თბილისი დაემშვიდობა ბუბა კიკაბიძეს. არტისტი ვერის სასაფლაოზე დაკრძალეს. ფოტორეპორტაჟი
ბუბა კიკაბიძის დაკრძალვა
ათასობით ადამიანი მივიდა დღეს თბილისის მთავარ საკონცერტო დარბაზში – ფილარმონიაში, რათა ბოლო გზაზე გაეცილებინათ ქართველი მომღერალი და მსახიობი ვახტანგ კიკაბიძე.
კიკაბიძე 84 წლის ასაკში 15 იანვარს გარდაიცვალა.
მთელი პროცესიის განმავლობაში ბუბა კიკაბიძის სიმღერები ისმოდა, ეკრანზე კი კადრებად გადიოდა ნაწყვეტები მისი კინოფილმებიდან.
ფილარმონიაში მივიდნენ რიგითი მოქალაქეები, პოლიტიკოსები, მომღერლები, მსახიობები და საზოგადოების სხვა წევრები.
ლანა ღოღობერიძე: “ბოლო პერიოდში გამოჩნდა, ვინ იყო ბუბა – ჯერ კიდევ მაშინ, როდესაც უარი თქვა რუსეთში წასვლაზე, შემდეგ კი, როდესაც კიევის მეტროში იმღერა – ის იყო სიმბოლო ყველაფერი კარგისა, რაც საქართველოშია“.
დაკრძალვას დაესწრნენ დელეგაციები სხვადასხვა ქვეყნებიდან – სომხეთიდან, აზერბაიჯანიდან, უკრაინიდან.
ბუბა კიკაბიძე უკრაინის დიდი გულშემატკივარი იყო. საქართველოს დროშასთან ერთად მიცვალებულს უკრაინის დროშაც ჰქონდა გადაფარებული.
დაკრძალვის ცერემონიალზე დასასწრებად უკრაინის კულტურისა და საინფორმაციო პოლიტიკის მინისტრი, ალექსანდრ ტკაჩენკო ჩამოვიდა. მან დარბაზში პრეზიდენტ ვოლოდიმირ ზელენსკის წერილი წაიკითხა.
“უკრაინელები მადლობას უხდიან ვახტანგ კიკაბიძეს რუს აგრესორთან ბრძოლაში მხარდაჭერისთვის. ვახტანგ კიკაბიძის სახელი უკრაინის ისტორიაში ჩაიწერება, როგორც დიდი ქართველის სახელი, რომელმაც თავისი წვლილი შეიტანა უკრაინის დამოუკიდებლობისა და სუვერენიტეტის დაცვაში. ჩვენ ყოველთვის გვემახსოვრება და არასდროს დავივიწყებთ ამას,” – აღნიშნულია წერილში.
ტკაჩენკომ რამდენიმე სიტყვა ქართულადაც წარმოთქვა. “როდესაც რუსეთ-უკრაინის ომის დროს ჩვენს ქვეყანაში იღუპებიან, ამბობენ – გმირები არ კვდებიან, ეს სრულად ეხება ვახტანგ კიკაბიძეს,”– თქვა მან.
ბუბა კიკაბიძეს ყვავილების გვირგვინი გამოუგზავნეს უკრაინაში მებრძოლმა ქართველმა მეომრებმა.
სამოქალაქო პანაშვიდზე სამძიმრის წერილი გამოგზავნა კათოლიკოს-პატრიარქმა ილია მეორემ, რომელმაც ჯანმრთელობის მდგომარეობის გამო ვერ მოახერხა პროცესიაზე დასწრება.
„უკანასკნელი მეფაიტონე ემშვიდობება თბილისს“ – ეს სიმღერა ისმოდა, როდესაც ბუბა ფილარმონიიდან გამოასვენეს. ხალხი უწყვეტად უკრავდა ტაშს. ისმოდა შეძახილები „ბუბა, ბუბა“.
ბუბა კიკაბიძე, მისი ანდერძის თანახმად, არა საზოგადო მოღვაწეთა პანთეონში, არამედ ვერის სასაფლაოზე დაკრძალეს – დედის გვერდით.
ბუბა კიკაბიძის პანაშვიდზე არ მისულა პრეზიდენტი სალომე ზურაბიშვილი. მან ოჯახს ფეისბუკზე მიუსამძიმრა. დაკრძალვაზე არ ყოფილა არც “ქართული ოცნების” დამფუძნებელი ბიძინა ივანიშვილი.
კიკაბიძე ბოლო წლებში ექს-პრეზიდენტ მიხეილ სააკაშვილის პარტიის, “ნაციონალური მოძრაობის” წევრი იყო და ამ პარტიის სიით პარლამენტშიც შევიდა.
2008 წლის ომის შემდეგ ბუბა კიკაბიძემ უარი თქვა რუსეთში ჩასვლასა და იქ სიმღერაზე და ყველა ჯილდო, რაც კი რუსეთის ფედერაციაში ჰქონდა მიღებული, უკან დააბრუნა.
