ცხინვალში საპარლამენტო არჩევნები ახლოვდება. ოპოზიცია აღშფოთებულია
საპარლამენტო არჩევნები სამხრეთ ოსეთში
საპარლამენტო არჩევნები ცხინვალში 9 ივნისს გაიმართება და მასში შვიდი პარტია მიიღებს მონაწილეობას. ესენია მმართველი პარტია “ნიხასი” და მისი მთავარი კონკურენტი, პარტია “ერთიანი ოსეთი”, ასევე კომუნისტური პარტია, სახალხო პარტია, ხალხის ერთობა, და ერთიანობის პარტია.
არჩევნები შერეული მაჟორიტარულ-პროპორციული სისტემით ჩატარდება და მასში 17 მაჟორიტარულ ოლქში 112 კანდიდატი მიიღებს მონაწილეობას.
ცხინვალის პარლამენტში 34 დეპუტატია.
- “სრული მარცხი” თუ “ყველაფერი გამოგვივა”? ალან გაგლოევის პირველი ორი წლის შეჯამება
- სამხრეთ ოსეთს სურს შეუერთდეს რუსეთს, ამბობენ ადგილობრივი პოლიტიკოსები
- ვინ და რატომ აპირებს შექმნას ახალი პარტიები ცხინვალში
კენჭისყრის დღეს სამხრეთ ოსეთში სულ 71 საარჩევნო უბანი იმუშავებს.
აფხაზეთში ოსი ამომრჩევლები ამჯერად ხმის მიცემას ვერ შეძლებენ – ხელისუფლებამ სოხუმის საარჩევნო უბანი დახურა “მისი მუშაობის არამიზანშეწონილობის“ მოტივით.
კონკურენტების მოშორება?
ხუთ პოლიტიკურ გაერთიანებას არჩევნებში მონაწილეობის უფლება არ მისცეს, ზოგიერთმა მათგანმა ამის გამო უზენაეს სასამართლოში სარჩელი შეიტანა.
სასამართლოს სპიკერის, ზარინა თედეევას განცხადებით, პრეტენზიები განიხილეს და არ დააკმაყოფილეს.
თავის მხრივ, მოსარჩელეები ცენტრალური საარჩევნო კომისიის და უზენაესი სასამართლოს გადაწყვეტილებას პოლიტიკური ველის მოსუფთავების მიზანმიმართულ კამპანიად თვლიდნენ.
ბევრს მიაჩნია, რომ ადმინისტრაციული რესურსი სინდისის ქენჯნის გარეშე გამოიყენება და ყველაფერი კეთდება ხელისუფლებაში მყოფი პარტიის, “ნიხასის” გამარჯვებისთვის, რომლის რეიტინგი, ისევე როგორც თავად პრეზიდენტი ალან გაგლოევის, სწრაფად ეცემა.
კერძოდ, მისი ყოფილი მოკავშირეები, ახლა კი ყველაზე აქტიური ოპონენტები – გარი მულდაროვი და დავით სანაკოევი – გააგდეს პოლიტიკური ასპარეზიდან. მოგვიანებით ისინი გაერთიანდნენ პარტიაში „სამართლიანობისთვის“, რომელსაც არჩევნებში მონაწილეობის უფლება არ მისცეს.
„ცენტრალური საარჩევნო კომისიის და სასამართლოების გადაწყვეტილებები ეწინააღმდეგება კანონს და მასიურად არღვევს მოქალაქეთა არჩევანის კონსტიტუციურ უფლებებს. ცენტრალური საარჩევნო კომისიის მუშაობა იყო მიკერძოებული ჩვენი პარტიის მიმართ. დაირღვა საარჩევნო კანონმდებლობა. ცენტრალურმა საარჩევნო კომისიამ მიიღო აბსოლუტურად უკანონო გადაწყვეტილებები, რომლებიც არ შეესაბამება საარჩევნო პროცესების ნორმალიზებას”, – აცხადებს პარტია „სამართლიანობისთვის“.
„დღევანდელი ხელისუფლება იყენებს ადმინისტრაციულ რესურსს. მმართველი პარტია „ნიხასი“ კანონს უხეშად არღვევს. საარჩევნო კამპანია სცილდება როგორც კანონს, ასევე წესიერების ნორმებს. სოციალური ქსელები კვლავ გამოიყენება კონკურენტების დისკრედიტაციისთვის. ეს აბსოლუტურად მიუღებელია“, – ამბობს პარტიის ერთ-ერთი წევრი ამირან დიაკონოვი.
მსგავს პოზიციას ინარჩუნებს მთავარი ოპოზიციური პარტია „ერთიანი ოსეთი“ (ყოფილი მმართველი პარტია).
გაერთიანებული ოსეთის ცენტრალური კომიტეტის თავმჯდომარემ, პარლამენტის ექს-სპიკერმა ალან ტადტაევმა განაცხადა, რომ დღევანდელი ხელისუფლების კომპეტენციის პრობლემა ფაქტიურად ყოველდღე იგრძნობა.
“ჩვენ ვგრძნობთ ალან გაგლოევის გუნდის არაკომპეტენტურობას ბიუჯეტის შეუსრულებლობის, კანონების შეუსრულებლობის პრობლემებსა და ყოველდღიურ ცხოვრებაში. ბენზინგასამართ სადგურებზე საწვავი უბრალოდ არ არის, ხელფასების და პენსიების გადახდა კი თვეებით იგვიანებს. სამთავრობო უწყებებს არ უხდიან ფულს მგზავრობის, საყოფაცხოვრებო ხარჯებისთვის ან ავტო ნაწილებისთვის. ბიუჯეტის დეფიციტთან დაკავშირებით ყველა დეპარტამენტიდან არის პრეტენზია.
ამავდროულად, ხელისუფლება და პრო-საპრეზიდენტო “ნიხასის” პარტია არ გვთავაზობს არანაირ ეფექტურ და პროფესიონალურ გადაწყვეტილებებს სამხრეთ ოსეთის პოლიტიკური და სოციალურ-ეკონომიკური სტაგნაციიდან გამოსაყვანად.“ – ამბობს ტადტაევი.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
