აშშ-მ აზერბაიჯანში გააუქმა კურსდამთავრებულთა შეხვედრა მას შემდეგ, რაც მას "აგენტების შეკრება" უწოდეს
დაძაბულობა აზერბაიჯანსა და შეერთებულ შტატებს შორის
აზერბაიჯანსა და ამერიკის შეერთებულ შტატებს შორის დაძაბულობა გრძელდება. ამერიკის საელჩომ გააუქმა ამერიკული უნივერსიტეტის კურსდამთავრებულთა შეხვედრა, რომელიც ბაქოში უნდა გამართულიყო. ეს მოხდა იმ ფონზე, როდესაც პრო-სამთავრობო მედიაში გავრცელდა ინფორმაცია, რომ ეს შეხვედრა რეალურად იყო „აშშ-ის აგენტების შეკრება აზერბაიჯანში“.
- “საქართველო დაინტერესებულია აზერბაიჯანთან პარტნიორობის გაძლიერებით” – ღარიბაშვილი ალიევს შეხვდა
- აზერბაიჯანში პოპულარული ონლაინ გამოცემის დირექტორი და მთავარი რედაქტორი დააკავეს
საზეიმო შეხვედრა ამერიკული უნივერსიტეტების კურსდამთავრებულებთან, რომელიც 27 ნოემბერს იყო დაგეგმილი ბაქოში, სასტუმრო Marriott Absheron-ში აღარ გაიმართება. ეს მოხდა მას შემდეგ, რაც ბაქოს ტელევიზიასა და Qafqazinfo-ს პრო-სამთავრობო რესურსებში გავრცელდა ინფორმაცია, რომ საელჩო აწყობდა შეხვედრას თავის „ჯაშუშურ ქსელთან“, იმ ადამიანებთან, რომლებიც „ამერიკელ აგენტებად აქციეს შეერთებულ შტატებში სწავლების დროს“.
როდესაც გამოცემა Turan-მა ამ ბრალდებებზე და შეხვედრაზე კომენტარი სთხოვა ბაქოში აშშ-ის საელჩოს, მათ განაცხადეს:
„საელჩო მოუთმენლად ელოდა ჩვენი ორი ფლაგმანი საგანმანათლებლო და კულტურული გაცვლითი პროგრამის იუბილეების აღნიშვნას და ყოველთვის ხაზს უსვამდა აშშ-ში განათლებამიღებული კურსდამთავრებულების წვლილს აზერბაიჯანული საზოგადოების განვითარებაში.
ამ იუბილეებმა წელს საელჩოს ყოველწლიური კურსდამთავრებულების ღონისძიება კიდევ უფრო განსაკუთრებული გახადეს.
მოსალოდნელი იყო, რომ ღონისძიებას 400-ზე მეტი სტუმარი დაესწრებოდა საზოგადოების სხვადასხვა ფენებიდან, მათ შორის მთავრობის, განათლების, არაკომერციული და კერძო სექტორიდან.
ჩვენ მოუთმენლად ველით უახლოესი მომავალის ახალ განრიგს“, – ნათქვამია საელჩოს პასუხში.
ზოგიერთი ექსპერტი ამ ღონისძიების გაუქმებას გამოეხმაურა. მაგალითად, ილჰამ ისმაილმა, ეროვნული უშიშროების სამინისტროს ყოფილმა ვიცე-პოლკოვნიკმა და უსაფრთხოების ექსპერტმა განაცხადა, რომ „აშშ-ს ჰყავს აგენტები მთელ მსოფლიოში”, მათ შორის აზერბაიჯანში, მაგრამ აგენტებთან შეხვედრები, როგორც წესი, საიდუმლოა და მათი განრიგი პრესისთვის უცნობია.
„იმისთვის, რომ აგენტურული ქსელის წევრები ერთმანეთს არ იცნობდნენ, ორი აგენტიც კი ვერ შეხვდება ერთ ადგილას ერთდროულად“, – განუცხადა მან „ამერიკის ხმას“.
ანალიტიკოსი ასევე თვლის, რომ თუ არსებობს საფუძვლიანი ეჭვი, რომ პირები, რომლებიც შეხვედრაში მონაწილეობდნენ, აგენტები არიან, მაშინ ამ პირებს უნდა წაუყენონ ბრალი სამშობლოს ღალატისთვის, ხოლო ვინც ამის შესახებ იცის, დაზვერვის სამსახურებს უნდა მიმართოს და არა პრესას.
„შესაძლებელია და აუცილებელია შეერთებული შტატების კრიტიკა, მათ მიკერძოებულ პოზიციაზე მკაცრი პასუხის გაცემა ორმაგი სტანდარტების გამო, მაგრამ ასეთი არაპროფესიონალური მიდგომა საპირისპირო ეფექტს ქმნის.“ – აღნიშნა მან.
შეგახსენებთ, რომ ბევრი მათგანი, ვინც განათლება მიიღო ან იღებს აშშ-ში, და ეს არის რამდენიმე ათასი ადამიანი, აზერბაიჯანის მთავრობის მხარდაჭერით განხორციელდა. რამდენიმე წლის წინ შეიქმნა სახელმწიფო პროგრამა ახალგაზრდების საზღვარგარეთ განათლების დასაფინანსებლად. ამ ახალგაზრდების უმეტესობა სწავლობდა და სწავლობს შეერთებულ შტატებში და აზერბაიჯანის მთავრობა იხდის მათი სწავლის საფასურს.
