ბიძინა ივანიშვილი პოლიტიკაში დაბრუნდა. რა თქვა მან თავის პირველ განცხადებაში
ბიძინა ივანიშვილი პოლიტიკაში დაბრუნდა
“ქართულმა ოცნებამ” წლის შემაჯამებელ ყრილობაზე პარტიის დამფუძნებელი, ბიძინა ივანიშვილი საპატიო თავმჯდომარედ აირჩია.
ყრილობამდე რამდენიმე წუთით ადრე გავრცელდა ინფორმაცია, რომ ივანიშვილი პოლიტიკაში ბრუნდება.
ეს ივანიშვილის პოლიტიკაში მესამედ “დაბრუნებაა”.
ივანიშვილმა პარტიის ოფისში პირველი განცხადება გააკეთა. მთავარი, რაც მან თქვა:
მან ისაუბრა გლობალურ გამოწვევებზე, როგორც მისი დაბრუნების ერთ-ერთ მიზეზზე__ ივანიშვილი ამბობს, რომ საქართველო დღეს რთული გამოწვევების წინაშე დგას. მისი თქმით, ქვეყნის გარშემო გეოპოლიტიკური ვითარება გართულდა და გამოწვევებიც გაიზარდა:
„შესაბამისად, გართულდა ქვეყნის წინაშე მდგარი ამოცანების შესრულებაც. ასეთ პირობებში, მცირე შეცდომაც კი ხელისუფლების მხრიდან, რომელსაც მმართველი პარტია წარმოადგენს, ქვეყანას ძალიან ძვირად შეიძლება დაუჯდეს. საქართველოს ეროვნული მიზნები არსებითად შესრულებულად მხოლოდ მას შემდეგ შეიძლება მივიჩნიოთ, როცა ეროვნულ თვითმყოფადობას ბოლომდე დავიცავთ, სახელმწიფოს სუვერენიტეტს სრულად აღვადგენთ, ქვეყანას გავაერთიანებთ და საგარეო პოლიტიკურ ამოცანებს შევასრულებთ – საქართველოს მთავარ საგარეო პოლიტიკურ ამოცანად დღეს ევროკავშირში ინტეგრაცია იკვეთება”.
● ვინ არის ოლიგარქი საქართველოში?
● ბიძინა ივანიშვილის ქონება ბოლო 10 წლის მაქსიმუმზეა – Bloomberg
● რა იმალება ვარდისფერი ფლამინგოს უკან? რეპორტაჟი დენდროლოგიური პარკიდან
ასევე, ივანიშვილმა მიანიშნა, რომ არსებობს გუნდის შიგნით დაპირისპირების საფრთხე და გუნდი არ არის გამართული:
“ოპოზიციის განადგურების პირობებში, იზრდება რისკები მმართველ გუნდში. ოპოზიციის არარსებობამ მმართველ პარტიას მარტივად შეიძლება თავბრუ დაახვიოს და მოადუნოს. გარდა ამისა, როდესაც გარეთ დასაპირისპირებელი არავინ გრჩება, ჩნდება ცდუნება, დაპირისპირება გუნდის შიგნით გამოიგონო. ასევე, ოპოზიციური კონტროლის არარსებობის პირობებში, კორუფციის რისკებიც მატულობს, რასაც საგანგებო დაზღვევა ესაჭიროება “ — ამბობს ბიძინა ივანიშვილი.
ივანიშვილი ამბობს, რომ მისი დაბრუნების ერთ-ერთი მიზეზი “ფაქტობრივად განადგულებული ოპოზიციაა”, რომელიც ვეღარ უწევს ოპონირებას ხელისუფლებას:
“სამწუხაროდ, ვიმეორებ – სამწუხაროდ, სრულად განადგურდა ოპოზიცია. განადგურდა პოლიტიკის ის სუბიექტი, რომელიც პოლიტიკურ სისტემაში მმართველი გუნდის კონტროლზეა პასუხისმგებელი. დანაშაულებრივი წარსულით დამძიმებული ოპოზიცია ხელისუფლების ჯანსაღი და ქმედითი კონტროლით არც მანამდე გამოირჩეოდა, მაგრამ ახლა მას კონტროლის მინიმალური რესურსიც კი აღარ დარჩა. ნაცვლად ოპოზიციური პარტიების ეფექტიანი კონტროლისა, ხელში შეგვრჩა სიცრუის ნიაღვარი, რომელიც ყოველდღიურად მოედინება მათი მედიასაშუალებებიდან და უკვე იმდენად გაცვდა, რომ მმართველ გუნდს მცირე დისკომფორტსაც კი ვეღარ უქმნის”.
მისი თქმით, ამ ყველაფერმა მიაღებინა მისთვის არასასიამოვნო გადაწყვეტილება, შემობრუნდეს პოლიტიკაში და დაიკაოს მმართველი პარტიის საპატიო თავმჯდომარის თანამდებობა.
ივანიშვილი ამბობს, რომ მის გუნდს წინასაარჩევნოდ არა დახმარება და გაძლიერება, არამედ კონტროლი და კონსულტაციები სჭირდება.
„ახლა რომ საპარლამენტო არჩევნები ტარდებოდეს, „ქართული ოცნება“ 90-100 მანდატს საარჩევნო კამპანიის გარეშეც მიიღებდა. შესაბამისად, ჩემი მთავარი მიზანი არა საარჩევნოდ პარტიის კიდევ უფრო გაძლიერება, არამედ ჭარბად მოძლიერებული გუნდის ადამიანური ცდუნებებისგან დაცვაა. მმართველი პარტია საჭიროებს ახალ სიმძიმის ცენტრს და მიმაჩნია, რომ ჩემს მიერ ამ ახალი სიმძიმის ცენტრის მისიის შესრულება დღეს დროული და აუცილებელია. ამისათვის, 2-3 კაცთან კონსულტაციები ვეღარ იქნება საკმარისი და მიმაჩნია, რომ ქვეყნის წინაშე მდგარი ამოცანების შესრულება ჩემსა და გუნდს შორის ბევრად უფრო ფართო კონსულტაციებს და კოორდინაციას საჭიროებს”.
ივანიშვილმა აღნიშნა, რომ ის იქნება “ქართული ოცნების” მხოლოდ საპატიო თავმჯდომარე და მთავარი მრჩეველი, გუნდის თავმჯდომარედ კი დარჩება ირაკლი კობახიძე.
● “ქართულ პოლიტიკაში ივანიშვილის გარდა სხვა ოლიგარქი არ არის” – პრეზიდენტი ივანიშვილს ღიად დაუპირისპირდა
● ევროკომისია რეკომენდაციას იძლევა, საქართველოს კანდიდატის სტატუსი მიენიჭოს. რა დათქმები მიიღო ქვეყანამ
ივანიშვილი ამბობს, რომ “ქართულ ოცნებას” სჭირდება მისი რჩევები:
ვფიქრობ, რომ ჩემი პოლიტიკური და ცხოვრებისეული გამოცდილება და შესაბამისი რჩევები ესაჭიროება გუნდს, რათა ჩვენი ქვეყანა საბოლოო გამარჯვებამდე მივიყვანოთ. ჩვენ გვაქვს შესაძლებლობა, ბოლომდე დავიცვათ ჩვენი ეროვნული თვითმყოფადობა, სრულად აღვადგინოთ სახელმწიფო სუვერენიტეტი და ქვეყნის ტერიტორიული მთლიანობა, საქართველო 2030 წლამდე მაღალშემოსავლიანი ქვეყნების რიგში ჩავაყენოთ და ევროკავშირში გავაწევრიანოთ. ჩვენი ვალია, ეს შესაძლებლობა სრულად გამოვიყენოთ და ამისათვის ძალ-ღონე არ უნდა დავიშუროთ“ — თქვა ბიძინა ივანიშვილმა.
ივანიშვილმა შეაქო კობახიძე:
“ის შესანიშნავად ახორციელებს პარტიის მენეჯმენტს და მომავალშიც ის შეასრულებს პარტიის მართვის ფუნქციას”.
კიდევ ვინ შეაქო ივანიშვილმა?
“ქართული ოცნების” სხვა ლიდერები ივანიშვილს არ უხსენებია. მათ შორის არც პრემიერი ღარიბაშვილი და არც ქალაქის მერი კახა კალაძე.
რა თქვა ივანიშვილმა საერთაშორისო სანქციებზე?
ჟურნალისტებმა ივანიშვილს ჰკითხეს, ხომ არ ბრუნდება ის იმის გამო, რომ საერთაშორისო სანქციების ეშინია. ამაზე ივანიშვილმა უპასუხა, რომ ფაქტობრივად უკვე სანქცირებულია მას შემდეგ, რაც უკრაინაში ომი დაიყო.
“ჩემმა ადვოკატებმა რამდენჯერმე თქვეს, რომ მე ვარ სანქცირებული. მე რეალურად სანქცირებუული ვარ, დე ფაქტო. ყველაზე უხეში მეთოდებით და ყველაზე უხეში გზებით. ყოველგვარი კანონის გვერდის ავლით. რაც დაიწყო უკრაინის ომი, იქიდან რეალურად სანქცირებული ვარ. ამიტომ ოპოზიცია ტყვილად ღელავს და ღია კარებს ამტვრევს”, – განაცხადა ივანიშვილმა.
2012 წელს “ქართული ოცნების” საპარლამენტო არჩევნებში გამარჯვების შემდეგ, პარტიის დამფუძნებელი ბიძინა ივანიშვილი საქართველოს პრემიერ-მინისტრად აირჩიეს. თანამდებობა მან 2013 წლის ნოემბერში დატოვა, თუმცა ხუთი წლის შემდეგ, 2018 წელს პოლიტიკაში კვლავ დაბრუნდა და “ქართული ოცნების” თავმჯდომარე გახდა. 2018 წელიც არჩევნების წელი იყო – ქვეყანაში საპრეზიდენტო არჩევნები ტარდებოდა. 2021 წელს მან პოლიტიკიდან წასვლის შესახებ განაცხადა. ოპოზიციასა და სამოქალაქო სექტორში მიაჩნიათ, რომ ბიძინა ივანიშვილი რეალურად პოლიტიკიდან არ წასულა და ამ დროის განმავლობაში პარტიას კულისებიდან მართავდა და ქვეყანაში მნიშვნელოვანი გადაწყვეტილებებს სწორედ ის იღებდა.
2024 წელს საქართველოში მნიშვნელოვანი საპაროლამენტო არჩევნებია.
