"ნებისმიერი მსგავსი ე. წ. შეთანხმება იურიდიული ძალის არმქონე და ბათილია" - საქართველოს საგარეო უწყება ბიჭვინთაზე

ბიჭვინთის სახელმწიფო აგარაკი

საქართველოს საგარეო საქმეთა სამინისტროს განცხადებით, აფხაზეთის ე.წ. პარლამენტის მიერ რუსეთის ფედერაციისთვის ბიჭვინთის აგარაკის გადაცემის შესახებ შეთანხმების რატიფიკაცია წარმოადგენს მორიგ უკანონო ქმედებას და რუსეთის მიერ საქართველოს განუყოფელი რეგიონების ოკუპაციის პოლიტიკის გაგრძელებას, რაც უხეშად არღვევს საერთაშორისო სამართლის ფუნდამენტურ პრინციპებს.

გადაწყვეტილებას გამოეხმაურა საქართველოს პრეზიდენტი სალომე ზურაბიშვილიც, რომელმაც X-ზე დაწერა:

“მკაცრად ვგმობ რუსების მიერ საქართველოს მიწების მორიგ მიტაცებას და მცოცავი ანექსიის პოლიტიკას. ხალხის ძლიერი რეაქცია, რომელსაც ჩვენ ბიჭვინთის აგარაკის გადაცემის გარშემო ვხედავთ, ოკუპაციის პირდაპირი შედეგია. საერთაშორისო საზოგადოებას ძლიერი და სასწრაფო რეაგირებისკენ მოვუწოდებ.”

27 დეკემბერს ე.წ. პრეზიდენტმა ასლან ბჟანიამ აფხაზეთის პარლამენტის მიერ მხარდაჭერილ კანონებს ხელი მოაწერა და ბიჭვინთაში მდებარე სახელმწიფო აგარაკის რუსეთისთვის იჯარით გადაცემა დაამტკიცა.

შედეგად, “რუსეთის ფედერაციისთვის აფხაზეთის რესპუბლიკის ტერიტორიაზე მდებარე ობიექტის საკუთრებაში გადაცემასა და მის გამოყენებაზე აფხაზეთის რესპუბლიკის მთავრობასა და რუსეთის ფედერაციის მთავრობას შორის  ხელშეკრულების რატიფიკაციაზე” კანონი ძალაში შევიდა.

საგარეო საქმეთა სამინისტროს განცხადება

“საერთაშორისო სამართლებრივი თვალსაზრისით ნებისმიერი მსგავსი სახის ე.წ. შეთანხმება იურიდიული ძალის არმქონე და ბათილია. შესაბამისად აფხაზეთის რეგიონის ოკუპაციის პირობებში ტერიტორიის გადაცემაზე გაფორმებულ ე.წ. შეთანხმებას ვერ ექნება რაიმე სახის სამართლებრივი შედეგი.

საქართველოს საგარეო საქმეთა სამინისტრო მიმართავს საერთაშორისო თანამეგობრობას, სათანადოდ შეაფასოს რუსეთის ფედერაციის მიერ საქართველოს სუვერენიტეტისა და ტერიტორიული მთლიანობის ხელყოფისაკენ მიმართული მორიგი უკანონო ნაბიჯი.” – ნათქვამია საგარეო საქმეთა სამინისტროს გავრცელებულ განცხადებაში.

უწყება მოუწოდებს რუსეთის ფედერაციას, პატივი სცეს საქართველოს სუვერენიტეტსა და ტერიტორიულ მთლიანობას და შეასრულოს მის მიერ ნაკისრი საერთაშორისო ვალდებულებები, მათ შორის ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შეთანხმება.

● ბიჭვინთის ცნობილი სახელმწიფო აგარაკი და 180 ჰექტარი ფიჭვნარი რუსეთის მფლობელობაში გადადის
● რა ტერიტორიების და ობიექტების მიღება სურს რუსეთს აფხაზეთისგან. კომენტარი
● “სამარცხვინო გადაწყვეტილება”. აფხაზეთის პარლამენტმა ბიჭვინთის სახელმწიფო აგარაკი რუსეთს გადასცა

27 დეკემბერს აფხაზეთის პარლამენტმა ბიჭვინთის სახელმწიფო აგარაკი რუსეთს გადასცა

აფხაზეთის პარლამენტმა მხარი დაუჭირა ბიჭვინთის სახელმწიფო აგარაკის რუსეთის ფედერაციისთვის იჯარით გადაცემას. გადაწყვეტილების შესახებ ინფორმაცია 27 დეკემბერს გამთენიისას გახდა ცნობილი, როცა სოხუმში, პარლამენტის წინ ბიჭვინთის გადაცემის საწინააღმდეგო დემონსტრაცია გრძელდებოდა.

აფხაზეთსა და რუსეთის ფედერაციას შორის შეთანხმება ბიჭვინთის ტერიტორიაზე მყოფი ობიექტების მოსკოვისთვის გადაცემაზე 2022 წლის 19 იანვარს გაფორმდა. ხელშეკრულება რუსეთისთვის 186 ჰექტარი მიწისა და 115 ჰექტარი აკვატორიის რუსეთისთვის 49 წლით იჯარით გადაცემას ითვალისწინებს.

აფხაზეთში ოპოზიციისა და საზოგადოების უმრავლესობის უკმაყოფილების არსი არ არის ობიექტის რუსეთისთვის გადაცემის ფაქტი. პრობლემა ის პირობებია, რაც ხელშეკრულების ტექსტშია შეტანილი.

ყველაზე დიდი აღშფოთება გამოწვეულია იმით, რომ შეთანხმებაში არასწორად იყო მითითებული რუსეთის საკუთრებაში გადაცემული აგარაკის კოორდინატები. აღმოჩნდა, რომ გარდა თავად აგარაკის ტერიტორიისა, 180 ჰექტარი, თავად ბიჭვინთის ტერიტორიის უმეტესი ნაწილი, რუსეთს უნდა გადაეცეს.

27 დეკემბერს, პარლამენტის თავმჯდომარემ ლაშა აშუბამ განაცხადა, რომ მთელი ღამის განმავლობაში მიმდინარეობდა კონსულტაციები ოპოზიციის წარმომადგენლებთან, რის შედეგადაც მომზადდა აფხაზეთის კანონმდებლობაში არაერთი ცვლილება, რომელმაც, არსებითად, უნდა გამოასწოროს ის ხარვეზები, რომლებიც კანონპროექტში აქამდე იყო.

პარლამენტის თავმჯდომარე აქციის მონაწილეებთან გავიდა და მიღებული გადაწყვეტილება თავად აცნობა:

„კოორდინატებთან დაკავშირებული ცვლილება მიიღო რუსეთის მხარემ და მივიღეთ ჩვენც, შეკითხვა დარჩა „მესამე მხარეებთან“ დაკავშირებით. შედგა შესაბამისი შეხვედრა ხელისუფლებისა და ოპოზიციის წარმომადგენლებს შორის, რომელზეც მივედით კონსენსუსამდე შესაბამის კანონებში ცვლილებების შეტანაზე.

ეს არის კანონი „საერთაშორისო ხელშეკრულებების შესახებ“, სამოქალაქო კოდექსი და სპეციალური კონსტიტუციური კანონი, რომელიც კონკრეტულად ეხება სახელმწიფო აგარაკის გადაცემას, სადაც ნათქვამია, რომ ობიექტის მესამე პირებზე გადაცემის შემთხვევაში ხელშეკრულება წყდება და ქონება უბრუნდება აფხაზეთის რესპუბლიკას“.

ბიჭვინთის სახელმწიფო აგარაკის კომპლექსი 1958-61 წლებში შენდებოდა, სსრკ-ს ცენტრალური კომიტეტის გენერალური მდივნის, ნიკიტა ხრუშჩოვის განკარგულებით.