აზერბაიჯანში კარანტინი კიდევ ორი თვით გაახანგრძლივეს

ჯემნიუსი

ბაქო

აზერბაიჯანში კარანტინი კიდევ ორი თვით – 2021 წლის 1 ივნისამდე გაახანგრძლივეს. აპრილსა და მაისში, შაბათ-კვირას, საზოგადოებრივი ტრანსპორტი არ იმუშავებს. ასევე, ავტობუსების გარეშე მოუწევთ ყოფნა მოქალაქეებს 20-დან 29 მარტის ჩათვლით – სადღესასწაულო არდადეგების დროს, მათი მოძრაობა აკრძალულია.

აზერბაიჯანის მინისტრთა კაბინეტთან არსებულმა კორონავირუსთან ბრძოლის ოპერატიულმა შტაბმა გადაწყვეტილება მიიღო, ქვეყანაში საკარანტინე რეჟიმის 2021 წლის 1 ივნისამდე გაგრძელების თაობაზე. ბოლოს კარანტინი მიმდინარე წლის იანვარში, აპრილამდე გაახანგრძლივეს.

საზოგადოებრივი ტრანსპორტი არდადეგებზე მიდის

ცხრა დღით – 20-დან 29 მარტის ჩათვლით – ნოვრუზის დღესასწაულის გამო, აზერბაიჯანში, დასვენების დღეებია გამოცხადებული. ამ დღეებში, აკრძალულია საზოგადოებრივი ტრანსპორტის მოძრაობა მთელი ქვეყნის მასშტაბით.

ამას გარდა, 2021 წლის 1 ივნისამდე, შაბათ-კვირას არ იმოძრავებს ავტობუსები. ეს ახალი გადაწყვეტილება არ არის – აზერბაიჯანში, 2020 წლის ოქტომბრიდან მოყოლებული, ავტობუსები შაბათ-კვირას არ მუშაობს.

ასევე, ბაქოში, ოქტომბრიდან არ მუშაობს მეტრო – ძირითადი საზოგადოებრივი ტრანსპორტი აზერბაიჯანის დედაქალაქში. პრეზიდენტის თანაშემწის, შაჰმარ მოვსუმოვის თქმით, მეტროპოლიტენის გახსნის საკითხი ჯერ არც განიხილება.

“ტრანსპორტის ეს სახეობა ვირუსის გავრცელების მაღალ რისკს ატარებს”, – აღნიშნა მან.

ქორწილები არ იქნება

აზერბაიჯანის პრეზიდენტის თანაშემწემ, შაჰმარ მოვსუმოვმა ოპერატიული შტაბის ბრიფინგის დროს, ჟურნალისტების კითხვასაც უპასუხა ქვეყანაში ქორწილების ჩატარების დაშვებასთან დაკავშირებით.

ჩინოვნიკმა აღნიშნა, რომ ეს საკითხი მთავრობის დონეზე ჯერჯერობით არ განიხილება და კარანტინის პერიოდში, მასობრივი ღონისძიებების ჩატარება რეკომენდირებული არ არის.

ქორწილების ჩატარება აზერბაიჯანში 2020 წლის მარტიდან არის აკრძალული.

რეგიონებში გზები არ ჩაკეტეს

ბაქოელების განსაკუთრებულ შეშფოთებას იწვევდა სადღესასწაულო დღეებში, დედაქალაქიდან რეგიონების მიმართულებით გასვლის შესაძლო აკრძალვა. საქმე იმაშია, რომ ადამიანები ტრადიციულად, არდადეგებს ქალაქგარეთ ატარებენ.

თუმცა, მინისტრთა კაბინეტთან არსებულმა ოპერატიულმა შტაბმა გადაწყვიტა, რომ არ დაკეტოს რეგიონებში გზები.

ასევე, სადღესასწაულო დღეებში იმუშავებს კაფე-რესტორნები. მათ მუშაობის უფლება დილის 6 საათიდან შუაღამემდე აქვთ.

ბრიტანული შტამი აზერბაიჯანში

18 მარტს, აზერბაიჯანის ჯანდაცვის სამინისტრო განცხადებით გამოვიდა, ქვეყანაში, კორონავირუსის ბრიტანული შტამის აღმოჩენის შესახებ.

აღნიშნეს, რომ COVID-19-ის ახალი, შედარებით უფრო სახიფათო შტამით სამი ადამიანია დაინფიცირებული – ორი ქალი და ერთი მამაკაცი.

40 წელზე უფროსი ასაკის მოქალაქეების ვაქცინაცია იწყება

22 მარტიდან, აზერბაიჯანში, 40 წელზე უფროსი ასაკის მოქალაქეების ვაქცინაცია იწყება. ეს უკვე მოსახლეობის ვაქცინაციის მეოთხე ეტაპია.

პირველ ეტაპზე, სამედიცინო სფეროს მუშაკები აცრეს, მეორეზე – 65 წელზე უფროსი ასაკის ადამიანები, მესამეზე – 50 წელზე უფროსი ასაკის მოქალაქეები.

მთავრობის ინფორმაციით, 19 მარტამდე, აზერბაიჯანში ვაქცინაცია ჩაუტარდა 470 ათასზე უფრო მეტ ადამიანს.

ქვეყანა ჩინური წარმოების Sinovac-ის ვაქცინას იყენებს.

კომენტარები

სოციალური ქსელების მომხმარებლები აქტიურად განიხილავენ ოპერატიული შტაბის ბრიფინგსა და მის გადაწყვეტილებას. აი, რამდენიმე სახასიათო კომენტარი:

„მძაფრსიუჟეტიანი სერიალი აზერბაიჯანული სახელწოდებით „ბრიფინგი“ და ყველა სუნთქვაშეკრული ელოდება მის დაწყებას და ხარბად იჭერს ოპერატიული შტაბის წევრების თითოეულ სიტყვას. ასეთი გიჟური წარმატება რობერტ დე ნიროსაც კი არ ჰქონია „ნათლიაში“.

„ჩემი აზრით, მთელი ეს ხმაური ბრიტანული შტამის გარშემო და ბრიფინგი – საინფორმაციო ფარდაა“.

„ჯერჯერობით გაქვთ დრო, ავტობუსთან გადაიღოთ ფოტო, შემდეგ გვიან იქნება“.