აზერბაიჯანში "ირანელ ჯაშუშებზე" ნადირობა გრძელდება
ირანელი ჯაშუშები აზერბაიჯანში
16 მაისს აზერბაიჯანის სამართალდამცავმა უწყებებმა კიდევ ერთი „პროირანული“ ჯგუფის დაკავების შესახებ განაცხადეს. რვა კაციანი ჯგუფის წევრებს აზერბაიჯანში ირანის სპეცსამსახურების დაკვეთით შარიათის სახელმწიფოს – „ქარიმას“ შექმნის მცდელობას ედავებიან. ანალოგიური ბრალდებით დაკავებული აზერბაიჯანის მოქალაქეების რიცხვი უკვე ათეულობით გაიზარდა.
რა მოხდა?
ინფორმაციას შინაგან საქმეთა სამინისტროს პრესსამსახური, სახელმწიფო უსაფრთხოების სამსახური და გენერალური პროკურატურა ერთობლივად ავრცელებენ.
„გატარებული იქნა ოპერატიული ღონისძიებები აზერბაიჯანის მოქალაქეების ჯგუფის მიერ ირანის სპეცსამსახურების მიერ აზერბაიჯანის ტერიტორიაზე სიტუაციის დესტაბილიზაციის მიზნით ჩადენილი დანაშაულებრივი ქმედებების შესაჩერებლად.
დადგინდა, რომ რუფულა ახუნდზადემ და მისმა ვაჟმა, ალმურსალ ახუნდზადემ, ირანის სპეცსამსახურებთან თანამშრომლობით, აწარმოეს სპეციალური აქტივობები ქვეყანაში წინააღმდეგობის ჯგუფების ორგანიზების მიზნით, რათა შეექმნათ “ქარიმას” სახელმწიფო აზერბაიჯანის რესპუბლიკის კონსტიტუციური სისტემის ძალადობრივი შეცვლიც, რაც ითვალისწინებდა შეიარაღებულ არეულობებს და საზოგადო მოღვაწეებისა და თანამდებობის პირების მკვლელობის მცდელობების ორგანიზებას. გეგმის ფარგლებში, რუფულა ახუნდზადემ შექმნა კონფიდენციალური ჯგუფები WhatsApp-ზე, Telegram-ზე და სხვა ქსელებში.“
ოფიციალური ინფორმაციით, აღნიშნულმა პირებმა ირანულ სპეცსამსახურებს მიაწოდეს საჯარო მოხელეთა და საზოგადო მოღვაწეთა სია მათზე თავდასხმის მცდელობის ორგანიზებისთვის – მათი პირადი მონაცემები, საცხოვრებელი და სამუშაო ადგილების მისამართები.
„ამ მიზნით მან ჯგუფის წევრებს ცეცხლსასროლი იარაღის შეძენა და მოლოტოვის კოქტეილის მომზადება დაავალა. ოპერაციის დროს დააკავეს და გამოძიებას გადასცეს ჯგუფ „შურისძიება 313“-ის შვიდი წევრი: ელგუნ აგაევი, რუსლან ალიევი, იუსიფ მირზოევი, ელვინ ჯაფაროვი, სავალან ჰუსეინლი, ბილალ სუჯედინი, მაგერრამალი მუსაევი“, – ნათქვამია განცხადებაში.
გასული წლის ბოლოს დაწყებული ნადირობა
აზერბაიჯანში “ირანელ ჯაშუშებზე” ნადირობა გასული წლის ბოლოს დაიწყო. პირველი ჯაშუშური ქსელის გამოვლენა 2022 წლის ნოემბერში მოხდა. დაკავებულთაგან ხუთს ირანის უშიშროების სამსახურებთან თანამშრომლობისთვის ბრალი წაუყენეს და “სახელმწიფოს ღალატისთვის” გაასამართლეს.
ოფიციალური ბრალდების თანახმად, ზაჰირ ასკეროვი, კასპიის ზღვის ნავთობის ფლოტის გემის კაპიტანი ქალაქ ყუმში (ირანი) მატერიალური ჯილდოს სანაცვლოდ, ამ ქვეყნის სპეცსამსახურების წარმომადგენლმა გადაიბირა. გასული პერიოდის განმავლობაში, მათი სახელით, მან შეაგროვა ინფორმაცია აზერბაიჯანში მოქმედი კომპანიებისა და უცხო სახელმწიფოების წარმომადგენლობების შესახებ, კასპიის ზღვაში საზღვაო წვრთნების ადგილისა და დროის შესახებ, ნავთობის პლატფორმებზე გადაზიდული ტვირთის შესახებ და აღნიშნული ინფორმაცია მობილური ტელეფონის საშუალებით გადასცა კურატორებს, ასევე, გადასცა ინფორმაცია უშუალოდ ირანში, სპეცსამსახურების წარმომადგენლებთან შეხვედრებისას.
სამართალდამცავი ორგანოების მიერ გავრცელებული ინფორმაციის თანახმად, ასკეროვთან ერთად, ჯაშუშობის ბრალდებით დაკავებული კიდევ ოთხი პირი, სხვადასხვა სახის ინფორმაციას აგროვებდა და ირანის სპეცსამსახურებს გადასცემდა.
მედიის ცნობით, მიმდინარე წლის მარტში ჩატარდა ორი ოპერაცია „აზერბაიჯანში ირანის ჯაშუშური ქსელის გამოსავლენად“, ხოლო კიდევ ერთი აპრილში. ამ ბრალდებით დაკავებული აზერბაიჯანის მოქალაქეების რაოდენობა უკვე ათეულობით გაიზარდა.
ყველა ეს დაკავება ირანსა და აზერბაიჯანს შორის დაძაბული ურთიერთობების ფონზე ხდება. დაძაბულობამ, რომელიც გამოიწვია ირანის საკუთრებაში მყოფმა სატვირთოებმა, რომლებმაც სომხეთის ტერიტორია გადაკვეთეს და ყარაბაღის სომხებით დასახლებულ ნაწილში არალეგალურად დადიოდნენ, პიკს მიაღწია ამ წლის დასაწყისში, თეირანში აზერბაიჯანის საელჩოზე განხორციელებული ტერორისტული თავდასხმის შემდეგ.
სამართალდამცავი ორგანოების წარმომადგენლებმა განაცხადეს, რომ მარტში აზერბაიჯანელ დეპუტატზე, ფაზილ მუსტაფაზე შეიარაღებულ თავდასხმასთან დაკავშირებით დაკავებული ოთხი ეჭვმიტანილი ირანის მიერ იყო რეკრუტირებული.
„ხელისუფლება ანეიტრალებს შესაძლო რისკის ჯგუფებს“
ჟურნალისტი ქენან როვშანოღლუ მიიჩნევს, რომ ხელისუფლება ცდილობს “შესაძლო რისკის ჯგუფების განეიტრალებას“.
„აზერბაიჯანის სამართალდამცავი ორგანოები დროდადრო ატარებენ მსგავს „პრევენციულ“ ზომებს, რათა გაანეიტრალონ უცხო ქვეყნების რელიგიური გავლენები. შედეგად, რა თქმა უნდა, უდანაშაულო ადამიანების დიდი ნაწილი ექცევა დაკავებულთა შორის. რა თქმა უნდა, საიდუმლო არ არის, რომ აზერბაიჯანში არიან ადამიანები, რომლებიც ირანის ან, თუ შეიძლება ითქვას, ირანის რელიგიური ცენტრის გავლენის ქვეშ არიან. მაგრამ არა მგონია, ქვეყანაში ამდენი ასეთი ადამიანი იყოს“, – განუცხადა ქენან როვშანოღლუმ Turan-ს.
მან ასევე აღნიშნა, რომ მორწმუნე ადამიანებს აქვთ რელიგიური და სულიერი კავშირი ცნობილ რელიგიურ ცენტრებთან და მათ ვერანაირი ადმინისტრაციული ზომების გატარება ვერ გაწყვეტს:
„ირანის შემთხვევაში ეს კიდევ უფრო პრობლემურია, რადგან ირანი ოფიციალურად ისლამური სახელმწიფოა და სახელმწიფო პოლიტიკის ფარგლებში რელიგიურ პროპაგანდას აწარმოებს. ეს კიდევ უფრო მგრძნობიარეა ჩვენთვის, როგორც ქვეყნისთვის, სადაც მოსახლეობის უმრავლესობა შიიტები არიან, მეზობელი კი ირანია. უფრო მეტიც, ორი ქვეყნის ხელისუფლებას შორის ურთიერთობების გაუარესების პერიოდში, ეს გაუცხოება მორწმუნეებზე ზეწოლაში ვლინდება.“
