ოფიციალურმა ბაქომ რუსეთის საგარეო საქმეთა სამინისტროს ნოტა გაუგზავნა ჩეჩნეთში დაკავებულ აზერბაიჯანელებთან დაკავშირებით, რომლებსაც, სავარაუდოდ, უკრაინასთან ომის ზონაში იძულებით გაგზავნიან.
როგორც APA-ს მოსკოვის კორესპონდენტს დიპლომატიურმა წყაროებმა განუცხადეს, რუსეთის საგარეო საქმეთა სამინისტროსთვის გაგზავნილ ნოტაში საუბარია ჩეჩნეთში დაკავებულ აზერბაიჯანელ მოქალაქეებზე – ნიჰად რზაევზე, ელხან შირინოვზე და ვუგარ მაჰარამოვზე.
ერთი დღით ადრე აზერბაიჯანულ მედიაში გავრცელდა ინფორმაცია აზერბაიჯანელების შესახებ, რომელთა უკრაინასთან ომში იძულებით გაგზავნა სურთ.
”ჩემი შვილი რზაევი ნიჰად ტაფდიგ ოღლუ, ისევე როგორც ჩემი სიძე, შირინოვი ელხან აკბერ ოღლუ და მაგერამოვ ვუგარ ნაზიმ ოღლუ, რომლებიც მაისში სამუშაოდ გაემგზავრნენ ჩეჩნეთში, ამჟამად დაკავებულები არიან მიგრაციის პრობლემების გამო,” – თქვა ტაფდიგ რზაევმა, თოვუზის რაიონის მცხოვრებმა.
რზაევის თქმით, სამხედროების ზეწოლის ქვეშ მათ სურთ მისი ნათესავების გაგზავნა უკრაინის საბრძოლო ზონაში.
Qafqazinfo დაუკავშირდა ელხან შირინოვს და ვუგარ მაჰარამოვს, რომლებიც ჩეჩნეთის დედაქალაქ გროზნოში მდებარე ჩრდილოეთ ახმატის სამხედრო ნაწილში არიან მოთავსებულნი.
ელხან შირინოვის თქმით, რომელსაც აიძულეს ხელი მოეწერა დოკუმენტზე, სულ ხუთი აზერბაიჯანელი დააკავეს:
„ჩვენ ორი (ვუგარ მაჰარამოვი და ელხან შირინოვი – რედ.) ახლა სამხედრო ნაწილში ვართ, დანარჩენი სამი ციხეშია, მათ შორის ნიჰადი. აქ ადრე ორი აზერბაიჯანელი მოიყვანეს. მათ, ალბათ, დოკუმენტებზე ხელის მოწერასაც აიძულებენ.
ჩვენ სამივე მიგრანტად დაგვაკავეს საბუთების გამო. დაკავების ცენტრში შემოგვთავაზეს ჯარში წასვლა, მაგრამ უარი ვთქვით. ამის შემდეგ იძულებული გავხდით, ცარიელ დოკუმენტზე ხელი მოგვეწერა, შემდეგ კი გადაგვიყვანეს სამხედრო ნაწილში, სადაც ახლა ვართ.
გვითხრეს, რომ თუ გაქცევას ვეცდებით ან უარს ვიტყვით [ომში წასვლაზე], გაგვიყვანენ დაგვხვრეტენ.
სარდაფში ჩაგვაგდეს და გვაწამეს. რისთვის და ვისთვის უნდა წავიდე საბრძოლველად უკრაინაში?“ – ამბობს ვუგარ მაჰარამოვი.
