ბელარუსი: გავრცელდა მომიტინგეების წამებისა და ცემის კადრები, დაიწყო საყოველთაო გაფიცვა
ევროკავშირის მხრიდან სანქციების დაწესების საფრთხის გამო, ბელარუსში იმ ადამიანების ციხიდან გათავისუფლება დაიწყეს, რომლებიც საპრეზიდენტო არჩევნების გაყალბების წინააღმდეგ გამართულ საპროტესტო აქციებში მონაწილეობისთვის დააკავეს.
ისინი, ვინც გარეთ გამოვიდნენ, საშინელ ისტორიებს ჰყვებიან პატიმრობის პერიოდში დაცინვისა და წამების შესახებ. ვიდეო და ისტორიები ქვემოთ.
ბელარუსის უმსხვილესი საწარმოები უერთდებიან პროტესტის ნიშნად საყოველთაო გაფიცვას. ტიხანოვსკაიამ და ლუკაშენკომ, ორივემ მიმართეს ხალხს, თუმცა, საწინააღმდეგო შეფასებებითა და მოწოდებებით.
ბელარუსში, პროტესტი 9 აგვისტოს, საპრეზიდენტო არჩევნების დღეს დაიწყო, სადაც ოფიციალური მონაცემებით, გამარჯვება ალექსანდრე ლუკაშენკომ მოიპოვა, რომელიც უკვე 26 წელია ქვეყანას მართავს.
• ბელარუსში სახელმწიფო არხებს ჟურნალისტები ტოვებენ
• სვეტლანა ტიხანოვსკაია – ბელარუსის პრეზიდენტობის ყველაზე უჩვეულო კანდიდატი
• რაში სჭირდება ვლადიმირ პუტინს ბელარუსი და რა იქნება შემდეგი ნაბიჯი
14 აგვისტოს, ცენტრალურმა საარჩევნო კომისიამ არჩევნების საბოლოო შედეგები გამოაქვეყნა: ლუკაშენკოს მხარი დაუჭირა – 80.1%-მა, ტიხანოვსკაიას – 10.1%-მა. არჩევნების არაღიარებასთან დაკავშირებული ყველა სარჩელი უარყვეს.
თუმცა, ათობით ათასი ადამიანი, რომლებიც ქუჩაში გამოვიდნენ, ამტკიცებენ, რომ სინამდვილეში, პრეზიდენტად სვეტლანა ტიხანოვსკაია აირჩიეს, არჩევნების შედეგები კი გაყალბებულია. გარკვეული დროის შემდეგ, ის იძულებული გახდა ქვეყანა დაეტოვებინა და ლიეტუვაში გადასულიყო. სავარაუდოდ, ხელისუფლება მის შვილებს ემუქრებოდა.
მინსკსა და სხვა ქალაქებში, უკვე ხუთი დღეა, ძალოვანები ქუჩაში სცემენ ადამიანებს, იყენებენ ხელკეტებს, რეზინის ტყვიებსა და ცრემლსადენ გაზს.
საერთო ჯამში, შვიდი ათასზე მეტი ადამიანი დააპატიმრეს.
«სრულიად აშიშვლებდნენ, ყველაფერი სისხლით იყო დაფარული, არ აძლევდნენ საჭმელ-სასმელს, არ უშვებდნენ ტუალეტში»
თვითმხილველთა განცხადებით, მილიცია ადამიანებს იჭერს ქუჩებსა და ეზოებში, არ აქცევს ყურადღებას იმას, თუ ვინ დგას მათ წინაშე – მოზარდი, ქალი თუ ხანდაზმული ადამიანი.
საბადრაგო მანქანებსა და ციხეებში პატიმრებს აიძულებდნენ, გვერდიგვერდ დაწოლილიყვნენ. სცემდნენ რეზინის ხელკეტებით, ფეხებით, თავის წამოწევის ან დალაპარაკების მცდელობისას კი იყენებდნენ ელექტროშოკებს.
ბევრი, განსაკუთრებით ქალი, ამბობს, რომ მათ გაუპატიურებით ემუქრებოდნენ.
ადამიანები რამდენიმე დღის განმავლობაში ჰყავდათ დაკავებული, სიცივეში, საჭმლისა და სასმლის გარეშე. ტუალეტში გაყვანის მოთხოვნაზე, პასუხობდნენ:
„სადაც ხართ, იქვე მოისაქმეთ, დიდი ხნის სიცოცხლე მაინც არ დაგრჩენიათ“.
რუსული საინფორმაციო ვებგვერდის, Znak.com-ის ჟურნალისტი, ნიკიტა ტელიჟენკო სამი დღის განმავლობაში იყო მინსკში დაპატიმრებული და გამოაქვეყნა საშინელი ისტორია იმის შესახებ, თუ რა გადაიტანა.
ის აღწერს ადამიანებს, რომლებიც საგამოძიებო იზოლატორში, ერთმანეთზე იწვნენ რამდენიმე რიგად, სისხლისა და ექსკრემენტების გუბეებში.
მათ არ აძლევდნენ არა მხოლოდ ტუალეტით სარგებლობის შესაძლებლობას, არამედ პოზიციის შეცვლის უფლებასაც კი.
ტელიჟენკო ამბობს, რომ ნახა მძიმედ დაჭრილი ადამიანები, დამტვრეული კიდურებითა და ძლიერი სისხლდენით. მათ არა მხოლოდ სამედიცინო დახმარების გარეშე ტოვებდნენ, არამედ, მცველები ხმის ამოღებაზეც კი ურტყამდნენ უფრო ძლიერად.
ტელიჟენკოს მონათხრობს ადასტურებს სოციალურ ქსელებში გამოქვეყნებული აურაცხელი პუბლიკაცია – ფოტო, ვიდეო, ისტორიები.
დაპატიმრებულთა მშობლები და ნათესავები დღეების განმავლობაში იდგნენ ციხეებისა და იზოლატორების კარებთან, მაგრამ ვერანაირი ინფორმაციის მიღებას ვერ ახერხებდნენ.
აღშფოთების გამოხატვის მცდელობისას ციხეებთან შეკრებილებსაც ასევე ურტყამდნენ.
ქუჩის პროტესტს შეუერთდნენ ექიმებიც.
მათი განცხადებით, ისეთი ტრავმები, როგორიც მათთან ციხიდან მიყვანილ პაციენტებს ჰქონდათ, ადრე არასოდეს ენახათ – ამობრუნებული სახსრები, დამსხვრეული კიდურები და გატეხილი თავები.
ოფიციალურად დადასტურებულია პროტესტის ორი მონაწილის სიკვდილი.
დაუდასტურებელი ინფორმაციით, დაიღუპა 34 ადამიანი.
პროტესტი იზრდება
გაფიცვა საყოველთაო გახდა – არ მუშაობს უმსხვილესი საწარმოები, პატარა ფირმები და საზოგადოებრივი ტრანსპორტი.
ყოფილი სამხედროები და პოლიციელები მასობრივად იღებენ ვიდეოებს, რომელშიც არმიასა და პოლიციას ხალხის მხარეს გადასვლისკენ მოუწოდებენ.
ათასობით ქალი დგება სოლიდარობის ჯაჭვში, ბელარუსის ყველა ქალაქში.
პროტესტის მონაწილეთა მოთხოვნები უცვლელი რჩება: ხელისუფლებიდან ალექსანდრე ლუკაშენკოს ჩამოშორება, სვეტლანა ტიხანოვსკაიას გამარჯვების აღიარება, ყველა პოლიტპატიმრის გათავისუფლება.
ტიხანოვსკაიამ და ლუკაშენკომ ორივემ მიმართა ხალხს
სვეტლანა ტიხანოვსკაიამ თანამემამულეებისადმი ვიდეომიმართვა ჩაწერა და პროტესტის გაგრძელებისკენ მოუწოდა, განსაკუთრებით გაუსვა ხაზი, რომ ის უნდა იყოს მშვიდობიანი და არაძალადობრივი.
ალექსანდრე ლუკაშენკომ უარყო ხმები იმის შესახებ, რომ ქვეყანა დატოვა. მან დემონსტრაციულად გამართა შეხვედრა სამშენებლო ინდუსტრიის წარმომადგენლებთან და თქვა, რომ ადგილი აქვს „შრომითი კოლექტივების მორყევის მცდელობას“, რაც ცუდ გავლენას ახდენს საწარმოების მუშაობაზე.
„გინდათ – გაიფიცეთ, გინდათ მუშაობა – იმუშავეთ“, – განაცხადა ლუკაშენკომ და აღნიშნა, რომ მისი ინფორმაციის თანახმად, გაფიცვების მონაწილეებსა და შეკრებილ მუშებს „ფულს უხდიან“.
