დიდი ბრიტანეთი ქართველი მაღალჩინოსნების შესაძლო დასანქცირებაზე კომენტარს არ აკეთებს
დიდი ბრიტანეთის სანქციები
დიდი ბრიტანეთის ლორდთა პალატაში საქართველოს ოფიციალური პირების წინააღმდეგ შესაძლო სანქციების გაფართოების საკითხი განიხილეს. საქმე ეხება იმ პირებს, რომლებიც აგრძელებენ თანამშრომლობას დიდი ბრიტანეთის მიერ დასანქცირებულ ქართულ პროსამთავრობო ტელემაუწყებლებთან – “იმედსა“ და “პოსტ ტვ“-თან.
წერილობითი კითხვა პარლამენტის წევრმა, ბარონესა კერანმა დასვა. მან ბრიტანეთის მთავრობას ჰკითხა, განიხილავს თუ არა ლონდონი დამატებითი ზომების მიღებას იმ ოფიციალური პირების წინააღმდეგ, რომლებიც კვლავაც თანამშრომლობენ სანქცირებულ ტელეკომპანიებთან.
9 მარტს გაცემულ ოფიციალურ პასუხში მთავრობის წარმომადგენელმა, სახელმწიფო მინისტრმა ბარონესა ჩეპმენმა აღნიშნა, რომ დიდი ბრიტანეთი მკაცრ პოზიციას ინარჩუნებს იმ სუბიექტების მიმართ, რომლებიც უკრაინის წინააღმდეგ რუსეთის პოლიტიკას უწყობენ ხელს.
“დიდი ბრიტანეთი მტკიცედ უპირისპირდება ყველას, ვინც უკრაინის დესტაბილიზაციას უწყობს ხელს, მათ შორის საქართველოში მოქმედ იმ სუბიექტებს, რომლებიც რუსულ დეზინფორმაციას ავრცელებენ,“ — განაცხადა მან.
თუმცა ჩეპმენმა კონკრეტული გვარების ან შესაძლო ახალი სანქციების შესახებ დეტალებზე საუბარს თავი აარიდა. მისი თქმით, ბრიტანეთის მთავრობა წინასწარ არ აკეთებს კომენტარს პოტენციურ სანქციებზე, რადგან ასეთმა საჯაროობამ შესაძლოა შეასუსტოს მათი ეფექტურობა.
სანქციების ეფექტიანობის საკითხი საქართველოში უკვე გახდა პოლიტიკური დისკუსიის საგანი. ოპოზიციური “კოალიცია ცვლილებებისთვის“ წარმომადგენელი ბესიკ დონაძე ამტკიცებს, რომ ტელეკომპანია “იმედთან“ დაკავშირებულმა ჰოლდინგმა სანქციებისგან თავის არიდებისთვის კორპორაციული ქსელი აამოქმედა.
დონაძის თქმით, სანქცირებული ჰოლდინგი GMPG დაკავშირებულია რამდენიმე კომპანიასთან, მათ შორის “უნიმედიასთან“, “Touch Media“-სთან, “IMEDI FILMS“-თან, ტელეკომპანია “აისთან“, “GDS“-თან და “რადიო იმედთან“. დონაძის განმარტებით ქსელში ასევე შედის “რუსთავი 2“, რომელიც “უნიმედიას“ თანამფლობელია, ასევე საქველმოქმედო ფონდი “იმედი“ და ბადრი პატარკაციშვილის სახელობის ჟურნალისტიკის სკოლა.
მისი განცხადებით, 10 თებერვალს ამ ქსელში შემავალ ოთხ საკვანძო კომპანიაში ერთსა და იმავე დღეს შეიცვალა დირექტორები, რაც, მისი თქმით, მიუთითებს კოორდინირებულ მმართველობაზე.
ოპოზიციური პოლიტიკოსი ამტკიცებს, რომ ასეთი კორპორაციული სტრუქტურა ჰოლდინგს საშუალებას აძლევს, სანქციების მიუხედავად გააგრძელოს ფინანსური ოპერაციები, შეიძინოს საერთაშორისო ლიცენზიები და მიიღოს სარეკლამო შემოსავლები. მისივე თქმით, განსაკუთრებით მნიშვნელოვანია “რუსთავი 2“-თან პარტნიორობა “უნიმედიას“ ფარგლებში, რაც დამატებით ფენას ქმნის საერთაშორისო ფინანსური ინსტიტუტების დასაბნევად.
დონაძის შეფასებით, სანქციები ეფექტიანი მხოლოდ იმ შემთხვევაში იქნება, თუ ისინი მთლიან კორპორაციულ ქსელს მოიცავს.
დიდმა ბრიტანეთმა 24 თებერვალს სანქციები დაუწესა ტელეკომპანია “იმედსა” და POSTV-ს, რუსეთის წინააღმდეგ სანქციების რეჟიმის ფარგლებში.
სანქციების სიის დოკუმენტის მიხედვით, TV იმედსა და POSTV-ს შეეხებათ აქტივების გაყინვა, ტრასტის მომსახურების სანქციები და დირექტორის დისკვალიფიკაციის სანქცია, რომელიც ინდივიდს კომპანიის დირექტორობას, მის დაარსებას ან მართვას გარკვეული პერიოდით უზღუდავს, სანქციის დარღვევა კი სისხლის სამართლის დანაშაულად ითვლება.
დიდი ბრიტანეთის მიერ პროსამთავრობო პროპგანადისტული მედიების, TV იმედისა და POSTV-ის დასანქცირების შემდეგ, “ქართული ოცნების” პრემიერ-მინისტრმა ირაკლი კობახიძემ განაცხადა, რომ გადაწყვეტილება “არასერიოზული და სამარცხვინოა“. მისი თქმით, ლონდონში “აღარაფერი აღარ ფასობს“, მათ შორის – მედიის თავისუფლება.
კობახიძემ სანქციები ფორმალურად მედიის თავისუფლების შელახვად შეაფასა, თუმცა დაამატა, რომ პრაქტიკულ შედეგს ისინი ვერ გამოიღებს. მისი განცხადებით, ხელისუფლება იღებს სრულ პასუხისმგებლობას იმაზე, რომ არცერთ ჟურნალისტს არცერთ ტელეკომპანიაში მდგომარეობა არ გაუუარესდეს.
“რა თქმა უნდა, ბუნებრივია, ყველა სახელმწიფო და არასახელმწიფო კომპანიამ TV იმედთან და POSTV-სთან თანამშრომლობა უნდა გააგრძელოს.” – თქვა კობახიძემ.
