ჭიათურის მაღარო და ზესტაფონის ფერო ნახევარი წლით ჩერდება. შესაძლოა, 5400-მდე ადამიანი უმუშევრად დარჩეს
ჭიათურის მაღარო და ზესტაფონის ფერო გაჩერდა
პირველი ნომებრიდან საქართველოს ორი უმსხვილესი საწარმო – ჭიათურის მაღარო და ზესტაფონის ფერო აჩერებს მუშაობას.
ეს ინფორმაცია ბიზნეს-სააგენტო bm.ge მაღაროელებმა დაუდასტურეს. როგორც ერთ-ერთი მაღაროელი, ტარიელ მიქაცაძე სააგენტოს უყვება, შპს „მაღაროელის“კომპანიის წარმომადგენელი თემურ ხონელია თანამშრომლებს გუშინ, 30 ოქტომბერს შეხვდა და განუცხადა, რომ კომპანია ექვსი თვით, 2025 წლის აპრილამდე აჩერებდა მუშაობას. მანვე შეხვედრაზე განაცხადა, რომ დასაქმებულები ამ პერიოდის განმავლობაში დასაქმებულები ხელფასის მხოლოდ 60 პროცენტს მიიღებდნენ.
“შეხვედრას პირადად არ ვესწრებოდი, თუმცა მაღაროელებს უთხრეს, რომ 6 თვით წყდება მუშაობა, ამ ეტაპზე, უმუშევრად რჩება 5 400-ზე მეტი ადამიანი”, – უთხრა bm.ge-ს მიქაცაძემ.
მისი თქმით, კომპანიის წარმომადგენელმა თანამშრომლებს აჩვენა დოკუმენტაცია, რომ მთავრობა საწარმოების გაჩერების ნებართვას იძლევა.
“თუ სახელმწიფომ შეისწავლა და ნამდვილად კრიზისშია კომპანია, მაშინ აიღოს თავის თავზე პასუხისმგებლობა და გადაგვიხადოს დარჩენილი თანხა, ან უზრუნველგვყოს სამსახურებით”, – განაცხადა ტარიელ მიქაცაძემ და დასძინა, რომ უმუშევრად დარჩენილი თანამშრომლები განცხადებას აუცილებლად გააკეთებენ, თუმცა ამ ეტაპზე დაგეგმვის პროცესში არიან.
მისი თქმით, ჭორები იმის თაობაზე რომ საწარმო შესაძლოა გაჩერებულიყო, თანამშრომლებმა მანამდეც გაიგეს.
“თავიდან ამბობდნენ, რომ საწარმოები გაჩერდებოდა 3 თვე, თუმცა გუშინ საღამოს გვითხრეს, რომ საუბარია სამუშაო პროცესის 6 თვემდე გაჩერებაზე. თანამშრომლებისთვის პირობები მიუღებელია, 60 პროცენტიანი ანაზღაურება საკმარისი არ არის, რადგან საბანკო ვალდებულებები აქვთ,” – ამბობს მიქაცაძე.
მიქაცაძის ინფორმაციით, ზესტაფონის ფეროშენადნობთა ქარხანაში 1800 ადამიანი მუშაობს, ხოლო ჭიათურის მაღაროში 3600-მდე.
“ასე მოულოდნელად, გაფრთხილების გარეშე ადამიანების გაშვება სახლში, არ შეიძლება. მარტივი მდგომარეობის წინაშე არ ვართ”, – თქვა მიქაცაძემ.
bm.ge ცდილობს დაუკავშირდეს
ამ საწარმოების 100%-იანი წილების მფლობელი კომპანია “ჯორჯიან მანგანეზია”, თუმცა მედიის. წარმომადგენლები აღნიშნავენ, რომ მათთან დაკავშირება ამ დრომდე ვერ ხერხდება. კომპანიის წარმომადგენელი ჯერ კიდევ რამდენიმე დღის წინ bm.ge–სთან საუბარში ამბობდა, რომ შუქრუთის მაღაროს მფლობელი კომპანია ფინანსური კრიზისის წინაშე დგას და გამორიცხული არ არის, მძიმე შედეგების წინაშე დადგეს.
საქართველოს სტატისტიკის ეროვნული სამსახურის მონაცემებით, ფეროშენადნობები საქართველოს ერთ-ერთი მთავარი საექსპორტო საქონელია – მესამე ადგილზეა
საქართველოდან გატანილი საექსპორტო საქონლის ათეულში.
