ბი-ბი-სი-ს გამოძიება: გლობალური თაღლითური ქსელის უკან, შესაძლოა, დავით კეზერაშვილი იდგეს

bbc გამოძიება კეზერაშვილზე

ბი-ბი-სი აქვეყნებს ჟურნალისტურ გამოძიებას, რომლის თანახმად, საქართველოს ყოფილი თავდაცვის მინისტრი დავით კეზერაშვილი, შესაძლოა, დაკავშირებული იყოს გლობალურ თაღლითურ ქსელთან, რომელმაც ევროპელი მოქალაქეების მოტყუების გზით მილიარდზე მეტი დოლარი გამოიმუშავა.

საქმე ეხება ე.წ. ქოლცენტრების ფინანსური თაღლითობის სქემას, რომელსაც, ბი-ბი-სი წელიწადზე მეტ ხანს იძიებდა. ქსელი პოლიციისთვის ცნობილია როგორც მილტონის ჯგუფი. ბი-ბი-სი-ის ცნობით, მათ მოახდინეს 152-ზე მეტი ბრენდის იდენტიფიცირება, რომლებიც ამ ქსელში იყვნენ ჩართული. თაღლითური სქემის თანახმად, ურეკავდნენ ევროპელ მოქალაქეებს, სთავაზობდნენ მათ დანაზოგის სარფიან ინვესტირებას და კაპიტალის გაზრდას და თაღლითურად არიცხვინებდნენ სპეციალურ კრიპტოანგარიშებზე ათასობით, ზოგ შემთხვევაში კი ასიათასობით ევროსა თუ ფუნტს. იმისთვის, რომ პოტენციურ მსხვერპლებს ეჭვი არ გასჩენოდათ, თაღლითი-კომპანიები აქტიურად იყენებდნენ რეკლამას სოციალურ ქსელში.

როგორც ბი-ბი-სი აღნიშნავს, ისინი გავიდნენ კვალზე, თუ ვინ დგას ამ ქსელის უკან. დასახელებულია ხუთი ადამიანი, მათგან ოთხს ქართული გვარი აქვს და სავარაუდოდ, საქართველოს მოქალაქეები არიან. ესენი არიან: დავით თოდუა, რატი ჭელიძე, გურამ გოგეშვილი, ჯოზეფ მგელაძე და მაიკლ ბენიმინი.

ბი-ბი-სი წერს, რომ ეს სახელები და გვარები „პანამის დოკუმენტებში“ ფიგურირებდნენ და დავით კეზერაშვილთან არიან დაკავშირებულები.

ბი-ბი-სი აღნიშნავს, რომ ისინი დოკუმენტირებულად ვერ ადასტურებენ კეზერაშვილის კავშირს ამ თაღლითურ ქსელთან. ასევე, საგამოძიებო ჟურნალისტებმა ვერ მოიპოვეს კონკრეტული მტკიცებულებები, რომ კეზერაშვილს ფინანსური ინტერესი აქვს „მილტონ გრუპის“ ბრენდებში.

თუმცა, ჟურნალისტები ასახელებენ სხვა მნიშვნელოვან დეტალებს, რომლებიც მათი აზრით, შესაძლოა მიანიშნებდეს კეზერაშვილის კავშირზე ამ საქმესთან.

“ბევრის კვალი მიდიოდა ერთ ფიგურამდე: დავით კეზერაშვილამდე, საქართველოს მთავრობის ყოფილი მაღალჩინოსანი, რომელიც 2 წლის განმავლობაში ქვეყნის თავდაცვის მინისტრი იყო,” – წერია გამოძიებაში.

როგორც ჟურნალისტებმა მოიკვლიეს, “მილტონის ჯგუფამდე” არსებული ოფშორული და სასუბსიდიო კომპანიების დამფუძნებელად ან აქციონერად ფიგურირებდა დავით კეზერაშვილი.

ასევე, “მილტონის ჯგუფის” რამდენიმე ყოფილმა თანამშრომელმა ანონიმურად დაუდასტურა ბი-ბი-სის, რომ მათ კეზერაშვილთან პირდაპირი შეხება ჰქონდათ და ის “მილტონის ჯგუფში” იყო ჩართული. 

ჟურნალისტებმა გამოარკვიეს ისიც, რომ კეზერაშვილი საკუთარ სოციალურ მედიაზე ხშირად არეკლამებდა თაღლითურ სავაჭრო პლატფორმებს. ბიზნეს სოციალურ ქსელ LinkedIn-ზე ის საკუთარ ანგარიშს თითქმის ექსკლუზიურად იყენებდა მილტონთან დაკავშირებული კომპანიების სამუშაოების რეკლამირებისთვის და აზიარებდა მათ პოსტებს.

კიდევ ერთ სამხილად კეზერაშვილის წინააღმდეგ ბი-ბი-სი ასახელებს იმ ფაქტს, რომ რამდენიმე კომპანია, რომელსაც კეზერაშვილი ფლობდა, იყენებდა იმეილის კერძო სერვერს, რომლის ერთადერთი სხვა მომხმარებლებიც “მილტონის ჯგუფის” კომპანიები იყვნენ.

● ფორმულას დამფუძნებლის საქმეზე სააპელაციომ პირველი ინსტანციის გადაწყვეტილება ძალაში დატოვა
● ქოლცენტრების საქმე: საქართველოში უცხო ქვეყნის მოქალაქე დააკავეს და ტრანსნაციონალური დანაშაული გამოავლინეს
●”ფორმულას” დამფუძნებელს უზენაესმა სასამართლომ ხუთწლიანი პატიმრობა მიუსაჯა

კეზერაშვილს ასევე ეკუთვნის შენობა კიევში, რომელშიც თაღლითური ქოლ-ცენტრის ოფისი იყო განთავსებული. ნოემბერში ამ ოფისში პოლიციამ რეიდი მოაწყო.

ბი-ბი-სი წერს, რომ კეზერაშვილს ასევე თბილისში ეკუთვნის ოფისები, რომლებშიც ასევე განთავსებულია ზოგიერთი თაღლითური ფირმა.

როგორც ბი-ბი-სი წერს, მათ ასევე სკულპულოზურად შეამოწმეს “მილტონის ჯგუფის” მაღალი რანგის წარმომადგენელი ხუთი კაცის სოციალური მედიის პროფილები (დავით თოდუა, რატი ჭელიძე, გურამ გოგეშვილი, ჯოზეფ მგელაძე და მაიკლ ბენიმინი) და აღმოაჩინეს, რომ ოთხ მათგანს ახლო სოციალური კავშირი აქვს კეზერაშვილთან (ერთ-ერთი მისი ბიძაშვილია, წერს ბი-ბი-სი). მაგალითად, იპოვეს საერთო ფოტოები ქორწილის წვეულებებიდან და სხვა სოციალური ღონისძიებებიდან.

სტატიაში ასევე აღნიშნულია, რომ კეზერაშვილი არის “მილტონის ჯგუფის” თაღლითობასთან დაკავშირებული, სხვა, სულ მცირე, 45 ადამიანის ფეისბუკ-მეგობარი.

კეზერაშვილის ადვოკატებმა უთხრეს „ბი-ბი-სის“, რომ იგი მკაცრად უარყოფს “მილტონის ჯგუფთან” რაიმე კავშირს. ბი-ბი-სისთან ბრალდებებს უარყოფენ გურამ გოგეშვილი, რატი ჭელიძე და ჯოზეფ მგელაძეც. მაიკლ ბენიმინიმ კი ჟურნალისტების კითხვებს არ უპასუხა.

რა არის ქოლცენტრი

ე.წ. ქოლცენტრების საქმეზე ოპოზიცია და ხელისუფლება უკვე დიდი ხანია ერთმანეთს ადანაშაულებენ. საქართველოს პრემიერმინისტრი ირაკლი ღარიბაშვილი წინა ხელისუფლების მაღალჩინოსნის, დავით კეზერაშვილის ბრალეულობაზე საუბრობდა, ხოლო ყველაზე დიდი ოპოზიციური პარტიის, “ნაციონალური მოძრაობის” თავმჯდომარე ლევან ხაბეიშვილი – სახელმწიფო უსაფრთხოების სამსახურის უფროსის, გრიგოლ ლილუაშვილის.

ქოლცენტრების თაღლითური საქმიანობის მსხვერპლი ევროპის სხვადასხვა ქვეყანაში მცხოვრები მოქალაქეები არიან. კერძოდ, ე.წ. ქოლცენტრის თანამშრომლები, წინასწარ შემუშავებული გეგმის შესაბამისად, ცრუ სატელეფონო ნომრების გამოყენებით უკავშირდებოდნენ გერმანიისა და სხვა ქვეყნების მოქალაქეებს, ეცნობოდნენ გამოგონილი სახელებით, მათი კომპანიის ადგილსამყოფელის შესახებ აწვდიდნენ ყალბ ინფორმაციას და სთავაზობდნენ ფასიანი ქაღალდების, აქციების, სასაქონლო აქტივების, ვალუტების და კრიპტოვალუტების ელექტრონულ ვაჭრობაში მონაწილეობის მიღებას გამოგონილი ელექტრონული პლატფორმების გამოყენებით.

ოპერატორები მომხმარებლებს არწმუნებდნენ, რომ მათი დახმარებით ფასების ზრდა-შემცირებაზე ელექტრონული ვაჭრობის შემთხვევაში, შეძლებდნენ სოლიდური მოგების მიღებას. მომხმარებლისგან თანხმობის მიღების შემდგომ, მათგან ელექტრონული ვაჭრობისთვის გამოყოფილი თანხების განთავსება ხდებოდა დანაშაულებრივი ჯგუფის კონტროლის ქვეშ არსებულ საბანკო ანგარიშებზე.

ამის შემდეგ ეს თანხები თავსდებოდა ორგანიზებული ჯგუფის მიერ უცხოეთში დაფუძნებული კომპანიების ანგარიშებზე, საიდანაც ფიქტიური დანიშნულებით, თითქოსდა გაწეული მომსახურების სანაცვლოდ, ირიცხებოდა საქართველოში, მათივე კომპანიების ანგარიშებზე.

ამ სქემით, 2021 წელს, დამნაშავეებმა 9 490 991 ევროს, 716 642 დოლარისა და 218 000 ბრიტანული ფუნტი სტერლინგის უკანონო შემოსავლის ლეგალიზაცია მოახდინეს. მაშინ ტრანსნაციონალური დანაშაულის გახსნაზე პროკურატურამ ოფიციალური განცხადება გააკეთა. უწყების ინფორმაციით, საქართველოსა და ისრაელის მოქალაქეებმა ჩამოაყალიბეს შეთანხმებულად მოქმედი, სტრუქტურული ფორმის მქონე ორგანიზებული დანაშაულებრივი ჯგუფი, თაღლითურად დაეუფლნენ “გერმანიის მოქალაქეების კუთვნილ მილიონობით ევროს და დანაშაულებრივი გზით მიღებული უკანონო შემოსავლის ლეგალიზაცია მოახდინეს.”