გამოცემა "ბათუმელების" ანგარიშებს ინკასო დაადეს. მედიის გადასარჩენად მკითხველები გაერთიანდნენ
“ბათუმელების” ანგარიშებს ინკასო დაადეს
გამოცემა “ბათუმელების” ანგარიშებს, რომლის დამფუძნებელი და მედიამენეჯერი მზია ამაღლობელი უკვე შვიდი თვეა წინასწარ პატიმრობაშია პოლიციელისთვის სილის გაწვნის გამო, შემოსავლების სამსახურმა ინკასო დაადო. როგორც ორგანიზაციაში განმარტავენ, ოფიციალური მიზეზი დავალიანებაა, რეალური მიზეზი – სურვილი, რომ მედიაორგანიზაციამ საქმიანობა შეწყვიტოს.
- “შეიძლება რამდენიმე წელი ვიჯდე, რადგან რეჟიმს უნდა ასე” – მზია ამაღლობელის პროცესები დასასრულისკენ მიდის
- “ჩემთვის უჩვეულოა რასაც ვაკეთებ, უბრალოდ, სხვა გზა არ დამიტოვეს” – “ბათუმელების” რედაქტორი
იმავე დღეს, მკითხველებმა “ბათუმელების” მხარდამჭერის კამპანია დაიწყეს. შედეგად, გამოცემამ შეძლო დავალიანების ძირი თანხის დაფარვა. შემოსავლების სამსახურმა კი მედიაორგანიზაციას, რომელსაც მანამდე სამჯერ უთხრა უარი, გრაფიკის შედგენა შესთავაზა.
რა მოხდა
შპს “ბათუმელები” ორ გამოცემას აერთიანებს – “ბათუმელებს”, რომელიც აჭარაშია ბაზირებული და “ნეტგაზეთს”. დავალიანება, რომელიც “ბათუმელებს” მართებს სახელმწიფოს წინაშე, 21 ივლისის მონაცემებით, 282,191 ლარია. ეს თანხა მოიცავს ძირს – 47 ათას ლარს, რომელსაც დარიცხული აქვს საურავი – 126 ათასი ლარი და ჯარიმა 109 ათასი ლარი. გამოცემას დავალიანება აღიარებული აქვს და მას ნაწილ-ნაწილ ფარავდა.
რამდენიმე დღის წინ “ბათუმელებს” შემოსავლების სამსახურიდან დაუკავშირდნენ და აცნობეს, რომ დავალიანება ხუთი დღის ვადაში უნდა დაეფარათ. წინააღმდეგ შემთხვევაში ანგარიშებს ინკასოს დაადებდნენ, შემდეგ კი ქონებას დააყადაღებდნენ და აღსრულების ეროვნული ბიურო აღსრულების პროცესს დაიწყებდა – გაყიდდა ორგანიზაციის ქონებას – საუბარია ოფისსა და რედაქციის ტექნიკურ აღჭურვილობაზე.
ინკასოს დადების მუქარის შემდეგ, „ბათუმელებმა“ შემოსავლების სამსახურს ოფიციალურად მიმართა და ითხოვა ვალის გადასახდელად მათთვის გრაფიკი შეეთავაზებინათ. ამას საქართველოს საგადასახადო კოდექსი ითვალისწინებს. მაგრამ, უარი მიიღო.
ამის შემდეგ, 17 ივლისს, „ბათუმელების“ ანგარიშებს ინკასო დაედო.
“ინკასო და უახლეს ერთ კვირაში დაგეგმილი ყველა სხვა ოპერაცია მიმართულია მზია ამაღლობელის გასატეხად, პერსპექტივაში კი მის მიერ შექმნილი მედიაორგანიზაციის გასანადგურებლად. ამის მარტივი დადასტურებაა ერთი მაგალითი: შემოსავლების სამსახურის 2025 წლის 21 მაისის ოფიციალური ინფორმაციით, ტელეკომპანია „იმედის“ დავალიანება ბიუჯეტის წინაშე არის 17 მილიონი ლარი. „რუსთავი 2-ს“ კი 25 მილიონი ლარი აქვს ბიუჯეტისთვის გადასახდელი“, – ნათქვამია ორგანიზაციის განცხადებაში.
იმ დღეს, როცა ინკასოს ამბავი გახმაურდა, მზია ამაღლობელს საპროცესო გარიგება შესთავაზეს
მზია ამაღლობელის სასამართლო პროცესები ბათუმის საქალაქო სასამართლოში, დასკვნით ეტაპზეა. 1-ელ აგვისტოს დაცვის მხარე საბოლოო სიტყვას იტყვის, რის შემდეგაც, სავარაუდოდ, მოსამართლე ნინო სახელაშვილი მზია ამაღლობელის განაჩენს გამოაცხადებს. ბრალი, რომელიც ამაღლობელს აქვს წარდგენილი, სასჯელის სახით 4-დან 7 წლამდე პატიმრობას ითვალისწინებს.
გუშინ, 21 ივლისს, იმ დღეს როცა მზია ამაღლობელის საქმეზე ბოლოს წინა სასამართლო პროცესი იყო და ასევე, ინკასოს დადების ამბავი გახმაურდა, ბრალდების მხარემ საპროცესო შეთანხმება ახსენა.
„მათი მზადყოფნის შემთხვევაში ჩვენ მზადყოფნას გამოვთქვამთ განვიხილოთ [საპროცესო შეთანხმება]“, – თქვა მზია ამაღლობელის საქმის პროკურორმა თორნიკე გოგეშვილმაა და დაამატა, რომ საპროცესო შეთანხმების გაფორმებაზე დაზარალებულად ცნობილი ირაკლი დგებუაძეც თანახმაა. ირაკლი დგებუაძე ბათუმის პოლიციის უფროსია, მისთვის სილის გაწვნისთვის ზის მზია ამაღლობელი ციხეში.
საპროცესო შეთანხმება ნიშნავს, რომ მზია ამაღლობელმა ბრალდება აღიაროს. მისმა ადვოკატმა მაია მწარიაშვილმა სხდომის დასრულების შემდგომ თქვა, რომ მზია თავს დამნაშავედ არ მიიჩნევს და საპროცესო შეთანხმებას გამორიცხავს.
„საპროცესო შეთანხმებაზე პროკურორის განცხადება სახელისუფლებო ნარატივს ეხმიანება – რომ მზიამ შემოლაწუნება ჩაიდინა დიფ სთეითის დავალებით, რომ მას დაუდგენელი პირები რაღაც ინსტრუქციებს აძლევდნენ და ა.შ. ბრალდებამ თქვა იგივე – თუ მზია დაიბრალებს ყველაფერს, რაც მას არ ჩაუდენია: პოლიციელების შეურაცხყოფა, წინააღმდეგობა და თავდასხმა – მაშინ ბრალდება იფიქრებს სასჯელის შემსუბუქებაზე.
ეს ვიცოდით პირველივე დღიდან. მას სთავაზობდნენ: მოინანიე, აღიარე. ჩვეულებრივი ძალადობაა კანონის სახელით. მას ეუბნებიან, რომ ასეთი სასამართლოა, არაფრის შანსი არ გაქვს, ასეთი ბრალდებაა, არაფრის შანსი არ გაქვს. უნდა დაიბრალო ის, რაც არ ჩაგიდენია, თუ გინდა, თავისუფლება იხილო”, – თქვა მაია მწარიაშვილმა.
კამპანია “ბათუმელების” დასახმარებლად
გუშინ, 21 ივლისს, იმავე დღეს, როცა ინკასოს ამბავი გახმაურდა, “ბათუმელების” გულშემატკივარმა ჟურნალისტებმა მედიის დახმარების კამპანია დაიწყეს. განცხადებაში, რომელიც მათ გაავრცელეს, ნათქვამი იყო, რომ გამოცემის რედაქტორი ეთერ თურაძე ამ კამპანიის წინააღმდეგი იყო, მაგრამ, მათ ჩათვალეს, რომ ეს აუცილებელი ნაბიჯია ორი დამოუკიდებელი გამოცემის გადასარჩენად.
დღის ბოლოს, ტელეკომპანია “ფორმულასთან” ჩართვისას ეთერ თურაძემ თქვა, რომ ქვეყანაში არსებული მდგომარეობის, 50-ზე მეტი სინდისის პატიმრის, ათასობით დაჯარიმებული ადამიანის ფონზე, ის კატეგორიულად ეწინააღმდეგებოდა ამ კამპანიას:
“მე როგორც მაქვს ინფორმაცია, სოლიდური თანხა შემოვიდა იმ ანგარიშებზე, რომელიც ჩვენმა კოლეგებმა დადეს. მე ერთი მხრივ ძალიან უხერხულად ვგრძნობ თავს და მეორე მხრივ ძალიან ბედნიერი ვარ, რომ ადამიანები ლარს, 2 ლარს, 5 ლარს რიცხავენ იმისათვის, რომ მხარი დაუჭირონ “ბათუმელებს”.
ამ ამბებიდან მეორე დღეს, 22 ივლისს, შუადღეს, “ბათუმელებმა” თქვა, რომ მკითხველების მხარდაჭერით მათ დავალიანების ძირი თანხა – 47 ათასი ლარი დაფარეს.
ამ განცხადებაში მათ მკითხველებს მადლობა გადაუხადეს და კვლავ გაუსვეს ხაზი, რომ ყველა ინსტრუმენტი, რასაც ხელისუფლება “ბათუმელების” წინაათღმდეგ იყენებს, მზია ამაღლობელის და მის მიერ შექმნილი მედიის წინააღმდეგაა მიმართული:
“ინკასო, როგორც ინსტრუმენტი ხელისუფლებამ გამოიყენა მზია ამაღლობელის განაჩენის ეტაპზე. შესაბამისად, მივიჩნევთ, რომ ინკასო და უახლეს მომავალში დაგეგმილი ყველა სხვა ოპერაცია მიმართულია მზია ამაღლობელის წინააღმდეგ, პერსპექტივაში კი მის მიერ შექმნილი მედიაორგანიზაციის გასანადგურებლად“, – ვკითხულობთ განცხადებაში.
დღის ბოლოს, საზოგადოებაში გაჩენილი დიდი ვნებათა ღელვის ფონზე, შემოსავლების სამსახურმა გაავრცელა ოფიციალური განცხადება. მათ თქვეს, რომ საგადასახადო შეთანხმების შემთხვევაში, მზად არიან მოხსნან ყადაღა „ბათუმელების“ ანგარიშებს და მისცენ დავალიანების დაფარვის საშუალება შესაბამისი გრაფიკის მიხედვით.
აქამდე შემოსავლების სამსახური შეთანხმების და გრაფიკით გადახდის წინააღმდეგი იყო. ეთერ თურაძის განცხადებით, მათ სამჯერ მიიღეს ამ თხოვნაზე უარი შემოსავლების სამსახურისგან.
როგორ შეფასდა მომხდარი
ადამიანის უფლებადაცვითმა საერთაშორისო ორგანიზაციამ Amnesty International-მა ანგარიშებზე ინკასოს დადება შეაფასა, როგორც “ბათუმელებზე” ზეწოლა:
“დამოუკიდებელ ქართულ გამოცემა „ბათუმელებს“ ანგარიშები გაუყინეს მას შემდეგ, რაც მისი დამფუძნებლის, მზია ამაღლობელის წინააღმდეგ პოლიციის მხრიდან ძალადობის სავარაუდო შემთხვევები გამოვლინდა, რომელიც ამჟამად უკანონოდ არის დაკავებული და შებღალული სასამართლო პროცესის წინაშე დგას. Amnesty მოუწოდებს, გამოიძიონ პოლიციის ძალადობის ყველა ბრალდება“, – ნათქვამია Amnesty International-ის განცხადებაში.
“„ქართული ოცნება“ ცდილობს დამალოს კორუფცია და დანაშაულები ქართველი ხალხის წინააღმდეგ თავისუფალი პრესის ჩახშობით. ისინი ცდილობენ ჟურნალისტ მზია ამაღლობელის გაჩუმებას, რომელიც იანვრიდან პოლიტიკურად მოტივირებული ბრალდებებით წინასწარ პატიმრობაში იმყოფება“, – ვკითხულობთ ჰელსინკის კომისიის განცხადებაში, რომელიც დღეს, 22 ივლისს გამოქვეყნდა.
“ბათუმელების” დახმარების კამპანია ისევ გრძელდება. ორგანიზატორი ჟურნალისტები წერენ, რომ ამ ეტაპზე „ბათუმელებს“ გადასახდელი დარჩა ძირ თანხაზე დარიცხული საურავი და ჯარიმა: საურავი 126 ათასი ლარი და ჯარიმა – 109 ათასი ლარი.
შეწირულობები ამ ანგარიშებზე გროვდება:
#GE93TB0850845062122335 ზვიად ქორიძე – თიბისი
#GE11BG0000000122153100 გელა მთივლიშვილი – საქართველოს ბანკი
გარდა ამისა, “ბათუმელებისა” და “ნეტგაზეთის” დახმარება შესაძლებელია სხვა გზებითაც. ამ ბმულზე თანხები უკვე დიდი ხანია გროვდება. იქ ჩანს, რომ ადამიანები 5, ზოგი 100 და 200 დოლარს რიცხავს გამოცემის დასახმარებლად.
ბათუმელების” ანგარიშებს ინკასო დაადეს
