ბრიყვული და სამარცხვინო - ასე აფასებენ ექსპერტები თბილისის რეაქციას სააკაშვილის შესაძლო დანიშვნაზე უკრაინაში

საქართველოს ყოფილ პრეზიდენტს, მიხეილ სააკაშვილს უკრაინის პრეზიდენტმა ვოლოდიმერ ზელენსკიმ რეფორმების მიმართულებით უკრაინის ვიცე-პრემიერის თანამდებობა შესთავაზა.

თბილისში ამ ინფორმაციას მწვავედ შეხვდნენ. ჯერ კიევში გადაწყვეტილება მიღებული არ არის და საქართველოს ხელისუფლების წარმომადგენლები უკრაინასთან ურთიერთობის გაფუჭებას აანონსებს და ერთმანეთის მიყოლებით საკმაოდ რადიკალურ განცხადებებს აკეთებენ.

პრემიერ-მინისტრმა გიორგი გახარიამ თქვა, რომ თუ სააკაშვილი მართლა დაინიშნება ვიცე-პრემიერად, თბილისი მზადაა ელჩიც კი გამოიწვიოს უკრაინიდან მინიმუმ კონსულტაციისთვის.

პარლამენტის სპიკერმა არჩილ თალაკვაძემ უკრაინის რადას სპიკერს დმიტრო რაზუმკოვს წერილი მისწერა, სადაც აღნიშნა, რომ სააკაშვილის დაწინაურება „შეარყევს ურთიერთნდობას ჩვენს სახელმწიფოებს შორის”.

ეს დანიშვნა თბილისში “აღქმული იქნება, როგორც არამეგობრული და მიუღებელი ნაბიჯი სტრატეგიული პარტნიორისგან“, ამბობს
უკრაინაში საქართველოს ელჩი თეიმურაზ შარაშენიძე.

„ჩვენ რეაქცია ბუნებრივია, აუცილებლად გვექნება, რადგან ასეთი რამ თუ მოხდა, პირდაპირ შეიძლება ითქვას, ეს იქნება არამეგობრული ნაბიჯი”, – განაცხადა საპარლამენტო უმრავლესობის წევრმა, ირაკლი კობახიძემ.

რას ფიქრობენ ქართველი ექსპერტები სააკაშვილის შესაძლო ახალ პოსტზე და როგორ აფასებენ საქართველოს ხელისუფლების რეაქციას ზელენსკის შეთავაზებაზე:

______________________________________________________________________________

შერიგებისა და სამოქალაქო თანასწორობის საკითხებში ყოფილი მინისტრი, პაატა ზაქარეიშვილი:

აბსოლუტურად ულოგიკოა ის რეაქცია, რაც საქართველოს ხელისუფლებას ჰქონდა ამ ამბავზე. სამარცხვინო რეაქცია ჰქონდა. აშკარად ჩანს, რომ ჩვენს ხელისუფლებას არ შესწევს უნარი, ადეკვატური იყოს მოვლენებთან. ნოტებით და  მუქარით ლაპარაკი და საუბარი ელჩის გამოწვევაზე, მიუთითებს იმაზე, რომ  საერთოდ ვერ აღიქვამენ რეალობას. 

ეს კაცი [სააკაშვილი] არის ტაკიმასხარა, პოპულისტი, ავანტიურისტი, ვოლუნტარისტი, არაფრისმკეთებელი და ერთ წელიწადში ჩამოიშლება. ჩვენ ამ რეაქციით ვაღიარებთ, რომ თურმე სააკაშვილი არის რეფორმატორი, საქმის მკეთებელი და ჩვენ ახლა პრობლემები შეგვექმნება, თუ იქ სააკაშვილმა წარმატებას მიაღწია.

საბავშვო ბაღის დონის ქცევა იყო. ძალიან უსუსურები გამოჩნდნენ. იმის ნაცვლად, რომ გველაპარაკა, რა პრობლემები აქვს ზელენსკის და რატომ სჭირდება მას ეს ტაკიმასხარა სააკაშვილი, ჩვენ გვიწევს ლაპარაკი ჩვენს უდღეურ ხელისუფლებაზე. 

ზელენსკი არის კრიზისში, ვერაფრით ვერ პასუხობს იმ გამოწვევებს, რაც ქვეყანაშია და ამიტომ სჭირდება სააკაშვილი, რომ ერთი-ორი წლით ყურადღება გადაიტანოს პოპულიზმზე. ყველა ვნახავთ, რაც მოუვა სააკაშვილს ერთ წელიწადში…

უკრაინა ჩვენი მოკავშირეა, ჩვენი კონცეპტუალური მოკავშირეა. ჩვენ ერთად მივდივართ ნატოში. ჩვენ შეიძლება ერთად წავიდეთ ევროკავშირში. ჩვენ ერთ კალათაში ვართ და ამ დროს ასეთი უსაფუძვლო, თითიდან გამოწოვილი პრობლემა შევქმენით. გაუგონარი ამბავი მოხდა ცარიელ ადგილზე. უკრაინა რომ რუსეთისკენ წასულიყო, ან მაგალითად, უარი ეთქვა ნატოში შესვლაზე, კიდევ ხო. ვიღაც ტაკიმასხარას დონეზე დასვლა ჩემთვის არის გამაოგნებელი.

პოლიტოლოგი გია ნოდია:

საქართველოს ხელისუფლების რეაქცია სააკაშვილის (შესაძლო) დანიშვნაზე ბრიყვულია და მხოლოდ შიდა ფაქტორებით აიხსნება.

რამდენად და რაში გამოადგება ზელენსკის სააკაშვილი არ ვიცი და ვაღიარებ, რომ მისი გადაწყვეტილება მიკვირს. არც სააკაშვილისთვის უნდა იყოს, ჩემი აზრით, ვიცე-ზე დაწყებული თანამდებობა დიდად საპატიო. მაგრამ ეს მათი საქმეა.

ზელენსკის (ისევე როგორც მანამდე პოროშენკოს) გადაწყვეტილება რომ სერიოზულად არ იღებს საქართველოს სასამართლოს განაჩენს, ეს ცხადია, მტკივნეულია ხელისუფლებისთვის. მაგრამ ვინმე იღებს სერიოზულად ჩვენს სასამართლოს (მათ შორის საქართველოში, მათ შორის თვით ოცნების ხელისუფლებაში), რომ უკრაინამ მიიღოს?

ის არგუმენტი, რომ უკრაინა საქართველოსთან პარტნიორობას უნდა გაუფრთხილდეს, თეორიულად მართალია. მართლა რომ არსებობდეს ასეთი სტრატეგიული პარტნიორობა, უკრაინას ნამდვილად უნდა შეეკავებინა თავი ასეთი ჟესტისგან. მაგრამ ამ მთავრობის ხელში ოდესმე უგრძვნია უკრაინას მხარდაჭერა საქართველოს მხრიდან? ხოდა, ახლა რატომ უნდა გაუწიოს ანგარიში? – წერს ნოდია ფეისბუკში. 

გია ხუხაშვილი, პოლიტიკური მიმომხილველი:

რატომ ნიშნავს ზელენსკი სააკაშვილს?

1. ზელენსკიმ ვერ შეძლო კორუმპირებული სისტემის დანგრევა. შესაბამისად სჭირდება ბულდოზერი, რომელიც სისტემას შეაზანზარებს.

2. დააბალანსებს ავაკოვს, რომელსაც თვითონ ვერაფერი მოუხერხა.

3. ცივ წყალს გადაასხამს პოროშენკოს რევანშისტულ გეგმებს.

4. “თუ ვინმეს ვერ ერევი, იმეგობრე მასთან” – პრინციპით ერთ “ზანოზას” იშორებს. მოკლედ, მას უნდა შეტევის აქცენტები გადაიტანოს სააკაშვილზე და თვითონ არბიტრის როლში ჩადგეს. ის ფიქრობს, რომ უეჭველს თამაშობს.

თუ სააკაშვილი წარმატებული იქნა, დივიდენდებს თვითონ მიიღებს, თუ წააგო, ერთ პოტენციურ პრობლემას მოიშორებს. ამ ბრძოლებში კი მისი მტრები დასუსტდებიან. ჩვენი ხელისუფლება თვალებს აბრიალებს, იქ კი პოლიტიკა კეთდება, – წერს ხუხაშვილი თავის ფეისბუკზე.