"ჩივნინგის" სტიპენდიის არსებობა აფხაზეთში - რატომ არის ეს მნიშვნელოვანი

“ჩივნინგის” სტიპენდიის არსებობა აფხაზეთში

ადგილობრივი ექსპერტები და სტუდენტები მიიჩნევენ, რომ “ჩივნინგის” სტიპენდიის პროგრამის ხელმისაწვდომობა აფხაზეთში განათლების სფეროში ბოლო წლების ერთ-ერთი ყველაზე მნიშვნელოვანი მიღწევაა, რადგან აფხაზ ახალგაზრდებს საზღვარგარეთ განათლების მიღების უნიკალურ, თითქმის ერთადერთ შესაძლებლობას აძლევს, და ამავდროულად, მათ შეუძლიათ „სხვა ადამიანების ნახვა და საკუთარი შესაძლებლობების რეალიზება“.

ჩვენ ვესაუბრეთ ზოგიერთ ექსპერტსა და “ჩივნინგის” სტიპედიანტს აფხაზეთში, მაგრამ ზოგიერთმა მათგანმა უარი თქვა საკუთარი სახელებისა და ფოტოების გამოქვეყნებაზე, რადგან ეშინიათ, რომ ეჭვმიტანილი იქნებიან „დასავლეთისთვის აგენტურულ მუშაობაში“ იმ მოტივით, რომ საზღვარგარეთ სწავლობდნენ.

რა არის “ჩივნინგი”

“ჩივნინგი” (Chevening) არის სასტიპენდიო პროგრამა, რომელიც საშუალებას გაძლევთ უფასოდ ისწავლოთ სამაგისტრო პროგრამაზე ნებისმიერ, თუნდაც ყველაზე პრესტიჟულ ბრიტანულ უნივერსიტეტში. პროგრამა დააარსა დიდი ბრიტანეთის მთავრობამ 1983 წელს და ფინანსდება საგარეო საქმეთა სამინისტროსა და პარტნიორი ორგანიზაციების მიერ.

სტიპენდია ეძლევა მსოფლიოს 200-ზე მეტი ქვეყნის მოქალაქეს, მათ შორის სტუდენტებს პოსტსაბჭოთა სივრციდან – პროგრამის არსებობის განმავლობაში სულ 50 000-ზე მეტი სტიპენდია გაიცა.

პროგრამის მთავარი მიზანია მომავალი ლიდერებისთვის საერთაშორისო ურთიერთობების გაძლიერება, რისთვისაც მათთვის, არა მხოლოდ სწავლის საფასურის გადახდა ხდება, არამედ განვითარებულია კურსდამთავრებულთა შემდგომი ურთიერთობებიც.

• ორმაგი მოქალაქეობა აფხაზეთში: არა ფუფუნება, არამედ მგზავრობის საშუალება
• როგორ შეხვდნენ ერთმანეთს ბერლინში აზერბაიჯანელი, სომეხი და ქართველი. ფილმი “დოლმის დღიურები”

რუსტამი, ექსპერტი განათლების სფეროში

დიდი ხნის განმავლობაში სხვადასხვა საერთაშორისო პლატფორმებზე ვსაუბრობდით აფხაზი ახალგაზრდებისთვის საზღვარგარეთ სწავლის შესაძლებლობის მინიჭების აუცილებლობაზე. 2016 წელს ბრიტანეთში გავიცანი კაცი და გამოვთქვი უკმაყოფილება ჩვენი რესპუბლიკის სამყაროსგან იზოლაციის გამო. მან იკითხა, რა გვაკლდა და რა შეიძლება გაკეთდეს. კონსულტაციებს გავუწიე კოლეგებს და შევთავაზე, რომ ყველაზე მისაღები ვარიანტი იქნებოდა “ჩივნინგის” პროგრამის დაწყება აფხაზეთში.

ამისთვის მათ შევთავაზე, რომ სამხრეთ კავკასია ერთგვარ ქოლგა ორგანიზაციად ქცეულიყო, ტერიტორიულად და გეოგრაფიულად აფხაზეთი ხომ სამხრეთ კავკასიის ნაწილია. ეს კაცი ბრიტანეთიდან დავპატიჟე აფხაზეთში, არაერთი შეხვედრა გავმართეთ ახალგაზრდებთან, სამთავრობო ორგანიზაციებისა და სამოქალაქო საზოგადოების წარმომადგენლებთან. ასე რომ, ჩვენ შევძელით ამ პროექტის დაწყება – სამხრეთ კავკასია დაემატა იმ ქვეყნების სიას, საიდანაც სტუდენტს შეუძლია შეიტანოს განაცხადი.

ტექნიკურად, რუსეთის პასპორტის მქონე სტუდენტებს აფხაზეთიდან შეუძლიათ განაცხადი რუსეთიდანაც შეიტანონ, მაგრამ ამ შემთხვევაში ისინი კონკურენციას გაუწევენ სტუდენტებს მთელი რუსეთიდან – ადამიანებს, რომლებსაც განვითარების სრულიად განსხვავებული შესაძლებლობები აქვთ. ამიტომ მინდოდა, რომ ჩვენი ახალგაზრდობა პროგრამაში მხოლოდ სამხრეთ კავკასიიდან ჩართულიყო.

პირველ წელს 15 განაცხადი შევიდა და მათგან მხოლოდ ხუთი იყო სწორად შევსებული. ეს იყო ძალიან დიდი იმედგაცრუება – აპლიკაციების შევსება რთულია, მაგრამ შემდეგ წელს ყველაფერი გაუმჯობესდა.

იმ დროის განმავლობაში, რაც აფხაზეთში “ჩივნინგის” სტიპენდია ხელმისაწვდომი გახდა, ათზე მეტმა ადამიანმა უკვე გაიარა ის. ესენი არიან ადამიანები ძალიან განსხვავებული სფეროებიდან, არა მხოლოდ პოლიტოლოგები და კონფლიქტოლოგები – როგორც შეიძლება ეს ასე ჩანდეს – არამედ ისინიც, ვინც ხელოვნებით არის დაკავებული ან ტექნიკური სპეციალობა აქვს, მაგრამ მე მინდა შევიდეს მეტი განაცხადი პრაქტიკულ, სამეცნიერო სპეციალობებზეც.

მეჩვენება, რომ “ჩივნინგი” პოპულარულია აფხაზეთში. განსაკუთრებით იმის გათვალისწინებით, რომ პროგრამა არასდროს ყოფილა გაპიარებული – მხოლოდ ზეპირი გადმოცემით შემოვიფარგლებოდით. არ ვიტყვი, რომ პროცესი დაჩქარებულია, მაგრამ ინტერესი არ იკლებს, რაც აშკარად დადებითი ტენდენციაა. გასულ წელს პროგრამით ოთხი სტუდენტი სარგებლობდა და ეს აფხაზეთისთვის შესანიშნავი შედეგია.

მაგრამ ეს არ არის მხოლოდ სწავლა, ეს არის ახალ გარემოში ცხოვრებაც ფაქტობრივად, ჩვენი სტუდენტები ხდებიან აფხაზეთის ელჩები საზღვარგარეთ. ეს არის დიდი შესაძლებლობა, რომ ჩვენი ხმა მივაწვდინოთ ფართო აუდიტორიას.

ბევრ ჩვენგანს სჯერა, რომ ახალგაზრდა კაცი რომ წავა, იქ “ტვინს გამოურეცხავენ”, მაგრამ ვიცი, რომ ეს როგორც წესი პირიქით ხდება – ჯერ არც ერთ ჩვენგანს არ შეუცვლია პოზიცია და ეფექტურად გააჟღერა საკუთარი არგუმენტები ჩვენს, ასე ვთქვათ, ოპონენტებთან.

"ჩემი დიდი ბაბუა სელიკუ ხაშიგი მუსლიმი იყო, ბებიაჩემი კი ქრისტიანი" – წერილი აფხაზეთიდან

“ჩემი დიდი ბაბუა სელიკუ ჰაშიგი მუსლიმი იყო”

ასტა, აღმოსავლეთ ლონდონის უნივერსიტეტი, HR მენეჯმენტი, 2021 წელი

ყოველთვის ვიცოდი, რომ ოდესმე საზღვარგარეთ წავიდოდი სასწავლებლად. პერიოდულად ვეძებდი სტიპენდიებს მთელ მსოფლიოში და ვაკვირდებოდი მათ პირობებს.

2019 წელს, აფხაზეთის სახელმწიფო უნივერსიტეტის საერთაშორისო ურთიერთობების ფაკულტეტის ბოლო კურსზე, გადავწყვიტე “ჩივნინგის” სტიპენდიაზე განაცხადი შემეტანა. მაშინ, მართალია, შერჩევის რამდენიმე ეტაპი გავიარე, მაგრამ ინტერვიუს შემდეგ უარყოფითი პასუხი მივიღე. მე ფარხმალი არ დამიყრია – მქონდა შემოთავაზებები უნივერსიტეტებიდან და მე მათ ვთხოვე, რომ მომდევნო სასწავლო წელსაც შემენარჩუნებინა ადგილი. 2020 წელს აბსოლუტური დარწმუნებით განვაცხადე, რომ წელს აუცილებლად ავიღებდი სტიპენდიას. ეს ასეც მოხდა.

ძალიან საინტერესო იყო სწავლა და აბსოლუტურად ყველაფერი განსხვავდებოდა აფხაზეთში სწავლის ჩემი გამოცდილებისგან. მშვენიერი წელი იყო.

გავიცანი ბევრი ჭკვიანი და საინტერესო ადამიანი მსოფლიოს სხვადასხვა კუთხიდან. ძირითადად, ესენი იყვნენ ადამიანები, რომლებიც ჩემნაირი სტიპენდიით სწავლობდნენ. როგორც წესი, “ჩივნინგის” სტიპედიანტები ერთმანეთთან კონტაქტს ძალიან მარტივად ამყარებენ. ჩემთვის ეს იყო შესაძლებლობა მესაუბრა ჩემს პატარა რესპუბლიკაზე – უკვე ბევრი ჩემი იქაური მეგობარი გეგმავს აფხაზეთში ვიზიტს.

თუ გავითვალისწინებთ იმ იზოლაციას, რომელშიც ჩვენ ვარსებობთ, ეს არის დიდი შანსი არა მხოლოდ ხარისხიანი განათლების მისაღებად, არამედ ჩვენზე საუბრის, ჩვენი სიმართლის გავრცელებისთვის. ძალიან გაგვიხარდა, როცა ჩვენი დროშა “ჩივნინგის” სამიტის შემდეგ ოფიციალურ ვიდეოზე აღიმართა.

ილონა ხვარცკაია, ლონდონის კინოაკადემია, კინორეჟისორი, 2022 წელი

აქ სწავლა არ არის მხოლოდ ლექციები და სემინარები. ბევრი პრაქტიკული სამუშაო გვაქვს მსახიობებთან, ტექნოლოგიასთან. ამ კინოსკოლის თავისებურება ის არის, რომ აქ ბევრი პრაქტიკა და ცოტა თეორიაა.

მიმაჩნია, რომ საზღვარგარეთ სტიპენდიის მიღებისა და განათლების მიღების ნებისმიერი შესაძლებლობა, არის ჩვენ მიერ ჩვენი რესპუბლიკის განვითარებაში შეტანილი წვლილი.

თვეზე ცოტა მეტია რაც ლონდონში ვარ და ამ ხნის განმავლობაში ათეულობით ადამიანს შევხვდი. ვინც არ არის დსთ-დან, ყველამ არ იცის, საიდან მოვდივარ და დიდ ინტერესს იჩენს ჩვენდამი. მაგარია, როცა შენი ქვეყანის შესახებ ლაპარაკობ.

ედუარდ იეჟოვი, ლონდონის კინოაკადემია, კინორეჟისორი, 2022 წელი

ვსწავლობ კინოხელოვნებას, ეს არის ყოვლისმომცველი კურსი: რეჟისურა, განათება, ხმა და ა.შ. ძალიან მომწონს პროცესი, რადგან ბევრი პრაქტიკა გვაქვს. განათლებისადმი მიდგომა განსხვავებულია – აქ უფრო თვითგანათლებით ხარ დაკავებული, თანაც მუდმივად ჯგუფთან ხარ კონტაქტში.

“ჩივნინგი” არის გასაოცარი შესაძლებლობა იმ ადამიანისთვის, რომელსაც სურს მიიღოს განათლება დიდ ბრიტანეთში ყოველგვარი პოლიტიკური დანახარჯების გარეშე. გარდა ამისა, “ჩივნინგი” გაძლევთ საშუალებას გაეცნოთ ახალ ადამიანებს, გაუზიაროთ ინფორმაცია აფხაზეთის შესახებ. ვუთხრათ ვინ ვართ და რატომ ვარსებობთ. ყოველ ჯერზე კითხვაზე: “საიდან ხარ?” მე ვამბობ, რა ადგილია ეს და რა ისტორია გვაქვს ჩვენ.

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო