ეგზოტარიუმის ბინადრების მშვიდი ცხოვრების სცენები თბილისის ზოოპარკიდან. ვიდეობლოგი

თბილისის ზოოპარკის ვიდეობლოგების ამ სერიაში ეგზოტიკური ცხოველების ცხოვრებას გაგაცნობთ. ამ ვიდეოში ნახავთ ულამაზესი, ფერადი, განიერ ფარფლიანი თევზების მშვიდ ცურვას, მობაჯბაჯე კუებს, ხეებზე გაწოლილ ხვლიკებს.

მნახველები მათთვის იშვიათობა არ არის, ამიტომ, კამერა არც უკვირთ და არც აფრთხობთ. პირიქით, ზოგჯერ მოგეჩვენება, რომ თავადაც დიდი ინტესით გაკვირდებიან.

ეგზოტარიუმი არის სპეციალურად მოწყობილი სივრცე, სადაც ადამიანები აკვირდებიან იშვიათ და ეგზოტიკურ ცხოველებს. განსაკუთრებით ქვეწარმავლებს, ამფიბიებსა და ზოგჯერ მწერებსაც. ეგზოტარიუმში შეიძლება ნახო:

• გველები
• ხვლიკები
• კუები
• ბაყაყები
• ობობები და სხვა უჩვეულო ცხოველები

ცხოველები ცხოვრობენ სპეციალურად მოწყობილ ტერარიუმებში, სადაც დაცულია მათთვის საჭირო ტემპერატურა, ტენიანობა და გარემო.

ამ ბმულზე ნახავთ ეგზოტარიუმში შესვლის საათებსა და ბილეთების ღირებულებას.

თბილისის ზოოპარკს არსებობის თითქმის ასწლიანი ისტორია აქვს.  ის 1927 წლის 10 თებერვალს, კავკასიის ცხოველთა საკლიმატიზაციო საზოგადოების ბაზაზე დაარსდა. საზოგადოება XX საუკუნის დასაწყისიდან ინახავდა ველურ ცხოველებს, თუმცა ზოოპარკის სტატუსი არ ჰქონდა.

თავდაპირველად ზოოპარკი მდინარე ვერეს ხეობაში, 70 ჰექტარზე იყო გაშენებული. წლების განმავლობაში დედაქალაქის განვითარებამ, მოგვიანებით კი 2015 წლის 13 ივნისის წყალდიდობამ, ძველი ზოოპარკის ტერიტორია მნიშვნელოვნად შეამცირა. დღესდღეობით მას 5 ჰექტარი უკავია. ზოოპარკს 1500-მდე  ბინადარი ჰყავს.  ყველა ცხოველს საკუთარი ისტორია აქვს.

ბლოგების ამ სერიით თბილისის ზოოპარკის ბინადრებს გაგაცნობთ. მოგიყვებით როგორია მათი ერთი, რუტინული დღე, როგორ ურთიერთობენ სხვა ცხოველებთან და ადამიანებთან, როგორი იცვლება მათი ქცევები ამინდის და სეზონების მიხედვით. აქ ბევრ საინტერესო ამბავს გაიგებთ.