ცხინვალის საპრეზიდენტო არჩევნებში ოპოზიციის კანდიდატი ლიდერობს
საპრეზიდენტო არჩევნები ცხინვალში
სამხრეთ ოსეთის საპრეზიდენტო არჩევნებში, მოქმედ პრეზიდენტს ანატოლი ბიბილოვს, ოპოზიციის კანდიდატი ალან გაგლოევი უსწრებს. თუმცა, არჩევნების ბედი მეორე ტურმა უნდა გადაწყვიტოს. მოქმედმა პრეზიდენტმა, რომელმაც მთავარ მიზნად რუსეთთან გაერთიანება დაისახა, განაცხადა, რომ მეორე ტურში ერთმანეთს “ორი იდეოლოგია” დაუპირისპირდება.
საპრეზიდენტო არჩევნების მეორე ტური 24 აპრილს გაიმართება.
ცესკოს მონაცემებით, ოქმების 95 პროცენტის დამუშავების შედეგად, ოპოზიციური საპარლამენტო პარტიის “ნიხასის” თავმჯდომარეს ალან გაგლოევს ხმების 36,9 პროცენტი აქვს. მან ბიბილოვს 3,4 პროცენტით, ანუ ათასი ხმით აჯობა.
ამ მონაცემების მიხედვით, გაგლოევს ხმა მისცა 10 705-მა ამომრჩეველმა, ანატოლი ბიბილოვს კი 9 706-მა.
ალან გაგლოევი 41 წლისაა. ოპოზიციური პარტია „ნიხასის“ ლიდერი იგი 2020 წელს გახდა. ცხინვალის კგბ-ს იქამდე უცნობი ოფიცერი, პოლიტიკაში 2017 წელს, საპრეზიდენტო საარჩევნო კამპანიის დროს გამოჩნდა. მაშინ მან ამომრჩეველთა ხმების 11 პროცენტი მოიპოვა.
რაც შეეხება დანარჩენ სამ ოპოზიციურ კანდიდატს, მათ არჩევნებში მონაწილეობა შემდეგი შედეგით დაასრულეს: დეპუტატი გარი მულდაროვი – 8,9 პროცენტი, პარლამენტის ვიცე-სპიკერი ალექსანდრე პლიევი – 11,9 პროცენტი, ყოფილი დეპუტატი დიმიტრი ტასოევი – 2,8 პროცენტი. ამომრჩეველთა 0,6 პროცენტმა ხმა ყველას წინააღმდეგ მისცა.
არჩევნებში სულ 28 976-მა ადამიანმა მიიღო მონაწილეობა.
არჩევნების დღეს, კენჭისყრის დასრულებამდე, გაგლოევის მხარდამჭერები შედეგების გამოცხადებას, ცხინვალის ცენტრში, ცესკოს შენობასთან ელოდნენ.
მხარდამჭერებს შედეგები და მისი ლიდერობის შესახებ ინფორმაცია, თავად ალან გაგლოევმა გააცნო. მას ოპოზიციის დანარჩენი სამი კანდიდატიც შეუერთდა და მეორე ტურში მხარდაჭერა გამოუცხადა. ასე შეიქმნა ერთიანი ოპოზიციური ბლოკი, რომლის ჩამოყალიბებას ოპოზიციის მხარდამჭერები ჯერ კიდევ არჩევნებამდე ელოდნენ.
იმის შესახებ, რომ ცხინვალში საპრეზიდენტო არჩევნების მეორე ტური გაიმართება, წინასწარი მონაცემების გამოცხადებამდე, თავად მოქმედმა პრეზიდენტმა, ანატოლი ბიბილოვმა განაცხადა.
მან მადლობა გადაუხადა ცხინვალის ყველა მცხოვრებს არჩევნებში აქტიურობისთვის, რაც მისი თქმით, ადასტურებს “მოქალაქეების ნდობას დემოკრატიული პროცესის – არჩევნებისადმი”. ბიბილოვმა თქვა, რომ „ბრძოლა არ დასრულებულა“.
„მინდა ჩემს მხარდამჭერებს ვუთხრა: ჩვენ გვჭირდება მობილიზება და ბოლომდე ბრძოლა. ჩვენ ერთად ვართ, წინ მივდივართ, გამარჯვებისკენ. გამარჯვებისკენ – ხალხის კეთილდღეობისთვის, გამარჯვებისკენ – რუსეთის ფედერაციაში შესვლის შესახებ რეფერენდუმის ჩასატარებლად, – მიმართა ბიბილოვმა მხარდამჭერებს.
მიმართვაში მან ხაზი გაუსვა მას და მის მთავარ ოპონენტს შორის არსებულ პოლიტიკურ შეხედულებათა განსხვავებებს:
„როგორც საპრეზიდენტო კანდიდატი, მოხარული ვარ, რომ მეორე ტურში ალან გაგლოევთან ერთად გავედი. რადგან მეორე ტურში ორი იდეოლოგია უპირისპირდება. ვფიქრობ, ყველას გესმით, რა იდეოლოგიებზეა საუბარი. და აქ არის ხალხის არჩევანი“.
ანატოლი ბიბილოვისგან განსხვავებით, ალან გაგლოევს პირველი ტურის წინასწარი შედეგების შესახებ კომენტარი არ გაუკეთებია.
რატომ დადგა ეს შედეგი?
ექსპერტები, ბიბილოვის სიტყვებს „ორი იდეოლოგიის“ შესახებ, ასე ხსნიან – საუბარია მმართველი პარტია „ერთიანი ოსეთისა“ და ანატოლი ბიბილოვის პოლიტიკურ პროგრამაზე, რომლის მთავარი ხაზი ცხინვალის რუსეთში შესვლაა.
არჩევნებამდე ცოტა ხნით ადრე ბიბილოვმა ამ საკითხზე რეფერენდუმის ჩატარების იდეა გააჟღერა. 8 აპრილს უკვე გაიმართა საინიციატივო ჯგუფის გაფართოებული შეხვედრა. რეფერენდუმი მაის-ივნისშია დაგეგმილი.
ალან გაგლოევი და ოპოზიციის ნაწილი ამ იდეას სკეპტიკურად უყურებს. ისინი მიიჩნევენ, რომ რუსეთისთვის არამომგებიანია ცხინვალის შეერთება და ეს არც უნდა ითხოვონ. მათი თქმით, პირიქით, დამოუკიდებელი სახელმწიფო უნდა ააშენონ.
პოლიტოლოგი, გაზეთის «Свободный взгляд» მთავარი რედაქტორი ბადრი გაზზატი მიიჩნევს, რომ რადგან ახლა ბიბილოვმა გაგლოევს დაუთმო, მიუხედავად რუსეთთან შეერთებაზე იდეის პოპულარობისა, თუ ის მეორე ტურში დამარცხდება, ეს პერსპექტივა “გაუქმდება ან გადაიდება”.
„მაგრამ არის კიდევ ერთი ფაქტორი – თავად გაგლოევი კამპანიას საპროტესტო ელექტორატზე აგებს, სერიოზული პოლიტიკური და ეკონომიკური პროგრამები მას არ წარმოუდგენია, კერძოდ, როგორ უნდა აშენდეს და განვითარდეს ეს დამოუკიდებელი სახელმწიფო მომავალში.
ის რადიკალურად აღიქვამს რუსეთთან გაერთიანების იდეას, მაგრამ უცნობია ვისგან არის დამოუკიდებელი სამხრეთ ოსეთი, თუ ბიუჯეტი რუსეთიდან დგება, ფინანსური, სოციალური და სამხედრო დახმარება რუსეთიდან მოდის და ადგილობრივების 99 პროცენტზე მეტი რუსეთის მოქალაქეა”, – ამბობს პოლიტოლოგი.
მას მიაჩნია, რომ მიუხედავად იმისა, რომ რუსეთის მიერ სამხრეთ ოსეთის დამოუკიდებლობა აღიარებულია, ის ვერ იარსებებს და იფუნქციონირებს სრულფასოვნად რუსეთის გარეშე. ამიტომ, ცხინვალის რუსეთთან შეერთება, რეალურად, დე იურე გააძლიერებს იმ სტატუსს, რომელიც დე ფაქტო 2008 წლიდან არსებობს. და ამიტომ „გაურკვეველია, ვისგან სურთ დამოუკიდებლობა ოპოზიციონერებს”.
პოლიტოლოგის თქმით, „ბიბილოვის დამარცხების მიზეზი მისი გუნდის მარცხი და მისი პირადი შეცდომებია“. ოპონენტებმა კი „ამ შეცდომებითა და სკანდალებით ითამაშეს და ამავდროულად, თავად არაფერი წარუდგინეს ხალხს და ამომრჩეველს. სამხრეთ ოსეთის განვითარების რაიმე ეფექტური პროგრამა მათ არ აქვთ“. რაც ხელისუფლებაში მოსვლის შემთხვევაში „სამოქალაქო დაპირისპირების“ რისკსაც კი აჩენს.
ოპოზიციური ტელეგრამ არხის «Записки наблюдателя» ავტორი ფიქრობს, რომ გაგლოევმა შეძლო ხელისუფლებით უკმაყოფილო მოქალაქეების გაერთიანება მის გარშემო:
„ალან გაგლოევი, უნდა ეს მას თუ არა, ოსი ხალხის სინდისის სიმბოლოც გახდა და მისი კოლექტიური გამოვლინებაც. ამომრჩევლებმა მისი დაიჯერეს და რაც მთავარია, ოპოზიცია საბოლოოდ ერთი კანდიდატის გარშემო გაერთიანდა. ახლა, როცა ცნობილია არჩევნების მეორე ტურის შესახებ, რომელმაც უნდა უზრუნველყოს არსებული რეჟიმის საბოლოო ჩამოშლა, ალანს არ აქვს სისუსტის გამოვლენისა და გულუბრყვილობის უფლება. მან არ უნდა დაიწყოს მოლაპარაკება არც თავად ანატოლი ბიბილოვთან და არც მის მოსკოველ კურატორებთან”.
ოპოზიციის გეგმები
რაც შეეხება ოპოზიციის კონსოლიდაციას, ჯერჯერობით უცნობია, აჰყვებიან თუ არა დამარცხებულ ოპოზიციურ კანდიდატებს მათი მხარდამჭერები. დაუჭერენ თუ არა ისინი მხარს გაგლოევის კანდიდატურას, თუ მულდაროვი, პლიევი და ტასოევი მათ გაგლოევისთვის ხმის მიცემისკენ მოუწოდებენ.
ამავდროულად, ასეა თუ ისე, ამ სამი ოპოზიციონერის მხარდაჭერამ შესაძლოა 24 აპრილის კენჭისყრის შედეგზე გავლენა იქონიოს.
მანამდე ალექსანდრე პლიევის კანდიდატურას მხარი დაუჭირა თავდაცვის ყოფილმა მინისტრმა იბრაგიმ გასეევმა, რომელსაც არჩევნებში მონაწილეობის უფლება არ მისცეს. სავარაუდოდ, მისი ფინანსური რესურსები დამარცხებული პლიევიდან გაგლოევისკენ გადაინაცვლებს.
ამასთან, ჯერჯერობით უცნობია, ვის მხარეს დაიკავებს ცხინვალის გავლენიანი მკვიდრი, ჩრდილოეთ ოსეთის პარლამენტის დეპუტატი, რუსეთის თავისუფალი სტილით მოჭიდავეთა ნაკრების მთავარი მწვრთნელი ძამბოლატ თედეევი.
როგორც ცნობილია, მან საჯაროდ დაუჭირა მხარი სამხრეთ ოსეთის რუსეთში შესვლის ინიციატივას.
თავისი მკაფიო პოზიცია ჯერ არ გამოუთქვამს ექსპრეზიდენტ ედუარდ კოკოითს, რომელიც მხარს უჭერდა რუსეთთან და ბელორუსთან საკავშირო სახელმწიფოს შექმნას და ცხინვალის დამოუკიდებელი სტატუსის შენარჩუნებას.
არჩევნებამდე რამდენიმე დღით ადრე, მოულოდნელად, ბიბილოვმა იგი დონბასში, ოს სამხედრო პერსონალთან და მოხალისეებთან ურთიერთობის საკითხებში, პრეზიდენტის სპეციალურ წარმომადგენლად დანიშნა. კოკოითი ასევე ცხინვალის რუსეთში შესვლის შესახებ რეფერენდუმის ჩატარების საინიციატივო ჯგუფის წევრიცაა.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
