აზერბაიჯანში პოპულარული ონლაინ გამოცემის დირექტორი და მთავარი რედაქტორი დააკავეს

დაკავებები აზერბაიჯანულ მედიაში

გასული 24 საათის განმავლობაში აზერბაიჯანში დააკავეს დამოუკიდებელი ონლაინ გამოცემა Abzas Media-ს ორი თანამშრომელი. ასევე, დააკავეს კიდევ ერთი თანამშრომელი და სამოქალაქეო აქტივისტი და მისგან უკვე მეორე დღეა არანაირი სიახლე არ ვრცელდება. კონტრაბანდაში ბრალდებულ გამოცემის დირექტორს და მთავარ რედაქტორს 4-თვიანი წინასწარი პატიმრობა შეეფარდათ.

21 ნოემბერს, გვიან საღამოს, Abzas Media-ს მთავარი რედაქტორი სევინჯ ვაგიფკიზი და რეჟისორი ულვი ჰასანლი სასამართლოში გამოცხადდნენ. მათ წინააღმდეგ აღძრულია სისხლის სამართლის საქმე, რომელიც აზერბაიჯანის სისხლის სამართლის კოდექსის 206.3.3 მუხლით მიმდინარეობს (კონტრაბანდა ადამიანთა ჯგუფის მიერ წინასწარი შეთქმულების გზით).

• აზერბაიჯანელი ჟურნალისტი საქართველოს “ჩრდილოვანი მმართველის” წინააღმდეგ
• ბაქოში ჟურნალისტი და მისი ადვოკატი დააკავეს

სასამართლო პროცესის დაწყებამდე ქალაქის ამ ნაწილში გზები გადაკეტილი იყო, სასამართლოს მიმართულებით შესვლა კი შეზღუდული. ჟურნალისტებმა და სევინჯ ვაგიფქიზის ახლობლებმა მაინც შეძლეს ბაქოს ხატაის რაიონის სასამართლო დარბაზში შესვლა და პროცესის დაწყებას რამდენიმე საათი ელოდნენ.

როდესაც ჟურნალისტები სასამართლოში მიიყვანეს, შენობის წინ მათ კოლეგებსა და პოლიციელებს შორის ფიზიკური დაპირისპირება მოხდა. როგორც ირკვევა, პოლიციამ ჟურნალისტებს დაკავებულების გადაღების საშუალება არ მისცა, ერთ-ერთი ჟურნალისტს კი ტერიტორია დაატოვებინეს.

არც ერთი დამსწრე – არც ახლობლები და არც ჟურნალისტები – სასამართლო დარბაზში არ შეუშვეს.

სევინი ვაგიფკიზი პოლიციის თანამშრომლებმა 21 ნოემბერს, დილით ადრე, აზერბაიჯანში დაბრუნებისთანავე, თვითმფრინავის ტრაპზე დააკავეს – პასპორტკონტროლის გარეშე. Abzas Media-ს მთავარი რედაქტორი ქალაქ ბაქოს პოლიციის მთავარ სამმართველოში გადაიყვანეს. რამდენიმე საათის შემდეგ კი ბინაში, სადაც ის ცხოვრობს, ჩხრეკის ჩასატარებლად წაიყვანეს.

ვაგიფკიზას კოლეგების თქმით, რომლებმაც ბინაში შესვლისას შეძლეს მისი ნახვა, დაკავებისას პოლიცია მასზე ძალადობდა. რის შემდეგაც ჟურნალისტმა კოლეგებს შეატყობინა, რომ თავს ცუდად გრძნობდა და გულისრევის შეგრძნება ჰქონდა.

როგორც ჟურნალისტის ადვოკატმა ელჩინ სადიგოვმა აღნიშნა, ბინაში უკანონო არაფერი აღმოჩენილა და მისთვის არაფერი ჩამოურთმევიათ.

გამოცემის დირექტორი ულვი ჰასანლი მთავარი რედაქტორის დაკავებამდე ერთი დღით ადრე, 20 ნოემბერს, გამთენიისას დააკავეს. როგორც თავად ჰასანლიმ მოგვიანებით უთხრა თავის ადვოკატს, მას სამუშაო ვიზიტი ჰქონდა დაგეგმილი და როცა აეროპორტში მიდიოდა, უხო მანქანა მისი ტაქსის წინ გაჩერდა, სამოქალაქო ტანსაცმელში გამოწყობილი ხალხი მანქანიდან გადმოვიდა და ის ძალის გამოყენებით ჩასვეს თავიანთ მანქანაში. ერთ-ერთმა პოლიციელმა მას მუშტი თვალის არეში ჩაარტყა. დარტყმის კვალი ჰასანლის სახეზე ახლაც ეტყობა.

ჟურნალისტი ბაქოს პოლიციის მთავარ სამმართველოში მიიყვანეს. როგორც ულვი ჰასანლიმ აღნიშნა, მას იქაც სცემეს.

„მათ მკითხეს, რატომ წერს Abzas Media კორუფციაზე და არ წერს ყარაბაღში გამარჯვებაზე? ყველა კითხვა, რომელიც დამისვეს, ეხებოდა საიტის საქმიანობას“, – განაცხადა ულვი ჰასანლიმ აუდიოჩანაწერში, რომელიც მისმა ადვოკატმა ზიბეიდა სადიგოვამ გააკეთა.

შემდეგ ჩხრეკა ჩატარდა Abzas Media-ს რედაქციაში და ჰასანლის ბინაში. ბინაში არაფერი აღმოჩნდა, თუმცა ოფისში პოლიციამ 40 ათასი ევროს ოდენობის თანხა იპოვა და ამოიღო.

თავად ულვი ჰასანლიმ და მთავარმა რედაქტორმა სევინჯ ვაგიფქიზიმ განაცხადეს, რომ ეს თანხა მათ რედაქციაში თავად ძალოვანი სტრუქტურების წარმომადგენლებმა ჩაუდეს და მათ ამის შესახებ არაფერი იციან.

ჩხრეკის შემდეგ, ნაქირავებ ბინაში, სადაც რედაქცია იყო განთავსებული, კარის საკეტი შეიცვალა და ჟურნალისტები საკუთარ ოფისში მუშაობას ვეღარ აგრძელებენ.

დაახლოებით იმავე პერიოდში სოციალური აქტივისტი და Abzas Media-ის თანამშრომელი მაგომედ კეკალოვი ბინიდან სამოქალაქო ტანსაცმელში გამოწყობილმა პირებმა ძალით წაიყვანეს. როგორც ახალგაზრდა აქტივისტის მშობლებმა აღნიშნეს, ამ პირებმა მათ თავი არ წარუდგინეს და არც ის უთქვამთ, სად მიჰყავდათ იგი.

მას ადვოკატი და ახლობლები უკვე მეორე დღეა ეძებენ, თუმცა ცნობილი ჯერჯერობით არაფერია.

„დავუკავშირდი შინაგან საქმეთა სამინისტროს და ვუთხარი, რომ ერთ დღეზე მეტია ვერ მივიღე ინფორმაცია ჩემი დაცვის ქვეშ მყოფის, სამოქალაქო აქტივისტის, მუჰამედ კეკალოვის შესახებ. ჩვენ მუდმივ კონტაქტზე ვართ აზერბაიჯანის რესპუბლიკის ადამიანის უფლებათა კომისართან, ომბუდსმენის ოფისის თანამშრომელთან. სამწუხაროდ, მუჰამედ კეკალოვის შესახებ ინფორმაცია ვერ მოვიპოვეთ“, – განაცხადა ადვოკატმა როვშანა რაჰიმლიმ.

კეკალოვის ახლობლები და მეგობრები შიშობენ, რომ ის აწამეს გამოძიებისთვის საჭირო ჩვენების მისაღებად.