ქართველებს აღარ შეგახსენებთ”, – წერის ილიას უნივერსისტეტრის პროფესორი დავით დარჩიაშვილი.
მოქალაქეები, რომლებიც რუსებისთვის საქართველოს საზღვრის ჩაკეტვას არ ემხრობიან, სახელმწიფოს გამოსავალს სთავაზობენ:
“ყველა რუსს მოაწერინონ ხელი, რომ აღიარებენ საქართველოს ერთიანობას და ისე შემოვუშვათ ლტოლვილად!”
“არ მგონია რუსეთის სახელმწიფოს რამე მიზეზი დასჭირდეს თუ კრემლმა შემოჭრა გადაწყვიტა. “მიზეზების” დრო ჩაბარდა წარსულს… ახლა თავისი ქმედებების შენიღბვასაც არ ცდილობენ… ყველაზე სწორი გადაწყვეტილება, ჩემი აზრით, იქნებოდა სავიზო რეჟიმი. თუნდაც ელექტრონული ვიზის ფორმით…”
იმადვროულად, ექსპერტები და პოლიტიკოსები აფრთხილებენ საზოგადოებას, რომ მათი გულწრფელი და ლეგიტიმური აღშფოთება შეიძლება ქსენოფობიაში და მიუღებელ საქციელში გადაიზარდოს.
“თუკი სიმართლეა რომ რუსები ტოვებენ საკუთარ ქვეყანას, ორი მიზეზი შეიძლება ჰქონდეს ამას:
– გაურბიან დიქტატორს და მოსალოდნელ რეპრესიებს;
– გაურბიან სანქციების დისკომფორტს.
ეს ორი სრულიად სხვადასხვა მიზეზია და მიდგომაც შესაბამისი უნდა იყოს.
– ქსენოფობიაში არ უნდა გადაგვეზარდოს სიბრაზე;
– ამიტომ მოიგონეს სავიზო რეჟიმი, რომ გაიცხრილოს მომმართველი;
– სანქციებს გამოქცეულები, დღესაც პუტინის სურათები რომ უდევთ ფბ გვერდებზე, არ უნდა შემოვუშვათ საქართველოში”, – წერს თავდავის ყოფილი მინისტრი თინა ხიდაშელი.
“პირველ რიგში უნდა ვაღიაროთ, რომ პრობლემა რთულია. არა მხოლოდ იმ აზრით, რომ ამ ხალხის დიდ ნაწილს ჩვენთვის მიუღებელი ღირებულებები აქვს და მათი აქ ყოფნა შეიძლება ჩვენთვის საზიანო იყოს (ნამდვილად), არამედ იმ აზრითაც, რომ გადაწყვეტილების მიღებაა რთული: როგორი პოლიტიკაა სწორი” – წერს პოლიტოლოგი გია ნოდია.
“ყველა შემოუშვა? არ ვარგა. არავინ არ შემოუშვა? არ ვარგა. არანაირად არ ვაჩვენოთ აქ ჩამოსულ რუსებს, რას ვფიქრობთ მათი ქვეყნის დანაშაულზე? არც ეს ვარგა. რუსს რომ დავინახავთ, „სლავა უკრაინი“ ან „პუწინ ხუილო“ ვაყვიროთ? ცოტა პრიმიტიულია, თუმცა მისაღებთან უფრო ახლოსაა. მოკლედ, ამ მხრივაც შარში ვართ. მაგრამ რაც საქმის მორალურ მხარეს ეხება, ერთი რამ სულ უნდა გვახსოვდეს: არ არსებობს კოლექტიური დანაშაული”, – აღნიშნავს ნოდია.
“როგორც კი ნაბიჯს დგამ კოლექტიური დანაშაულის აღიარებისკენ, ანუ ინდივიდს განსჯი მისი ეთნიკური კუთვნილების, მოქალაქეობის, სოციალურ-ეკონომიკური სტატუსის ან სხვა ნიშნით, თუნდაც ამ წუთში ეს ემოციურად სწორი გეჩვენებოდეს, რაღაც სახის ფაშიზმისკენ დგამ ნაბიჯს”.
თუმცა, მისი აზრით, არსებობს კოლექტიური პასუხისმგებლობა. რუსები კოლექტიურად პასუხს აგებენ პუტინის ხელისუფლებაზე, ზუსტად ისევე, როგორც ქართველები – “ბიძინას და მისი ვეზირების მმართველობაზე”.
პარლამენტის წევრი პატრია “გირჩიდან” ალექსანდრე რაქვიაშვილი კი მიიჩნევს, რომ რუსეთის მოქალაეების მიგრაცია საქართელოში შეიძლება ქვეყნისთვის სასარგენლო იყოს:
“ახლა რუსეთიდან ყველაზე აქტიური ადამიანები გარბიან, და ამავდროულად ისეთი ადამიანები, როლის მორალით ცხოვრება თანამედროვე რუსეთის პირობებში საშიშია. სხვა სიტყვებით, რუსეთს მოსახლეობის საუკეთესო ნაწილი ტოვებს და ებრაელების ნაირად, ამ ხალხმა დიდი სარგებელი შეიძლება მოუტანოს ქვეყანას, რომელიც მათ მიიღებს”.
რუსეთის მოქალაქე: “გვტკივა და გვეშინია”
საქართველოში მცხოვრები რუსი ემიგრანტები კი საქართველოს მოქალაქეებს მოუწოდებენ პუტინის რეჟიმის მიმართ აღშფოთება რუსეთის ქველა მოქალაქეზე არ გადაიტანონ.
“საქართველოს მოქალაქეებო – მომისმინეთ! აგრესორი რუსული რეჟიმია და არა ყველა რუსულენოვანი, რომელიც ცხოვრობს სხვა ქვეყნებში და განსაკუთრებით საქართველოში.
ომის წინააღმდეგ აქციებზე საქართველოში მცხოვრები თითქმის ყველა რუსი გამოვიდა. ზოგიერთმა პასპორტიც კი დაწვა. იმიტომ, რომ ჩვენ გვტკივა, გვეშინია და აუტანლად მწარეა იმის გაცნობიერება, რომ ასეთი რუსეთის მოქალაქე ხარ!” – წერს ერთ-ერთი ემიგრანტი.
“საქართველოს ბანკი” – პირველი შეზღუდვები რუსეთის მოქალქეებისთვის
საქართველოს ბანკის სერვისით ვერ ისარგებლებენ რუსეთის მოქალაქეები, რომლებიც ხელმოწერით არ დაადასტურებენ, რომ გმობენ რუსეთის აგრესიას საქართველოსა და უკრაინაში. ინფორმაცია ამის შესახებ “ნეტგაზეთს” ბანკის პრესსამსახურში დაუდასტურეს.
იმისთვის, რომ მომსახურება გაუწიონ, რუსეთის მოქალაქემ ხელი უნდა მოაწერონ შემდეგ დათქმებს:
- ვგმობ რუსეთის აგრესიას საქართველოსა და უკრაინაში;
- ვეთანხმები, რომ რუსეთი არის ოკუპანტი, რომელიც შეიჭრა საქართველოში 2008 წელს და უკრაინაში 2014 და 2022 წლებში;
- ვეთანხმები, რომ მხარი დავუჭირო საქართველოს ტერიტორიულ მთლიანობას და ვაღიარო, რომ აფხაზეთი და სამაჩაბლო საქართველოა;
- ვეთანხმები, რომ არ გავაზიარებ რუსულ სამთავრობო პროპაგანდას და დავეხმარები მის წინააღმდეგ ბრძოლას;
- ვაცნობიერებ, რომ ხსენებული პირობების რაიმე ფორმით დარღვევა გამოიწვევს ჩემი ანგარიშის გაუქმებას საქართველოს ბანკში.
ბანკში აცხადებენ, რომ ხსენებული პირობები 4 მარტიდან მის ყველა ფილიალში ამოქმედდა. პრესსამსახურში თქვეს, რომ რამდენიმე მოქალაქემ უარი თქვა ზემოხსენებულ დათქმებზე ხელმოწერაზე, რის გამოც მათ ანგარიშები არ გაუხსნეს.
