ბაქოს სასამართლო: არაღიარებული ყარაბაღის ყოფილმა ლიდერმა რუბენ ვარდანიანმა კითხვებზე პასუხის გაცემაზე უარი თქვა

რუბენ ვარდანიანის სასამართლო პროცესი

ბაქოს სასამართლოში გაიმართა მორიგი სხდომა არაღიარებული მთიანი ყარაბაღის ყოფილი ლიდერის, რუბენ ვარდანიანის საქმეზე. პროკურატურა ვარდანიანს მძიმე დანაშაულებში სდებს ბრალს, მათ შორის ტერორიზმში, მის დაფინანსებასა და სხვა სამართალდარღვევებში.

ბრალდებების სიის ხანგრძლივი წაკითხვის შემდეგ, მოსამართლემ მისი დაკითხვის დაწყება სცადა, თუმცა ვარდანიანმა განაცხადა, რომ პროტესტის ნიშნად კითხვებზე პასუხს არ გასცემს.

მორიგი სასამართლო სხდომა 25 თებერვალს ჩაინიშნა.

რატომ რჩება რუბენ ვარდანიანი „მოსკოვის პროექტად“? ანალიზი ბაქოდან

„ვარდანიანის პროექტი“ არის რუსეთის სასოწარკვეთილი მცდელობა შეაჩეროს სამშვიდობო ხელშეკრულების პროცესი

ვარდანიანის საქმე ბაქოს სამხედრო სასამართლოს მოსამართლეთა კოლეგიამ გადაიბარა. პროცესი ზეინალ აგაევის (თავმჯდომარე), ჯამალ რამაზანოვისა და ანარ რზაევის თავმჯდომარეობით მიმდინარეობს, იუწყება ადგილობრივი გამოცემა Report.

ბრალდებულს უზრუნველყოფილი ჰქონდა თარჯიმანი რუსულ ენაზე, ასევე ადვოკატთა გუნდი.

სასამართლო პროცესს ესწრებოდნენ დაზარალებულები, მათი უფლებამონაცვლეები, წარმომადგენლები და სახელმწიფო ბრალმდებლები.

სასამართლომ რუბენ ვარდანიანის მოსამართლეთა აცილების მოთხოვნა არ დააკმაყოფილა

სასამართლო პროცესის დასაწყისში, ბაქოს სამხედრო სასამართლომ დააკმაყოფილა რუბენ ვარდანიანისა და მისი ადვოკატის, ავრაამ ბერმანის შუამდგომლობა კონფიდენციალური შეხვედრისთვის შესაბამისი პირობების შექმნის შესახებ. ამის შემდეგ, სხდომაზე შესვენება გამოცხადდა.

შეხვედრის დასრულების შემდეგ, ვარდანიანმა და მისმა დამცველმა მოსამართლეთა კოლეგიის შეცვლის მოთხოვნით ახალი შუამდგომლობა წარადგინეს.

სახელმწიფო ბრალდების წარმომადგენლებმა, პროკურორებმა ვიუსალ ალიევმა და ფუად მუსაევმა, აღნიშნეს, რომ მსგავსი მოთხოვნა უკვე განიხილეს წინა სასამართლო სხდომაზე. მათ ასევე გაიხსენეს აზერბაიჯანის სისხლის სამართლის პროცესუალური კოდექსის მოთხოვნები, რომლის თანახმადაც, მოსამართლეთა შეცვლის მოთხოვნა სათანადოდ უნდა იყოს დასაბუთებული.

პროკურორების განცხადებით, შუამდგომლობაში კონკრეტული საფუძვლები არ იყო მითითებული, რის გამოც მათ მის განხილვაზე უარის თქმა მოითხოვეს. დაზარალებულთა მხარემ ასევე მხარი დაუჭირა ბრალდების პოზიციას.

მოსამართლეებმა გადაწყვეტილება სახელმწიფო ბრალდების სასარგებლოდ მიიღეს და შუამდგომლობა განხილვის გარეშე დატოვეს.

“დანაშაულები სომხეთის პირდაპირი ხელმძღვანელობით და მონაწილეობით განხორციელდა”

მოსამართლეთა შეცვლის მოთხოვნის უარყოფის შემდეგ, სასამართლო სხდომა ბრალდების აქტის ცალკეული ეპიზოდების გამოცხადებით გაგრძელდა.

ბრალდების ძირითადი მუხლები მოიცავს:

• აზერბაიჯანის ოკუპირებულ ტერიტორიებზე ნაღმების ჩადებას,
• აზერბაიჯანელი ტყვეების და მძევლების წამებას,
• სხვა ცალკეულ დანაშაულებრივ ფაქტებს.

აღინიშნა, რომ ყველა აღნიშნული დანაშაული სომხეთისა და მისი არალეგალური სეპარატისტული სტრუქტურის მიერ წარმოებული აგრესიული ომის ფარგლებში განხორციელდა.

Report-ის ინფორმაციით, ბრალდების მხარემ განაცხადა:
“დანაშაულები სომხეთის, მისი სახელმწიფო ორგანოების, ოფიციალური პირების, შეიარაღებული ძალებისა და არალეგალური შეიარაღებული ფორმირებების პირდაპირი ხელმძღვანელობით და მონაწილეობით განხორციელდა. ისინი ხორციელდებოდა როგორც ზეპირი და წერილობითი მითითებების, ბრძანებებისა და ინსტრუქციების საფუძველზე, ასევე მატერიალური, ტექნიკური და ცოცხალი ძალის მხარდაჭერის, ცენტრალიზებული მართვისა და მკაცრი კონტროლის პირობებში.”

ბრალდების მიხედვით, აღნიშნული დანაშაულები შიდა და საერთაშორისო სამართლის ნორმების დარღვევით ჩაიდინეს და მათში უშუალო ან ირიბი მონაწილეობა მიიღეს შემდეგმა პირებმა: სომხეთის ყოფილი პრეზიდენტები რობერტ ქოჩარიანი და სერჟ სარგსიანი, ასევე ვაზგენ მანუკიანი, ვაზგენ სარგსიანი, სამველ ბაბაიანი, ვიტალი ბალასანიანი, ზორია ბალაიანი, სეირან ოჰანიანი, არშავირ ქარამიანი, მონტე მელქონიანი და სხვები.

რუბენ ვარდანიანისთვის წაყენებული ბრალდებები

სასამართლო პროცესის დასასრულს, აზერბაიჯანის გენერალური პროკურორის უფროსმა თანაშემწემ, ვიუსალ ალიევმა, წარმოადგინა აზერბაიჯანის სისხლის სამართლის კოდექსის ის მუხლები, რომლითაც რუბენ ვარდანიანს ბრალი ედება. მათ შორისაა:

• 100.1, 100.2 – აგრესიული ომის დაგეგმვა, მომზადება, გაჩაღება და წარმოება,
• 107 – მოსახლეობის დეპორტაცია და იძულებითი გადასახლება,
• 109 – პოლიტიკური ან ეთნიკური ნიშნით დევნა,
• 110 – პირების იძულებითი გაუჩინარება,
• 112 – თავისუფლების უკანონოდ აღკვეთა საერთაშორისო სამართლის ნორმების დარღვევით,
• 113 – წამება,
• 114.1 – დაქირავებული სამხედროების გამოყენება,
• 115.2 – ომის კანონებისა და ტრადიციების დარღვევა,
• 116.0.1, 116.0.2, 116.0.10, 116.0.11, 116.0.16, 116.0.18 – საერთაშორისო ჰუმანიტარული სამართლის დარღვევა შეიარაღებული კონფლიქტის დროს,
• 120.2.1, 120.2.3, 120.2.4, 120.2.7, 120.2.11, 120.2.12 – განზრახ მკვლელობა,
• 29,120.2.1, 29,120.2.3, 29,120.2.4, 29,120.2.7, 29,120.2.11, 29,120.2.12 – განზრახ მკვლელობის მცდელობა,
• 192.3.1 – უკანონო მეწარმეობა,
• 214.2.1, 214.2.3, 214.2.4 – ტერორიზმი,
• 214-1 – ტერორიზმის დაფინანსება,
• 218.1, 218.2 – დანაშაულებრივი ორგანიზაციის შექმნა,
• 228.3 – ცეცხლსასროლი იარაღის, საბრძოლო მასალისა და ასაფეთქებელი მოწყობილობების უკანონო შეძენა, გადაცემა, რეალიზაცია, შენახვა, გადატანა ან ტარება,
• 270-1.2, 270-1.4 – ავიაციის უსაფრთხოებისათვის საფრთხის შემქმნელი ქმედებები,
• 278.1 – ძალადობრივი გზით ხელისუფლების ხელში ჩაგდება ან მისი ძალადობრივი შენარჩუნება, კონსტიტუციური წესრიგის შეცვლა,
• 279.1, 279.2, 279.3 – კანონით გაუთვალისწინებელი შეიარაღებული ფორმირებების ან ჯგუფების შექმნა,
• 318.2 – აზერბაიჯანის სახელმწიფო საზღვრის უკანონო გადაკვეთა.

ბრალდების დასკვნის საბოლოო ნაწილი ამით დასრულდა.

შემდეგ, პროცესის თავმჯდომარე მოსამართლემ, ზეინალ აგაევმა, ბრალდებულს განუმარტა მისთვის წაყენებული ყველა ბრალის არსი, სამართლებრივი კვალიფიკაცია, სისხლის სამართლის კანონით გათვალისწინებული სასჯელი და ის უფლებები, რომლებიც მას როგორც ბრალდებულს გააჩნია.

რუბენ ვარდანიანმა პროტესტის ნიშნად კითხვებზე პასუხის გაცემაზე უარი თქვა

ამის შემდეგ მოსამართლემ, კანონის შესაბამისად, ჰკითხა ბრალდებულს, აღიარებს თუ არა ბრალს. ბრალდებულმა პროტესტის ნიშნად უარი თქვა კითხვებზე პასუხის გაცემაზე“, – ნათქვამია გავრცელებულ ინფორმაციაში.

შემდეგი სასამართლო სხდომა 25 თებერვალს არის ჩანიშნული.