BBC "ქართულ ოცნებას" პასუხობს: ჩვენ ვიცავთ ჩვენს ჟურნალისტურ სამუშაოს
BBC “ქართულ ოცნებას” პასუხობს
BBC, რომელსაც საგამოძიებო ფილმის გამოქვეყნების შემდეგ “ქართული ოცნების” მთავრობა სამართლებრივი დავის წამოწყებით ემუქრება, მათ “ფორმულასთან” პასუხობს. BBC-ის სპიკერი ამბობს, რომ იცავენ ჟურნალისტურ სამუშაოს და მადლობას უხდიან მონაწილე “მამაც კონტრიბუტორებს.”
ასევე, სპიკერი კვლავ აღნიშნავს, რომ გამოძიება მოიცავს არაერთი წყაროს მტკიცებულებებს და ამბობს, რომ რეპორტაჟი “მტკიცედ” ემსახურება საზოგადოების ინტერესს.
“ჩვენი დოკუმენტური ფილმი, “როდესაც წყალი გწვავს: ბრძოლა საქართველოსთვის”, რომელიც ჯილდოს მფლობელმა BBC EYE-ს გუნდმა მოამზადა, თბილისში შარშან, დემონსტრანტების წინააღმდეგ საქართველოს მთავრობის ქმედებების გამოძიებაა. ის მოიცავს არაერთი წყაროს მტკიცებულებას, როგორც ქვეყნის შიგნით, ასევე მის ფარგლებს გარეთ – მათ შორისაა თავად დემონსტრანტების, არაერთი ინფორმატორის, გაეროს ექსპერტების და საქართველოში მომუშავე ექსპერტების ჩვენებები, ასევე სამედიცინო კვლევები, წერილობითი საბუთები და ანგარიშები. ეს რეპორტაჟი მტკიცედ ემსახურება საზოგადოების ინტერესს და შეგროვებული მტკიცებულებები აუდიტორიას ნათლად წარედგინა. ჩვენ ვიცავთ ჩვენს ჟურნალისტურ სამუშაოს და მადლობას ვუხდით მონაწილე მამაც კონტრიბუტორებს”. – აცხადებს BBC-ის სპიკერი.
BBC-მ პირველ დეკემბერს გამოაქვეყნა ვრცელი სტატია, სადაც აღნიშნულია, რომ მათ მიერ შეგროვებული მტკიცებულებების თანახმად, გასულ წელს საქართველოს ხელისუფლებამ ანტისამთავრობო მომიტინგეების ჩასახშობად პირველი მსოფლიო ომის დროინდელი ქიმიური ნივთიერება გამოიყენა.
BBC-ის სამსახური ამბობს, რომ გამოძიების პროცესში მათ ინფორმატორები ჰყავდათ საქართველოს საპოლიციო სპეცრაზმის რიგებიდანაც. ჟურნალისტები ასევე ესაუბრნენ ქიმიური იარაღის ექსპერტებს, ექიმებს, დაზარალებულებს.
ამ წყაროებიდან შეგროვებული მტკიცებულებები მიუთითებს, რომ პროევროპული აქციების დარბევისას გამოყენებული იყო ნივთიერება, რომელსაც ფრანგული სამხედრო უწყება “კამიტეს” უწოდებს.
გამოცემა წერს, რომ “კამიტე” პირველად პირველი მსოფლიო ომის დროს საფრანგეთმა გერმანიის წინააღმდეგ გამოიყენა. მისი შემდგომი გამოყენების შესახებ არსებობს მწირი ინფორმაცია, მაგრამ ითვლება, რომ ის მიმოქცევიდან 1930-იან წლებში ამოიღეს, იმის გამო, რომ მას ჰქონდა ხანგრძლივი ეფექტი. მის შემცვლელად კი CS გაზი, ანუ, ცრემლსადენი გაზი გამოიყენება.
“ქართული ოცნების” განცხადებით, ხელისუფლებამ მიიღო გადაწყვეტილება BBC-ს წინააღმდეგ სამართლებრივი დავა საერთაშორისო სასამართლოებში დაიწყოს. განცხადებაში ნათქვამია, რომ ხელისუფლება გამოიყენებს ყველა შესაძლო სამართლებრივ გზას, რომ “სიცრუის გამავრცელებელმა ეგრეთ წოდებულმა მედიამ” პასუხი აგოს “ბინძური, ცრუ” ბრალდებების გავრცელების გამო.
სახელმწიფო უსაფრთხოების სამსახურმა BBC-ის მიერ გავრცელებულ ინფორმაციასთან დაკავშირებით გამოძიება 333-ე და 319-ე მუხლებით დაიწყო, რაც სამსახურებრივი უფლებამოსილების გადამეტებას და უცხოეთის ორგანიზაციისთვის მტრულ საქმიანობაში დახმარებას გულისხმობს.
უწყება აცხადებს, რომ გამოძიების მიზანია, დადგინდეს, რა ინფორმაციას ეყრდნობა აღნიშნული ინფორმაცია და ასევე მისი რელევანტურობა.
