კომენტარი: ვენესუელის ამბებს მოზრდილი ტექსტი უძღვნა ხელისუფლებამ ისე, რომ არც ერთხელ არ ახსენა აშშ
დავით ზურაბიშვილის კომენტარი
პოლიტოლოგი დავით ზურაბიშვილი “ქართული ოცნების” პარლამენტის თავმჯდომარის, შალვა პაპუაშვილის განცხადებას ეხმაურება, რომლის მიხედვით, “ევროკავშირი აღარ არსებობს როგორც საერთაშორისო წესრიგის გარანტი და გლობალური გეოპოლიტიკური მოთამაშე.“
ზურაბიშვილის თქმით, პაპუაშვილის განცხადება მიგვანიშნებს, რომ მადუროს პრეცედენტით მაინც ცოტა დამფრთხალი არიან, თუმცა, ცდილობენ იხტიბარი არ გაიტეხონ.
ამასთან, პაპუაშვილის შეფასებით, ევროკავშირი ვეღარც მომავალში შეასრულებს ამ როლს.მისივე თქმით, ვენესუელაში ჩატარებულმა “რამდენიმეწუთიანმა ოპერაციამ“ მხოლოდ დაადასტურა ის, რასაც საქართველოს ხელისუფლება დიდი ხანია ამტკიცებს – მეორე მსოფლიო ომის შემდეგ ჩამოყალიბებული საერთაშორისო წესრიგი დასრულებულია.
დავით ზურაბიშვილი: “როგორც იქნა ვეღირსეთ საქართველოს ხელისუფლების ოფიციალურ კომენტარს ამერიკის სპეცოპერაციაზე ვენესუელაში. ეს საპატიო მისია ანტიევროპული გზავნილების მთავარ ფოსტალიონს, პარლამენტის თავმჯდომარე პაპუაშვილს ანდეს.
რამდენადაც ანტიევროპულ პროპაგანდას პრინციპულად არ ვაზიარებ, მისი ტექსტის ციტირებისგან შეგნებულად ვიკავებ თავს და მხოლოდ გზავნილებზე კომენტარებით შემოვიფარგლები. თავად პარლამენტის თავმჯდომარის გამოსვლა ვისაც აინტერესებს, ისედაც ნახავს. რა და საინფორმაციო საშუალებების დეფიციტი ხელისუფლებას ნამდვილად არა აქვს.
ცოტა ვრცელი ტექსტი გამოვა ასე, მაგრამ როგორც ხშირად ხდება ხოლმე, სხვანაირად არ გამოდის.
მაშ ასე: რა შევიტყვეთ ბატონი პაპუაშვილისგან?
1. “ვინც საქართველოს ტერიტორიულ მთლიანობას არ ცნობს, ის საქართველოს მეგობარი ვერ იქნება.’
პრინციპში ამით გამოხატულია დამოკიდებულება მადუროს რეჟიმის მიმართ. თავისთავად სწორი მიდგომაა, თუმცა თავად ტექსტში ეს მიდგომა არაა გახსნილი. არადა ამავე რიგში ხვდება რუსეთიც, რაც აშკარად საყურადღებოა.
2. ” მეორე მსოფლიო ომის შემდეგ დამკვიდრებული საერთაშორისო სამართლებრივი წესრიგი აღარ არსებობს.”
ეს ვიცით. მაინც არსებობსო, არც არავინ ამტკიცებს. მერე რას ვშვრებით, ისაა მთავარი.
3. “ამ ვითარებაში ჩვენ უნდა ვიხელმძღვანელოთ ჩვენი სახელმწიფო ინტერესებით.”
კი ბატონო, ბაზარი არაა, ოღონდ პრობლემა ისაა, სახელმწიფოს ინტერესებად ვინ რას მიიჩნევს. პაპუაშვილი რომ “ქვეყანას” და “სახელმწიფოს” ამბობს, იქ რეალურად ბიძინა ივანიშვილი იგულისხმება.
4. ევროკავშირს ახალ მსოფლიო წესრიგში არავინ არაფერს ეკითხება და მას არც არაფრის თავი არა აქვს. ბრიუსელის პოლიტიკა საქართველოს მიმართ არის მტრული, რადგან ჩვენ ეროვნული ინტერესებით ვხელმძღვანელობთ და არ ვართ უკრაინასავით ევრობიუროკრატიის მარიონეტები.
რეალურად ესაა მთავარი თეზისი, რაც იმას ნიშნავს, რომ საქართველოს ხელისუფლება აპირებს კვლავ გააგრძელოს ევროპასთან კონფრონტაციის პოლიტიკა. ევროკავშირი გამოცხადებულია მთავარ მტრად და საფრთხობელად. მე რომ მკითხო, ეს იმდენად ბოროტებით არ მოსდით, რამდენადაც უმეცრებასთან შერწყმული სიშლეგით, მაგრამ ყველა შემთხვევაში მავნებლობა და ეროვნული ინტერესების ღალატია.
თუკი ევროკავშირს დღეს არაფერი ეკითხება მსოფლიოში, ოცნების ხელისუფლების ასეთი გავეშებული ანტიევროპეიზმი პოლიტიკური მიზანშეწონილობის თვალსაზრისით ცოტა არ იყოს გაუგებარია, მაგრამ წმინდა ადამიანური სულმდაბლობის, ქაჯობის და უნახავმარანახა-ს პოზიციიდან ძალიანაც ბუნებრივია – იპოვეს თავიანთი ჭკუით დაბალი ღობე, რომელთანაც თან ღრმა ღირებულებითი კონფლიქტი აქვთ და ყველას ჯავრს მასზე იყრიან.
5. ამავე ოპერიდანაა ხელისუფლების ოპონენტების “უსამშობლო მრუდე ქართველებად” მოხსენიება და მათი შედარება ყორღანაშვილებთან და ორჯონიკიძეებთან. ოპონენტების დეჰუმანიზაციის მცდელობა იმ ვითარებაში , როდესაც მოსახლეობის საკმაოდ დიდი ნაწილი (ჩემი აზრით, უმრავლესობაც) ხელისუფლების მიმართ ნეგატიურადაა განწყობილი, პოლიტიკურად არასწორია. ნებისმიერი ხელისუფლება ამ ვითარებაში მანევრირებას და კომპრომისების ძიებას დაიწყებდა, მაგრამ მაგრამ აქ ისევ უმეცრებასთან შერწყმული სიშლეგესთან გვაქვს საქმე, როდესაც ოცნების ხელისუფლება ცდილობს დაიჯეროს და ჩვენც დაგვაჯეროს, რომ მისი მოწინააღმდეგე მხოლოდ ევრობიუროკრატიის მიერ დახელფასებული ოცდაათი აკაცუკია.
6. და ბოლოს, პირადად ჩემს აღფრთოვანებას იწვევს ის ფაქტი, რომ ვენესუელას ამბებს კარგა მოზრდილი ტექსტი უძღვნა ხელისუფლებამ ისე, რომ არც ერთხელ არ ახსენა ამერიკის შეერთებული შტატები. ამას ხომ უნდა მოხერხება? მეორეს მხრივ კი ეს იმაზეც მიგვანიშნებს, რომ მადუროს პრეცედენტით მაინც ცოტა დამფრთხალი არიან, თუმცა, ცდილობენ იხტიბარი არ გაიტეხონ..
P. S სხვათა შორის, არც დიფსთეითი არაა არც ერთხელ ნახსენები.”
