აზერბაიჯანში ჟურნალისტი შაჰინ რზაევი დააკავეს
პოლიტიკური დაპატიმრებები აზერბაიჯანში
ცნობილი ჟურნალისტი და ექსპერტი შაჰინ რზაევი ადმინისტრაციული წესით დააკავეს ბაქოში. ოფიციალური ინფორმაციით, ის წვრილმანი ხულიგნობისთვის მოხვდა ციხეში, თუმცა თავად რზაევმა მოასწრო მეგობრებისთვის ეთქვა, რომ სოციალურ ქსელში სტატუსის გამოქვეყნებისთვის დააკავეს.
- აზერბაიჯანში Abzas Media-ს საქმეზე მეექვსე ჟურნალისტი დააკავეს
- “მომხრე ვარ ფართო გაერთიანების, რომელიც იბრძოლებს გამარჯვებისთვის” – ნიკა გვარამია პოლიტიკაში მოდის
- ფაშინიანი აზერბაიჯანს შეიარაღებაზე ერთობლივ კონტროლის სთავაზობს. დათანხმდება თუ არა ბაქო?
ახლობლების თქმით, ჟურნალისტი შაჰინ რზაევი პოლიციამ 15 იანვარს, დღის მეორე ნახევარში, საკუთარ სახლთან ახლოს, სოფელ სურახანში დააკავა, როდესაც ის უახლოეს სასურსათო მაღაზიაში მივიდა. მან მოასწრო მეგობრებისთვის ეთქვა, რომ სოციალურ ქსელში სტატუსის გამო დააკავეს, თუმცა მათ ვერ მოასწრეს იმის გარკვევა, თუ კონკრეტულად რა სტატუსზეა საუბარი. აღმოჩნდა, რომ ბოლო ორი დღის განმავლობაში მის ფეისბუქ გვერდზე ყველა პოსტი წაშლილია.
რზაევთან კომუნიკაციის შეწყვეტიდან რამდენიმე საათში, აზერბაიჯანის შინაგან საქმეთა სამინისტროს პრესსამსახურმა დაადასტურა მისი დაკავება. აღმოჩნდა, რომ დაკავებიდან ორიოდე საათში ის უკვე სასამართლოში გამოცხადდა.
სურახანის რაიონული სასამართლოს გადაწყვეტილებით შაჰინ რზაევს 15 დღიანი ადმინისტრაციული პატიმრობა შეეფარდა. მას ბრალი ადმინისტრაციულ სამართალდარღვევათა კოდექსის 510-ე (მსუბუქი ზიანის მიყენება) და 535.1 (პოლიციის კანონიერი მოთხოვნისადმი დაუმორჩილებლობა) მუხლებით წაუყენეს.
გავრცელებული ინფორმაციით, ჟურნალისტი ქუჩაში იგინებდოა, პოლიცია კი მისგან დისციპლინურ პასუხისმგებლობას ითხოვდა, თუმცა მან ყურადღება არ მიაქცია. ის დააკავეს და სურახანის რაიონის პოლიციის 31-ე სამმართველოში გადაიყვანეს.
ახლობლების თქმით, შაჰინ რზაევის დაკავებისა და სასამართლო პროცესის შესახებ ოჯახის წევრები არ იყვნენ ინფორმირებული. ის სასამართლოში სახაზინო ადვოკატთან ერთად გამოცხადდა. ჟურნალისტმა ხაზგასმით აღნიშნა, რომ ის, რაც ადმინისტრაციულ სამართალდარღვევათა დასკვნაში წერია, სიცრუეა – მას არც ვინმესთვის უგინებია და არც პოლიციის კანონიერ მოთხოვნაზე დაუმორჩილებლობას ადგილი არ ჰქონია.
შაჰინ რზაევი დიდი გამოცდილების მქონე ჟურნალისტია. ის ცნობილია თავისი მონაწილეობით სამოქალაქო საზოგადოების მრავალ რეგიონულ პროექტში, რომელიც მიზნად ისახავს მშვიდობის დამყარებას სამხრეთ კავკასიაში.
დაახლოებით 15 წლის განმავლობაში ის ხელმძღვანელობდა ომისა და მშვიდობის ინსტიტუტის (IWPR) აზერბაიჯანის ოფისს. ის ასევე იყო JAMnews-ის კონტრიბუტორი.
დროდადრო რზაევი აკრიტიკებდა აზერბაიჯანის ხელისუფლებას.
